Izaya 34

Leza mbwayoosubula basinkondonyina

1Amuboole aafwiifwi nywebo nobantu bamasi oonse muswiilile! Amuteye matwi muswiilile nywebo nobantu. Nyika aimvwe azyoonse zili mulinjiyo, nyika yoonse mbwiizulwa azyoonse zyeendeenda mulinjiyo. 2Mwami Leza wanyemena masi oonse, ampi zyabo. Uyoobanyonyweeda limwi, uyoobaaba kuti bajaigwe. 3Beenzinyina bajaidwe basowelwa anze, mitumba yabo iyoonunka, zilundu ziyoosalala bulowa bwabo. 4Zyoonse anyenyezi zyakujulu ziyooenzemuka, julu liyoovungwa mbuli bbuku, makamu aazibala kujulu ayooloka, mbuli matu aakayuma aamusaansa, ziyooba mbuli nkuyu zinyanide. 5Mwami Leza ulilibambide kale panga lyakwe mujulu, nkabela lilayasa Baedomu, bantu aabo Leza mbaambide kuti banyonyoonwe. 6Panga lya Mwami Leza liyoobbila mubulowa liyoovumbwa amafuta aabo, mbubonya mbuli bubede bulowa amafuta aambelele aampongo zyapaizigwa, mbuli mafuta aansa zyabagutu. Mwami Leza ujisi cipaizyo ku Bozila, uyoonyonyoona bantu banji ku Edomu. 7Bantu bayoojaigwa mbuli banyati, mbuli tupoho abapoho. Nyika yabo iyoosalala malowa, lusuko luyooemeema mafuta. 8Mwami Leza ulijisi buzuba mbwayoobweedezya nkoto, mwaka ngwayoobweedezezya, kuti akavune Ziyoni. 9Milonga yamu cisi ca Edomu iyoosanduka akuba taala, bulongo bwaco buyoopya mbuli salufa. Nyika yaco yoonse inooyoopya mbuli taala. 10Inooyoopya sikati amasiku, busi bunoosuntumuka kuzwa mulinjiyo mane kukabe kutamani. Mumazyalani oonse inooli buyo tongo, taakwe muntu uutikeendeende muli njiyo alimwi pe. 11Iyooba nyika iikkala batumba anungu, masiku-siku abacikwangala, Leza uyoolandabula ceelezyo camanyongwe mulinjiyo, alimwi acipimyo calupyopyongano kubalemede bayo. 12Balemenede bayo banoonyina kabo kayooambwa kuti nkabwami oobo, bana babami boonse bayooloba. 13Mumaanda aabwami kuyoomena mamvwa munoojanwa zincenya amasonso. Bamwaaba abatumba mobanooyookkala. 14Banyama bamunkanda banooswaangana abasuntwe, njeleele kaziitana, mazimumwaangala nkwaanokkala ooko, ayoolijanina busena bwakulyookezezya. 15Ooko tumba uyoofuka-fuka akutula mayi, uyooakonkona, akufukatila bana bakwe munsi amababa aakwe, ooko bankompe bayoobungana umwi aumwi anseke yakwe. 16Kamuya mulange mubbuku lya Mwami Leza mubale lilati, “Taakwe wabaaba uyoofwa, taakwe noiba yomwe nseke iiyoobula mukombwe. Nkaambo lwakwe Mwami Leza nguwaamba Muuya wakwe uyoobayobolola antoomwe. 17Mwami Leza nguubaapawida nyika, janza lyakwe ndelibaabila natondezya. Bayookkala munyika eeyi mane kukabe kutamani, bayokkala oomu kwamazyalani oonse.”

Currently Selected:

Izaya 34: Tonga96

Highlight

Copy