Izaya 15

Leza uyoonyonyoona cisi ca Mowabu

1Ngaaya makani aacisi ca Mowabu. Akaambo kakuti munzi wa Aa wazundwa mubuzuba bomwe buyo cisi ca Mowabu coolwa, canyonyoonwa mubusiku bomwe buyo! Kii mu Mowabu woolwa, wanyonyoonwa mubusiku bomwe buyo! 2Baku Diboni bainka kucikombelo cabo, bainka kumalende aabo kuti bakalilile nkuko. Cisi ca Mowabu cilila minzi ya Nebo a Medeba. Boonse balikulwidwe. Zilezu zyabo boonse zilinyweedwe. 3Basama masaka aakuusa mutuzila. Atala aaziluli amuzisambalilo boonse balalila, akweema. 4Baku Hesyiboni aku Eleyale baloompolola, majwi aabo alamvwigwa mane kuyoosika ku Jahazi. Nkaako basilumamba baku Mowabu baloompolola, akaambo kakuti batyompwa kapati. 5Ndililila baku Mowabu, bantu babo batija mbaabo baakusika ku Zowaa, akuyoosika ku Egilatisyelisyiya. Mane mbaabo baakusika ku Luhiti, baya bulila. Mumugwagwa uuya ku Holonaimu baya bweema akaambo kakunyonyoonwa kwabo. 6Kalonga ka Nimulimu kakayuminina, abwizu bwamumbali lyako bwakayuma, taacikwe amani. Taakwe abwizu butete busyeede pe. 7Aboobo lubono oolo ndubakajisi akuluyobola, bayoosola kuluzubusya kukalonga kamikumbuzu. 8Majwi aakulila kwabo alayooma kuminyinza ya Mowabu, kweema kwabo kulalimvwisya aku Egilaimu. Kulila kwakulyeetezya kwabo kulalimvwisya ku Biyaelimu. 9Maanzi aaku Dimoni azwide bulowa, nikuba boobo baku Dimoni ndicibabikkide cimbi ciinda ceeci, syuumbwa uyoovwaampila baku Mowabu batijide, aabo basyeede mucisi eeci.

Currently Selected:

Izaya 15: Tonga96

Highlight

Copy