Izaya 33

Kukomba kwakulomba lugwasyo

1Maawe kulinduwe osikunyonyoona, yebo ootananyonyoonwa. Maawe kulinduwe osikwaaba, pele yebo tonaabidwe! Waakuleka kunyonyoona, uyoonyonyoonwa, waakuleka kwaaba uyooabwa! 2Kotubeda aaluse O Mwami Leza, nduwe ngotusukeme. Kotupa nguzu cifumo-fumo cili coonse, kotufutula ciindi notuli mumapenzi. 3Ciindi nozuma ajwi lyako bantu balatija, nonyamuka, misyobo yabantu ilamwaikizyanya. 4Balabunganya zisaalo mbuli bacamusokonya mbobabunganya, mbubonya mbuli cikwikwi mbocisotooka, abalo bantu mbobazivwampila. 5Mwami Leza ulalumbaizigwa, bulelo bwakwe buli koonse-koonse nguubeteka mu Ziyoni cabuluzi. 6Uyooba nentalisyo njumu kwaciindi coonse, bantu bakwe nguubapa busongo aluzibo, kulemeka Mwami Leza nciyobwedo cakwe. 7Amubone baalumi basicamba baloompolola cakulila kuti bagwasigwe, basiluumuno balalila kapati. 8Migwagwa yoonse baisiya, taakwe basilweendo baceenda mulinjiyo. Cipangano cabo bacityola, bakamboni baco basampaulwa, taakwe uucilemekwa pe. 9Bantu bamunyika balalila, bamana, Lebanoni yausa, yagunwa, Syaloni yaba mbuli Alaba nkanda. Cisi ca Basyani acilundu ca Kaameli zyakunkumuka.

Mwami Leza mbwaabacenjezya basinkondonyina

10Mwami Leza wakati, “Lino ndilaima, lino ndilalumbaizigwa, lino ndilamutondezya nguzu zyangu. 11Nzyomuyeeya azyoonse nzyomucita nzyabuyo. Muuya wangu uli mbuli mulilo uusyukuta. 12Bantu bayoopya kusikila bakabe mbuli malambo bayootentwa mbuli ziteyo zyamamvwa mbozitentwa.” 13Nywebo nomuli kulaale amumvwe ncindacita kuno, nywebo nomuli afwiifwi amusyome kuti ndaanguzu. 14Basizibi mu Ziyoni baliyoowede, balakankama aabo batalemeki Leza. “Nguni akati kesu uukonzya kukkala amulilo uusyukuta? Nguni akati kesu uukonzya kukkala amulilo uuyaka lyoonse?” 15Ngooyo weenda cakululama akucita zilondokede, ooyo uukaka mpindu iizwida mukulida bantu, uutayandi kutambula masinkamulomo, ooyo uutavwelani abaabo bakanza kujaya bantu, uutayandi kubona bubi ameso aakwe pe. 16Ngomuntu ooyo uuyookkala mujulu, uuli aacitijilo ciyumu mbuli cilundu. Unooyoopegwa zyakulya, maanzi taakamumanini pe.

Mazuba aaboola

17Muyoobona mwami mubulemu bwakwe alimwi muyoobona nyika iibambasede kulaale. 18Muyootungumana akuyeeya ziyoosya eezyo nzimwakabona muyooti, “Ino uli kuli silutwe uulya? Ino uli kuli uulya wakali kutezya? Ino uli kuli mupati wamaanda aakusompelela?” 19Bantu basikantu-kantu tamukababoni limbi, aabo bali aamwaambo muyumu, baamba cisyobo cimbi-cimbi ncomutakonzyi kumvwa. 20Amulange ku Ziyoni munzi motulida mapobwe. Nyoonse mulabona munzi wa Jelusalemu uuli aabukkalo bubotu. Muli nguwo muli tente litakooyoogwisigwa, nembe zyalyo tazikoojugwa, niiba ntambo yakupimya tiikakosoki. 21Ooko Mwami Leza wesu mubulemu bwakwe uyootugwasya. Buyooba busena buli mbuli milonga iikwakwabukide atulonga. Ooko mato mapati amaniini taakaindi. 22Mwami Leza wesu mmubetesi, Mwami Leza wesu nguutulailila, Mwami Leza ngo Mwami wesu, ngonguwe uuyootuvuna. 23Ntambo zyamato aabasinkondoma zyatebunuka, musemo wabwato tuuciimvwi, tabakakonzyi kukwapamika masani aakubweenzya. Nkabela nzibasaala zinji ziyooabanwa, abalo balemu bayoobweza zimwi. 24Taakwe naba omwe uukkala mu Ziyoni uuyooti, “Ndaciswa.” Zinyonyoono zyabaabo bakkala kooko ziyoolekelelwa.

Currently Selected:

Izaya 33: Tonga96

Highlight

Copy