Izaya 31

Leza uyookwabilila munzi wa Jelusalemu

1Maawe kuli baabo bainka ku Ijipiti kuti bakajane lugwasyo, aabo basyomede mabbiza, basyoma basilumamba batanta mabbiza, pele tabacebukili kuli Uusalala wa Isilayeli, nikuba kukumbila Mwami Leza kuti abagwasye. 2Nikuba boobo awalo Leza mmusongo, ulakonzya kuleta mapenzi, taleki ncakanzide kale kucita. Uyoosubula basizinyonyoono, bagwasilizya bamucita zibi. 3Baijipiti mmbantu buyo, tabali Leza pe, mabbiza aabo aalo mmubili buyo, tuuli muuya pe, Mwami Leza aakutandabika janza lyakwe basikugwasya abagwasigwa bayoowa, boonse bayooloba.

4Mboobu Mwami Leza mbwaandaambila, “Mbubonya mbuli syuumbwa mbwabuluma, syuumbwa mupati mbwavwalamina munyama, nikuba kuti nkamu yabeembezi yaitwa kuti bamutande, tayoowi kuyobeka kwabo, nikuba kukatazigwa akusoola kwabo, mbubonya oobo ambebo nde Mwami Leza Singuzuzyoonse ndiyooseluka kuti ndizoolwanine acilundu ca Ziyoni mpocili ansonje. 5Mbuli kayuni kababama atala aaciteente, awalo Mwami Leza Singuzuzyoonse uyookwabilila munzi wa Jelusalemu, uyooukwabilila akuuvuna, uyoouvumbilila akuuvuna.”

6Leza wakaamba kuti, “Nobantu ba Isilayeli, mwakandibisizya akundizangila pele amuboole kulindime.” 7Mubuzuba oobo umwi aumwi wanu uyookaka mituni yansiliva ayangolida, maanza aanu aacita zibi ngiyakapanga. 8Cisi ca Asiliya ciyoonyonyoonwa apanga pele litali lyamuntu uulya maila. Bayootija panga eelyo, bakubusi babo bayoobelesegwa mucibbalo. 9Mayubilo aabo ayoowa akaambo kakuyoowa kwabo, baakubona kuti nkondo yababbebbela basilutwe babo bayoonyongana, mbwaamba Mwami Leza, ooyo uuli aamulilo mu Ziyoni, uuli aacikko mu Jelusalemu.

Currently Selected:

Izaya 31: Tonga96

Highlight

Copy