Izaya 36
36
Baasiliya mbubakapingila munzi wa Jelusalemu
(2 Bami 18.13-17; 2 Makani 32.1-19)
1Mumwaka wakkumi aine wakulela kwa Hezekiya, Senakelibu, mwami waku Asiliya wakaboola kuzoolwana minzi yamu Juda iikwabilidwe akwiitola. 2Mwami waku Asiliya wakatuma mulailili wabasikulwana amaulu ampi mpati kuzwa ku Lakisyi kuti bainke kuyoolwana mwami Hezekiya ku Jelusalemu. Lino mulailili wabasikulwana aamaulu naakaakwiima kukankolola kali kutala lyaziba lili kumugwagwa wamuunda wasikusanzya, 3Eliyakimu mwanaa Hilikiya mweendelezi waŋanda yabwami a Syebina mulembi a Jowa mwana wa Asafu sikubamba makani aalembwa, bakainka kulinguwe. 4Mulailili wabasilumamba wakati, “Amwaambile Hezekiya muti, ‘Mboobu mbwaamba mwami mupati,’ mwami waku Asiliya ulati, ‘Ncinzi cikutunzizye?’ 5Waamba kuti ulakonzya kulwana pele ulikankaizya buyo, nguni uukupede ntunda yakuti undizangile? 6Bona, lino usyomede Ijipiti, pele ooku kuli mbuli kusyoma lubu lutyokede lukonzya kuyasa yooyo uulujata mbuli musako mumaanza. Oobo mbwabede Falo mwami waku Ijipiti alimwi mbwakonzya akucita kuli yooyo uumusyoma.” 7Pele yebo kuti naa wandaambila kuti, “Tulasyoma mu Mwami Leza wesu,” sena tali nguwe ooyo Hezekiya ngwaakamwaila malende azipaililo akwaambila bantu bamu Juda amu Jelusalemu kuti, “Mweelede kukombela acipaililo eeci.”
8Lino boola mupangane asimalelo wangu, mwami waku Asiliya, ndilamupa mabbiza aali zyuulu zyobilo, kuti naa kamukonzya kujana basikwaatanta. 9Ino kayi mbuti mbomukonzya kusampaula naba musyoonto wababelesi basimalelo wangu kakuli musyoma Ijipiti kuti imupe nkalaki abasimabbiza? 10Kwiindilizya waawa sena ndaliboolela buyo kuzoonyonyoona busena oobu kakunyina majwi aazwa ku Mwami Leza? Mwami Leza nguwandaambila kuti ndizoonyonyoone cisi eeci. 11Mpoonya Eliyakimu mwanaa Hilikiya a Syebina a Jowa bakati kumulailili wabasikulwana amaulu, “Twakukomba, twaambile swebo tobabelesi bako mu Cialamu nkaambo tulacimvwa, utatwaambili mu Cihibulu bantu boonse bali abwaanda kabamvwide.”
12Pele mulailili ooyo wakati kulimbabo, “Sena simalelo wangu wakandituma buyo kuli simalelo wanu akuli ndinywe kuti nzooambe zintu eezi? Pele kutali kuli baabo bakkede abwaanda bali mbuli ndinywe batinoolye tubi akunywa minsyu yabo beni”
13Mpawo mulailili ooyo wakapozomoka mu Cihibulu, wakati, “Amuswiilile majwi aamwami mupati, mwami waku Asiliya! 14Mboobu mbwaamba mwami, ‘Hezekiya atamweeni, takooyookonzya kumuvuna kuzwa kulindime. 15Hezekiya atamuciti kuti musyome Mwami Leza cakwaamba kuti, Mwami Leza uyootuvuna ncobeni eelyo munzi uuno tukooyooabwa kumwami waku Asiliya.’
16“Mutamuswiilili Hezekiya pe, nkaambo mboobu mwami waku Asiliya mbwaamba, ‘Amuboole tuzoopangane zyaluumuno, ndendilyo umwi aumwi nayoolilida nsaansa, nkuyu akulinywida maanzi mucitelekezyo cakwe mwini 17mane kusikila nkaboole kuzoomutola kunyika iikozyenye ayanu, nyika yamaila awaini nyika iijisi zyakulya amisaansa.’”
18Hezekiya atamusowi nati, “Mwami Leza uyootuvuna. Sena kuli leza naba omwe akati kabaleza bamisyobo wakavuna nyika yakwe kuzwa kumwami wacisi ca Asiliya? 19Ino bali kuli baleza ba Hamati a Aapadi? Bali kuli baleza ba Sefavaimu? Sena bakavuna Samaliya kulindime? 20Nguuli wabaleza bamanyika aaya wakakonzya kuvuna nyika yakwe kuzwa kulindime? Ino inga walo Mwami Leza ulavuna buti Jelusalemu kuzwa kulindime?”
21Pele bantu bakaumuna buyo, taakwe noliba jwi lyomwe ndibakaingula pe, nkaambo mwami Hezekiya wakabalaililide kuti, “Mutakamwiinguli pe.” 22Mpoonya Eliyakimu mwanaa Hilikiya, wakali mweendelezi waŋanda yabwami, Syebina mulembi a Jowa mwana wa Asafu mulembi wamakani, bakasika kuli Hezekiya kabazapawide zisani zyabo, bamwaambila majwi aamulailili wabasikulwana aamaulu.
Currently Selected:
Izaya 36: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
