Izaya 22

Makani aaamba zyamunzi wa Jelusalemu

1Ngaaya makani aaamba zya kkuti lya cilengaano, ino ono ncinzi camupenzya cakuti nyoonse mwatalika kutanta atala aanduli. 2Yebo omunzi oozwide manyongwe, yebo omunzi wamazwanga akupampana? Aabo bakajaigwa tiibafwida munkondo pe. 3Basololi bako boonse batijila antoomwe, bajatwa kakunyina kulivuna. Boonse aabo bakajatwa bakatolwa mubwaange, mukuti bakatija basinkondonyina kulaale. 4Nkaako ndakati, “Amundileke, ndilile kapati, mutanduumbulizyi, akaambo kakunyonyoonwa kwabantu bokwesu.” 5Mwami, Mwami Leza Singuzuzyoonse, uyooleta buzuba bwamanyongwe bwakulyataukwa, akuyoowa mukkuti lyacilengaano, buzuba bwakupwayaula bwaanda bwamunzi, akulila muzilundu. 6Baelamu babweza mikutu, basinkalaki amabbiza. Bakii bagwisya ntobo mucikutu cayo. 7Makkuti ngoyandisya azwide nkalaki zyalo, basimabbiza balalindilila mumilyango yamunzi, 8zikwabilizyo zyamu Juda zyakawida ansi. Mubuzuba oobu wakalanga kuzisaka kuyobwedwe zilwanyo zyaŋanda yabwami, 9eelyo wakabona kuti bwaanda bwamunzi wa Devedi bwakali azibbanga-zibbanga, mpawo wakasinkula maanzi kuziba lyakunsi. 10Wakabala maanda aamu Jelusalemu, amane wakaamwaya kuti asinke-sinke bwaanda. 11Wakayaka ciziba akati kamalambo obilo abwaanda kuti kacijata maanzi aazwa kuziba lyakale-kale, pele tiimwacebukila kuli yooyo wakalipanga, nikuba kumulemeka ooyo wakapa muzeezo wambolyeelede kuba. 12Mwami, Mwami Leza Singuzuzyoonse, wakamwiita buzuba buya kuti mulile, mweeme mulijwe masusu, musame masaka. 13Pele ono bona, kuli kusekelela akukondwa kujaya ŋombe ambelele, mwiide kulya nyama akunywa waini, mulati, “Atulye, tunywe nkaambo junza tulafwa.” 14Mwami Leza Singuzuzyoonse wakandiyubunwida makani aaya aakuti, cinyonyoono canu eeci tacikoolekelelwa pe. “Mane kusikila mukafwe.” Mbwaamba Mwami Leza Singuzuzyoonse.

Mbwaakacenjezegwa Syebina

15Mboobu mbwaamba Mwami Leza Singuzuzyoonse ulati, “Koya kuli yooyo mubanzi wamali, kuli Syebina mupati waŋanda yabwami. 16Ino ucita nzi kuno alimwi nguni wakuzumizya kuti uliside cuumbwe kuno? Nguni wakakuzumizya kuti ulikolwede cuumbwe mundomba, akukwezulula moyoolala mumwaala?

17“Kocenjela, Mwami Leza uyanda kuti akujate akusowele kulaale, yebo omuntu sintanze. 18Uyookuvunga mane ukabe mbuli kabbudu akukusowela munyika mpati. Ooko uyoofwa, nkabela ankalaki zyako nkoziyoosyaala, yebo oosesemya kuli simalelo wako! 19Ndakutanda amulimo wako, ndakwaatula aabusena bwako.”

20Mubuzuba oobo ndiyooita mubelesi wangu Elikimu mwanaa Hilikiya. 21Ndiyoomusamika jansi lyako akumwaanga lutambo lwako mucibuno akumupa bweendelezi bwako. Nguunooyoolela baabo bakkala mu Jelusalemu balunyungu lwa Juda. 22Ndiyoomupa makkii aaŋanda ya Devedi, eeco ncatikajalule taakwe uuyoocijala, eeco ncatikajale taakwe uuyoocijula. 23Ndiyoomukkazikizya kuti akajate mbuli nembe mubusena bwakwe nkabela uyooletela mukwasyi wakwe bulemu. 24Bulemu bwamukwasyi wakwe boonse bunooli alinguwe, kubikkilizya abwanzubo zyakwe. Boonse banooyeeme alinguwe mbuli mitiba miniini mbwiibikkwa akasanza.

25“Mubuzuba oobo,” mbwaamba Mwami Leza Singuzuzyoonse, “Nkanka iikankamidwe kapati iyoozungaana, iyoozyulwa akuwa ansi, eezyo zibiya zibikkidwe alinjiyo ziyoowa,” Mwami Leza nguwaamba.

Currently Selected:

Izaya 22: Tonga96

Highlight

Copy