Izaya 30
30
Taakwe Cizuminano ceelede kucitwa acisi ca Ijipiti
1“Maawe kubana bazangi, ‘mbwaamba Mwami Leza, aabo bacita zeezyo nzindatakabaambila, bapangana zizuminano nzentayandi, bailika zibi azibinyina. 2Balainka ku Ijipiti kabatabuzyi kulaya kwangu, bayandaula kugwasigwa kuli Falo kuti kabakwabilila. Bayanda kulivunina mucimvule Caijipiti. 3Pele lukwabililo lwa Falo luyoomuusya nsoni, kuvuna kwa Ijipiti kuyoomufwisya nsoni. 4Nikuba kuti balijisi balupati-pati mu Zowani, batumwa babo bakasika mu Hanesi. 5Boonse bayoousigwa nsoni, akaambo kabantu aabo batakonzyi kubagwasya, batakwe mulimo, bajazya buyo nsoni.’”
6Ngaaya makani aaamba zyabanyama bakumusanza ku Negebu. Munyika yamakatazyo akuusa, yabasyuumbwa beenze abazyazyi, yabacipile abaciduntula. Batumwa babwezede mbono zyabo amikuli yambongolo, aziyobwedo zyabo antunda zyankamela, batola kucisi ciya citaleteli mpindu. 7Batola ku Ijipiti iitakakonzyi akugwasya. Nkaako ndiita kuti Lahabu, iitalijaili kaputa.
Bantu bataswiilili
8Lino koya ulembe acilembelo, ulembe mubbuku, kuti mumazuba aaboola, bbuku liyooba kamboni uutamani. 9Bantu aaba mbazangi, mbalucengo, batayandi kuswiilila malailile aa Mwami Leza. 10Baambile balangi kuti mutanoociboni limbi zilengaano kubasinsimi balati, “Mutanootulwiidi zilengaano ziluleme pe. Kamunga kamutwaambila nzetuyanda zilikke. Kamusinsima zitali nzizyo. 11Amuzwe munzila muleye, amuleke kutwaambila zya Uusalala wa Isilayeli.”
12Nkaako mboobu mbwaamba ooyo Uusalala wa Isilayeli, “Akaambo kakuti mwakaka mulumbe ooyu, musyomede zyakudyamininwa akusyoma zyalucengo, 13cibi eeci cilamubeda mbuli bwaanda bulamfu bwaŋanzi, bufwambaana kukolomoka akuwida ansi. 14Muyoopwaika-pwaika mbuli cibiya cabulongo, muyoopwaika cakweetezya, cakuti aakati katubeela-beela taakwe komwe kayooyeeyegwa, nokaba kakuyokolweda mililo, naa kutesya maanzi mucitelekezyo.”
15Lino mboobu Mwami Leza, Uusalala wa Isilayeli mbwaamba ulati, “Amuboole kulindime mundisyome, ndendilyo nomuyooba aanguzu akulikkalila. Nikuba boobo nywebo mulakaka.” 16Mwakati, “Peepe, tuyootija amabbiza eesu, nkaako muyootija ncobeni!” Mwakati, “Tuyootanta mabbiza aazuza.” Pele aabo bamutandaanya banooyoozuzisya. 17Bali cuulu bayootija muntu omwe aakubakonga, naa bosanwe bamukonga nyoonse muyoolilimuka, mane kusikila mukasyaale mbuli cisamu candembela ciimvwi atala aacilundu. 18Nikuba boobo Mwami Leza uyandisya kumubeda aaluse nywebo ulamweengelela lyoonse. Nkaambo Mwami Leza ngu Leza wabululami, Balilelekedwe balangila mulinguwe.
Leza uyooleleka bantu bakwe
19Nywebo nobantu bamu Ziyoni bakkala mumunzi wa Jelusalemu tamuciyoolili limbi pe. Mwami Leza uyoomubeda aaluse mwaakumulilila kuti amugwasye! Mbwatikamvwide buyo uyoomuvuwa. 20Mwami Leza uyoolekela kuti mukajane buyumu-yumu, pele walo mwini uyoomwiisya, tamukamuyandauli buya pe. 21Nikuba kuti mukaleye munzila yanu, muyoomvwa jwi lyakwe kaliti, “Eeyi njenzila, amweende mulinjiyo.” 22Eelyo muyoosampaula mituni yanu yakazilululwa ansiliva, zikozyanyo zyakazilululwa angolida. Muyoozisowa mbuli zintu zisampukide, muyooti, “Nsiciyandi akumubona kamuzwa.” 23Eelyo mwaakusyanga, Mwami Leza uyoomutumina mvula, zilyo ziyoomena zinooli zinji, ceyo cini. Mubuzuba oobo ŋombe zyanu ziyoocelela mumacelelo mapati. 24Basune ambongolo zilima ziyoolya bwizu bulibedelede amasenga, zilyo eezi ziyoovwelenganyizigwa mukubelesya mafoloko amafocolo. 25Mubuzuba basinkondonyoko mbomuyoobajaya, maanda malamfu aakuwa, maanzi ayookunka kuzwa muzilundu zilamfu, amutulundu toonse. 26Mwezi uyoobala mbuli zuba mumunzi, uyoosensela kwaziindi zili ciloba, uuyooba mbuli mumuni wamazuba aabalisya aali ciloba. Mubuzuba Mwami Leza mbwayooanga zicuzu zyabantu bakwe akuponya zilonda eezyo nzyaakabacisa.
Leza uyoosubula cisi ca Asiliya
27Amubone zina lya Mwami Leza lyazwida kulaale, lyuuntumuka busi butondezya kunyema kwakwe. Milimo yakwe njabukali, mulaka wakwe mulilo uusyukuta. 28Kuyoya kwakwe kuli mbuli fwipi-fwipi lyamaanzi aabbizya. Ulatenkaanya nyika akwiinyonyoona, ulalesya makanze aabo. 29Nywebo muyooimba mbuli mubuzuba lisekelelwa pobwe. Myoyo iiyosekelela mbuli mubuzuba bantu nobaya kucilundu ca Mwami Leza mwaala wa Isilayeli kabaya busiba amitetele. 30Mwami Leza uyoolekela muntu umwi aumwi kuti amvwe jwi lyakwe, mukukalala. Kuyooba kuvwilima kwamulilo amabbalu-bbalu, civulamabwe amvula yamuyoba. 31Baasiliya bayooyoowa baakumvwa jwi lya Mwami Leza, aakubauma amusako wakwe. 32Lino Mwami Leza aakubauma, bantu bakwe banooyoogamide kwiimba nyimbo zyansakalala atulumbu. Leza lwakwe mwini nguuyoolwana Baasiliya. 33Kaindi-kaindi kwakabambwa kalambwe kamulilo ooko kuyooba mulilo kuti ukatente muleli mupati waku Asiliya. Munji ulabbilwa ulundikidwe dwi lyankuni. Mwami Leza nguuyooufulida kuti ukavutuke, zikayake nkuni zyawo.
Currently Selected:
Izaya 30: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
