Izaya 3

Mapenzi aaboolela Jelusalemu a Juda

1Amubone! Lino Mwami Leza, wamakamu Singuzuzyoonse, Mwami Leza Singuzuzyoonse, uyanda kuleka kugwasya munzi wa Jelusalemu acisi ca Juda. Uyanda kuleka kubapa zyoonse nzibatunzya. Ulaleka kubapa zili zyoonse kubikkilizya amaanzi. 2Tacigwasyi basinguzu nobaba basilumamba, babetesi, basinsimi, basimaloto, abapati-pati, 3balailili, basibuuya mukubeza, abacenjede muli zyabwaanga. 4Basimoonzanyenze mbabayoosolwedela, balombe mbabayoobeendelezya. 5Bantu banooyoodyamininana, muntu amuntunyina, babambene ambobabambene limwi. Bakubusi bayoobukila bacembeede, bacoobbwani bayoobukila balemenede. 6Ncobeni ciyoosika ciindi bantu bamukwasyi omwe nibayooambilana kuti, “Yebo mukwesu ulijisi cisani cakuti ulalibonya-bonya koba musololi wesu muciindi cino camapenzi.” 7Pele walo ooyu uyooingula kuti, “Pe, basa, mebo nsijisi cakumugwasya, nsijisi zyakulya niziba zisani, nkaako ntabi musololi wabantu aaba pe.” 8Kasimpe Jelusalemu watenkaana, cisi ca Juda cawa, nzyobaamba anzyobacita Mwami Leza taziyandi, zisampaula bulemu bwakwe. 9Lusalululo lwabo lulalitondezya. Balabisya mbuli bwakacita baku Sodomu. Balacita zibi antangalala tabalisendi pe, maawe kuli mbabo! Balinyonyoona beni.

10Amwaambile baluleme kuti zintu ziyoobeendela kabotu. Bayookkomana akaambo kamilimo yabo mibotu. 11Pele maawe kuli basizibi! Bayoonyonyoonwa. Bayoobweedezelwa eezyo nzibakacita beni. 12Bakubusi badyaminina bantu bangu, bakaintu baba mbabalela. Nywebo nobantu bangu, basololi banu bamutozya kumbi, bamunyona munzila iiluzi.

Mwami Leza wababeteka bantu bakwe

13Lino Mwami Leza wakkala acuuno cakwe calubeta, wanyamuka kuti abeteke bantu bakwe. 14Mwami Leza waita bapati abasololi babantu bakwe kuti ababeteke ulati, “Ndinywe mwatola myuunda yangu yamisaansa, maanda aanu azwide nzimwakanyanga bacete. 15Ino ndinywe bani kuti kamudyaminina bantu bangu, akwaabonena abacete? Mbwaamba Mwami, Mwami Leza Singuzuzyoonse.”

Kucenjezegwa kwabakaintu bamu Jelusalemu

16Mwami Leza ulati, “Amulange kulisumpula kwabakaintu bamu Ziyoni mbokubede! Banongomeka nsingo ameso aaongelezya. Balanankaila kweenda akucokozya nkaya kumaulu. 17Nkaako Mwami Leza uyoosubula bakaintu bamu Ziyoni azilonda ziyoobakkala akatwikkilo, mitwe yabo iyookuluka.” 18Mubuzuba oobo Mwami uyoobanyanga zyakulisakatizya, mbuli nkaya, misini, tuwenge, 19ankaya zyakumaboko. Uyootola zisani nzyobalivumba kumeso 20zingundu, mifuko, mpimpi, 21nweenwe, tusita, 22zisani zyabo zyoonse zyandeketela, majansi, zibaki zilamfu, ankomo. 23Masani mateteete, atutambala twamumaanza, cakulivumba kumeso, aciduku.

24Mucilawo cakununkilila nsende banoonunka nkasaalo, mucilawo calutambo bayoosama mincinda, mucilawo camasusu mabotu bayoocudauka, mucilawo cazisani zibotu bayoosama madelu-delu. Mucilawo cabweebesi bayoousigwa nsoni.

25Baalumi bamumunzi nobaba basinguzu bayoojaigwa munkondo. 26Aboobo amilyango yamunzi ooyo kuyooba kulila kupati. Munzi ooyu uyooba mbuli mukaintu wafwidwa uulikankata.

Currently Selected:

Izaya 3: Tonga96

Highlight

Copy