Ezula 10
10
Baisilayeli mbubakatanda bamakaintu bazwamasi
1Lino Ezula kacikomba kumbele lyaŋanda ya Leza, kalila akulyaamba zibi, Baisilayeli banji bakamubunganina, baalumi, bamakaintu abana, abalo bakalila kapati. 2Mpawo Syekaniya mwanaa Jehiyeli, umwi walunyungu lwa Elamu wakati kuli Ezula, “Tiitwakasyoma kuli Leza wesu mukukwatana abamakaintu bamisyobo iituzingulukide. Nikuba boobo tucijisi lusyomo mucisi ca Isilayeli. 3Ono atupange cizuminano kumbele lya Leza wesu cakuti tulatanda bamakaintu boonse aaba abana babo, mbubonya mbuli mbooamba simalelo wangu abaabo baswiilila milawo ya Leza wesu. Atucite mbubonya mbuli bwaamba mulawo. 4Aswebo tulakugwasya mukucita boobo, utaleki pe, koba sicamba.”
5Mpoonya Ezula wakanyamuka waita bapati babapaizi, Balevi a Baisilayeli boonse kuti bakonkezye mbubonya mbuli Syekaniya mbwaakayeeya. Nkabela bakacita oobo. 6Eelyo Ezula wakazwa kumbele lyaŋanda ya Leza waya kukaanda ka Jehohanani mwana wa Eliyasyibu. Kacili kooko taakwe naakalya nikuba kunywa maanzi, nkaambo wakacili mubuumba akaambo kakutasyomeka kwabaabo bakazwa mubwaange.
7Mpoonya bakatumya mulumbe mucisi coonse ca Juda amu Jelusalemu kuti boonse bakazwa mubwaange bazoobungane ku Jelusalemu. 8Balupati-pati abapati ba Bajuda bakabaambila kuti kufumbwa ooyo uutakoosika ku Jelusalemu mumazuba otatwe uyoonyangwa lubono lwakwe loonse, kwamana walo takabalwi kuti nguumwi wabo. 9Mumazuba otatwe aayo aakaambidwe mubuzuba bwamakumi obilo bwamwezi wafuka bantu boonse bamucisi ca Juda a Benjamini bakabungana mu Jelusalemu kubbuwa lyaŋanda ya Leza. Mvula yakali kuwa kapati, lino akaambo kakuti buzuba bwakali kutontola, alimwi akaambo kamakani aakeelede kuyeeyegwa bantu bakali kukankama.
10Ezula mupaizi wakaima akubaambila kuti, “Nywebo tiimwakali kusyomeka, mwakakwata cikwate-kwate kuyungizizya kumulandu wa Baisilayeli. 11Lino amulyaambe zibi zyanu ku Mwami Leza wabasikale banu, mucite nzyayanda. Amulizandule kubantu bamuzingulukide, mutande bakaintu bazwamasi aaba.”
12Mbungano yoonse yakapozomoka yati, “Tulacita mbubonya mbuli mbooamba!” 13Pele bakaindilizya akuti, “Bona, bantu mbanji kapati alimwi mvula ilawa, tatukonzyi kwiima antangalala mbuli waano pe. Kunze aboobo, makani aaya taakonzyi kumana mubuzuba bomwe naa obilo, nkaambo tubisizye loko. 14Ino mbuti kuti balupati-pati besu bagwasya mbungano yoonse, kwamana umwi aumwi wesu uukwete muzwamasi muminzi yesu yoonse aboole kuciindi caambidwe antoomwe abapati ababetesi bamunzi wakwe. Munzila eeyi Leza inga waleka kutunyemena.” 15Taakwe naba omwe wakakaka cakaambwa ccita buyo ba Jonatani mwana wa Asaheli a Jezeiya mwanaa Tiikiva bakayumizigwa a Mesyulamu a syalibetayi Mulevi.
16Lino bakazwa mubwaange aabo bakacita mbubonya mbuli bwakaambwa. Ezula mupaizi wakasala baalumi bakali basololi bamikwasyi muziinga zyabo akubalemba mazina aabo. Mubuzuba butaanzi bwamwezi wakkumi bakatalika kuvuntauzya makani aaya. 17Nkabela mubuzuba butaanzi bwamwezi mutaanzi bakamana kuvuntauzya makani aabaalumi aabo boonse bakakwete bazwamasi.
Baalumi bakakwete bazwamasi
18Kuzwa kulunyungu lwabapaizi, mbaaba aabo bakakwete bazwamasi. Kulunyungu lwa Jesyuwa mwanaa Jozadaki abanyina mbaa: Maseiya, Eliyezaa, Jalibu a Gedaliya. 19Boonse aaba bakazumina kutanda bamakaintu babo, pele akaambo kamulandu ooyu, omwe-omwe wabo wakapa mugutu kuti cibe cipaizyo cakukombelezezya mulandu. 20Kulunyungu lwa Ima mbaa: Hanani a Zebadiya. 21Lwa Halimu mbaa: Maseiya, Elija, Syemaiya, Jehiyeli a Uziya. 22Lwa Pasyuu mbaa: Eliyanayi, Maseiya, Isyimayeli, Netaneli, Jozabadi a Elasa.
23Kuzwa ku Balevi mbaa: Jozabadi, Syimeyi, Kelaiya uuli ngo Kelita, Petahiya, Juda a Eliyezaa.
24Kuzwa kubaimbi ngu Eliyasyibu. Kuzwa kubalindizi bamilyango mbaa: Syalumu, Telemu a Uli.
25Kuzwa ku Baisilayeli bamwi balunyungu lwa Palosyi mbaa: Lamiya, Iziya, Malikija, Mijamini, Eliyazaa, Hasyabiya a Benaiya. 26Lwa Elamu mbaa: Mataniya, Zekaliya, Jehiyeli, Abudi, Jelemoti a Elija. 27Lwa Zatu mbaa: Eliyoyenayi, Eliyasyibu, Mataniya, Jelemoti, Zabadi a Aziza. 28Lwa Bebayi mbaa: Jehohanani, Hananiya, Zabbayi a Atilayi. 29Lwa Bani mbaa: Mesyulamu, Maluki, Adaiya, Josyubu, Syeyali a Jelemoti. 30Lwa Pahatimowabu mbaa: Adina, Kelali, Benaiya, Maseiya, Mataniya Bezaleli, Binuyi a Manase. 31Lwa Halimu mbaa: Eliyezaa, Isyija, Malikija, Syemaiya, Syimiyoni, 32Benjamini, Maluki a Syemaliya. 33Lwa Hasyumu mbaa: Matenayi, Matata, Zabadi, Elifeleti, Jelemayi, Manase a Syimeyi. 34Lwa Bani mbaa: Maadayi, Amulamu, Uyeli, 35Benaiya, Bedeiya, Keluhi, 36Vaniya, Melemoti, Eliyasyibu 37Mataniya, Matenayi a Jaasu. 38Lwa Binuyi mbaa: Syimeyi, 39Syelemiya, Natani, Adaiya, 40Makinadebayi, Syesyayi, Syalayi, 41Azaleli, Syelemiya, Syemaliya, 42Syalumu, Amaliya a Josefa. 43Lwa Nebo mbaa: Jeiyeli, Matitiya Zabadi, Zebina, Jadayi, Joweli a Benaiya.
44Baalumi boonse aaba bakakwete bazwamasi. Bakabatanda antoomwe abana babo, nkaambo bamwi babo bakazyede bana.
Currently Selected:
Ezula 10: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
