Izaya 32

Mwami wabululami

1Amubone kuyooba mwami uuyoolela mubululami, abalo beendelezi bayooendelezya mubuluzi. 2Umwi aumwi wabo uyooba mbuli cisitilizyo caluuwo aciyusilo camvula. Bayooba mbuli tulonga twamaanzi munkanda, mbuli cimvule candomba pati mucimpayuma. 3Meso aabaabo babona, taakavululati, matwi aabaabo bamvwa ayooswiilila. 4Bantu batajati camba, bayooziba akumvwisya, basikamaama, bayoonongosola kwaamba. 5Bafuba-fuba tabaciyooambwi kuti balilemenede naluumpa taciyoolemekwi. 6Mufuba-fuba waamba zyabufuba-fuba, ncayeeya buyo nkucita zibi. Ulacita zintu zibi, ulaamba zyakubejelezya Mwami Leza. Tayandi kusanina bafwa nzala, bafwa nyota tabapi maanzi. 7Nzila zyanaluumpa nzyabubi, ulapanga nzila mbi, kuti anyonyoone bacete akubeja kwakwe, nikuba kuti zyaamba babulide zililuzi. 8Pele uulemenede uyeeya buyo zintu ziluleme, kwiindila mumilimo yakwe iiluleme ulaima nji.

Zyalubeta azyakubukulusya

9Lino nywebo nobamakaintu nomulikkalilide amunyamuke mundiswiilile, nywebo nobamatumbu amumvwe ncenjanda kwaamba! 10Mwaka waakuzinguka buniini buyo nywebo nomutakwe anzomulibilika muyookankama taakwe nsaansa nzyomuyootebula, taakwe micelo njomuyootebula. 11Amukankame nywebo nobamakaintu nomulikkalilide, amuzyangame nywebo nobamatumbu nomutakwe ncomulibilika! Amusamunune zisani, musame masaka muzibuno zyanu kutondezya kuusa. 12Amulyuume-ume acamba mukuusa akaambo kamyuunda yanu mibotu, akaambo kamisaansa yanu iizyede 13anyika yabantu bokwesu, nyika iizwide masonso aamamvwa, iiyi, amulile akaambo kamaanda oonse aakulida mapobwe amunzi ooyu walutangalo. 14Iŋanda yabwami iyoosyaala buyo mbuboobu, munzi wakuyobeka bautija. Cilundu ca Ofeli amaanda malamfu aakusompelela ayooba mena aabanyama kwalyoonse alyoonse, ooko mbongolo nkoziyoosobanina, mbelele nkoziyoocelela, 15mane kusikila tukasikilwe muuya uuzwa kujulu, nkanda yaakuba nyika yambolezi, awalo muunda wambolezi uyooba cisaka. 16Munyika yoonse bululami abuluzi buyoocitwa. 17Akaambo kakuti boonse banoocita ziluleme kuyooba luumuno akulikkalila kwalyoonse alyoonse. 18Bantu bangu bayokkala mumaanda aabo muluumuno, bayooliiba kaatakwe zibanyonganya. 19Nikuba kuti civulamabwe ciyoopwaya cisaka akumwaya munzi, 20pele nywebo muyoolelekwa, muyoosyanga mbuto zyanu munsi aatulonga toonse, ŋombe ambongolo zyanu ziyoolicelela.

Currently Selected:

Izaya 32: Tonga96

Highlight

Copy