Izaya 14

Kuboola kwa Baisilayeli kuzwa mubuzike

1Mwami Leza uyooetelela Jakobo, uyoosala Baisilayeli alimwi akubaboozya kuti bakkale munyika yabo. Bazwakule bayooboola kulimbabo kuti bazookkale abalunyungu lwa Jakobo. 2Bamasi bayoogwasya Baisilayeli kuti bakajokele kucisi eeco Mwami Leza ncaakabapa. Nkabela ooko bamisyobo iimbi bayooba bazike baba Isilayeli. Baisilayeli bayoocita bamisyobo iimbi baalumi abakaintu kuti bakabe babelesi babo munyika eeyo Mwami Leza njaakabapa. Bayoocita babaya bakabatolede kuti babe baange babo, bayoolela bakali kubadyaminina.

Mwami wa Babuloni waba mucikkalilo cabafu

3Mubuzuba oobo Mwami Leza mbwayoomwaangununa kuzwa mumacise, mumapenzi, amubuzike bwaluciso, 4mukasabwide mwami waku Babuloni mukati, “Ngooyo sikudyaminina awalo sunu bwamweelela, ani bukali bwakwe buli kuli! 5Mwami Leza watyoloola musako wasizibi, nkoli yabeendelezi, 6eeyo njaakali kuumya bantu cakutaleka mubukali bwakwe, mubukali wakazunda masi manji kaapenzya lyoonse. 7Ngaaya masi oonse ono aliiba ali muluumuno alaimba cakukondwa. 8Noiba mipulanga amilombe yaku Lebanoni, ilakulumbaizya ilati, ‘Akaambo kakuti wali kutupenzya wawa, takucikwe muntu uuzooboola kututema pe.’ 9Cikkalilo cabafu kunsi cizengema buya kulibambilila kututambula. Cibusya balya nsozi, kuti bakujuzye. Boonse aabo bakali basololi munyika, cabaimika kuzwa azyuuno zyabo zyabwami, boonse aabo bakali bami bazisi. 10Boonse bayookwiingula, bayooti kulinduwe, ‘Bona ayebo zyakumana nguzu waba mbuli ndiswe. 11Bona bulemu bwako boonse buli mucikkalilo cabafu, ookali kwiimbilwa nyimbo zyatulumbu, ono zyuumba zili kunsi lyako, mvunyu zili kubumbilide.’” 12Ino walenguka buti ontanda yakubucedo! Wasowelwa kunsi yebo ookali koola masi! 13Wakali kuti mumoyo wako, “Ono ndatanta mujulu nkabikke cuuno cabwami bwangu nkakkale atala aanyenyezi zya Leza kujulu. Njookkazikwa acuuno cabwami bwangu, acilundu cakuswaanganina, ansonje eeni yacilundu cisalala. 14Ndatanta atala lyamakumbi, njoolicita kuti nkabe mbuli Sijulu wamajulu. 15Pele nduwe aawa waletwa mwacivumwe, kunsi kwini lyacilindi. 16Aabo bakubona bayookulangisya, bayooyeeya zyalunyonyooko lwako bayooti, ‘Mwati ooyu ngomwaalumi ooyo wakali kuzungaanya nyika akucita kuti malelo kaazyangama? 17Mwati ngonguwe wakacita kuti nyika ibe nkanda, akoola minzi yawo alimwi watakali kwaangununa baange kuti babweede kucisi cokwabo?’ 18Bami bamisyobo yoonse balazikkwa muzyuumbwe, aumwi ulaacuumbwe cakwe. 19Pele yebo tokwe acuumbwe pe, uli mbuli mutabi uutayandiki. Wazikkwa antoomwe abaabo bajaidwe, aabo bakajazigwa mapanga, aabo bazikkwa muzyuumbwe zili aamabwe atako. Mbuli mutumba uulyataulwa amaulu, 20takazikkwi ambabo, mukuti yebo wakanyonganya nyika yako, akujaya bantu bako. Lunyungu lwabasizibi talukabi alimwi. 21Amutalike ono kujaya bana bamwami ooyu, bajaigwe akaambo kazinyonyoono zyabasikale babo. Taakwe naba omwe wabo uyoolela munyika kwalyoonse, nikuba kuyaka minzi minji mulinjiyo.”

Leza mbwayoonyonyoona Babuloni

22“Njobabukila,” mbwaamba Mwami Leza Singuzuzyoonse, “Njoonyonyoona Babuloni kunyina uutikasyaale, lunyungu lwawo loonse njooluzimaanya,” mbwaamba Mwami Leza. 23“Munzi ooyu uyooba tongo, munookkala batumba, buyooba busena bwabuntolo. Njooukukula acikukuzyo calunyonyooko.” Mbwaamba Mwami Leza Singuzuzyoonse.

Leza uyoonyonyoona Baasiliya

24Mwami Leza Singuzuzyoonse wakakonkezya wakati, “Kasimpe eeco nceyeeya kucita njoocicita. Eeco ncendikanzide, njoocicita ncobeni. 25Ndiyoonyonyoona Baasiliya bali munyika yangu njoobalyatauka azilundu zyangu. Joko ndyobabikkide abantu bangu njoolityoloola, njoobagwisya mukuli ngobanyamwide. 26Aaya ngamakanze ngejisi kunyika yoonse, alyalo janza lyangu lilitandabikidwe kale kumisyobo yoonse.” 27Mwami Leza Singuzuzyoonse ulikanzide kucita eeci, ino nguni uukonzya kumucenjelela? Ulitandabikide kale janza lyakwe, nguni uukonzya kumukasya?

Leza uyoonyonyoona Bafilisiti

28Ngaaya makani aakaambilizigwa mumwaka wakafwa mwami Ahazi. 29“Nobafilisiti nyoonse mutasekeleli pe kuti musako ooyo ngumwakali kuumizigwa watyoka. Kayi kuzwa kunzoka kuyooba cipile, kuzwa kuli cipile kuyooba ciduntula. 30Mucete wabacete uyooba amacezyezyo abalo babulide bayoolyoonena. Pele lunyungu lwako njoolujazya nzala, yalo iyoonyonyoona boonse batikasyaale. 31Amulile cakoompolola, nominzi ya Bafilisiti, amubwembwe nyoonse amubone kasuko kalundumuka kunyika, ninkamu yabasilumamba basicamba. 32Ino batumwa bacisi ciya inga twabaingula buti? ‘Mwami Leza wakaimika Ziyoni kutegwa bantu bakwe bapenzegwa bakajane kwakuyubila.’”

Currently Selected:

Izaya 14: Tonga96

Highlight

Copy