Izaya 21

Cilengaano cakuwa kwamunzi wa Babuloni

1Ngaaya makani aaamba zyankanda iili kumbali aalwizi. Mbubonya mbuli kambizi mbokafwempula mane kusikila kunyika yakumusanza, awalo sikusaala wazwida kunkanda, wazwida kunyika iiyoosya mbwaticite. 2Ndakabonesegwa cilengaano cikatazya, sikwaaba ulaaba, sikubweza ulabweza. Elamu kolwana, Mediya kosinkilizya! Njoomanizya mapenzi oonse aakaletwa a Babuloni. 3Akaambo kaceeci mubili wangu ulacisa kapati, ndijiswi nsungo zili mbuli zyamukaintu uuyanda kutumbuka, ndakatazigwa azeezyo nzemvwide, ndapenga azeezyo nzyebona. 4Ndazingwa mumoyo, akaambo kakuyoowa ndakankama, lubundu-bundu ndundali kusukamina, lwandiletela kuyoowa. 5Babamba matebule bayala masani, balya, banywa! Amunyamuke nywebo nobalupati-pati, amunanike ntobo zyanu! 6Mboobu mbwandaambila Mwami Leza, “Koya ukabikke mulindizi, kwamana azooambe eezyo nzyaabona. 7Abona baalumi bobilo-bobilo umwi aumwi katantide ambongolo ankamela, weelede kuti abalangisisye.” 8Mpawo mulindizi wakoompolola wati, “Buzuba abuzuba simalelo wangu, ndaima aŋanda ndamfu yakusompelela, busiku abusiku, ndalindilila.” 9Cakufwambaana ndabona baalumi bobilo-bobilo kabatantide amabbiza. Mulindizi wakaambilizya kuti, “Munzi wa Babuloni wawa, munzi wa Babuloni wawa. Mituni yoonse njibali kukomba yapwaika ansi.” 10Nobantu bangu Baisilayeli, mwapolwa mbuli maila aacuumino, pele ndamwaambila eezyo nzindamvwa kuzwa ku Mwami Leza Singuzuzyoonse, kuzwa kuli Leza wa Isilayeli.

Makani aaamba zyacisi ca Edomu

11Ngaaya makani aaamba zyacisi ca Edomu. Umwi muntu ulandiita kuzwa ku Siiya ulati, “Omulindizi ino busiku butene aali? Omulindizi ino busiku butene aali?” 12Mulindizi wakaingula kuti, “Buyanda kuca, nikuba boobo masiku alaboola alimwi! Naa kuti uciyanda kubuzya alimwi, uboole uzoobuzye.”

Makani aaamba zyacisi ca Alabiya

13Ngaaya makani aaamba zyacisi ca Alabiya. Nywebo Nobadedani basinyendo nomuyaka zivuka muzyoonde zyamu Alabiya, 14amubaletele maanzi bafwide nyota amusanine batija, nobantu bamucisi ca Tema. 15Nkaambo batija mapanga, mapanga aasomwedwe, mata aabambilidwe kufusa, akubbebba kwankondo.

16Mboobu mbwaandaambila Mwami, “Mumwaka omwe, mbuli mbwaamba sikubeleka, bulemu boonse bwamu Keda buyoomana. 17Basimata aabo batikasyaale, basilumamba bamu Keda banooli bace.” Mwami Leza, Leza wa Isilayeli nguwaamba.

Currently Selected:

Izaya 21: Tonga96

Highlight

Copy