Esita 4
4
Modekayi mbwaakakumbila Esita kuti agwasye
1Lino ciindi Modekayi naakaziba cakali kucitika, wakazapula zisani zyakwe wasama masaka akulibikka twe mukuusa. Eelyo wakeenda kukosola munzi, kayabulila kapati cakupozomoka, 2waakusika kumulyango wamwami. Taakanjilide mukati pe, nkaambo takunjili uusamide masaka. 3Muzisi zyabulelo oomo mwakasika kwaambilizya kwamakani aayo aakazwa kumuleli, kwakali koomoka akati ka Bajuda, kuliimya kulya, akulila kapati, bunji bwabo bakasama masaka akulibbunta mutwe.
4Lino basimbi babelekela Esita abazibe nibakamwaambila zya Modekayi, Esita wakapenga kapati mumoyo. Wakamutumina zisani kuti Modekayi agwisye masaka aayo ngaakasamide, pele walo wakakaka. 5Mpoonya Esita wakaita umwi wabazibe uutegwa Hataki, wakamwaambila kuti ainke kuli Modekayi akuyoomubuzya kuti naa ninzi cimukatazizye. 6Hataki wakainka kuli Modekayi mubbuwa lyamunzi lili kumbele lyamulyango wamwami. 7Nkabela Modekayi wakamwaambila zyoonse zyakacitika, azyamali manji aayo Hamani ngaakasyomezezye kuyoobikka muciyobwedo kuti naa Bajuda boonse bajaigwa. 8Wakapa Hataki lugwalo oolo lwakazwa kumuleli lwakali kwaambilizya makani aakunyonyoona Bajuda lwakalembelwa mu Susa. Modekayi wakamukumbila kuti atole lugwalo oolo kuli Esita, akuti akamupandulwide kabotu-kabotu mbuli mbozibede zintu, akuyoomwaambila kuti akaye kumuleli akumukumbila kuti abafwide luzyalo bantu bamusyobo wa Esita. 9Hataki wakakucita ooku, 10mpoonya Esita wakamulailila kuti akaambile Modekayi kuti, 11“Balupati-pati boonse bamuleli abantu boonse bazisi zyamuleli balizi kuti mwaalumi naba mukaintu uunjila mulubuwa lwamukati katatambidwe, kuli mulawo omwe buyo, weelede kujaigwa. Mbociyoocitika kuli yooyo uunjila, ccita buyo kuti muleli wamutondeka ankoli yabwami yangolida, kuti atajaigwi. Ono kwainda mazuba aali makumi otatwe muleli katandiiti.”
12Modekayi naakamvwa cakaamba Esita, 13wakamucenjezya kuti, “Utayeeyi kuti nkaambo kakuti uli muŋanda yabulelo, yebo olikke akati ka Bajudanyoko uyoosyaala. 14Kuti naa koumwine buyo muciindi eeci cili boobu, Bajuda bayoogwasigwa akuvunwa kuzwa kubusena bumwi, pele yebo abamukwasyi wauso muyooloba. Ino nguni uuzi ambweni ncookasalilwa kuba mwami mukaintu nkuti ukakonzye kugwasya bantu bokwanu muciindi cili boobu!”
15Mpawo Esita wakatumina Modekayi makani aaya, 16“Koya ukabunganye Bajuda boonse bali mu Susa, mukaliimye kulya, akundiyeeya. Mutakalyi nikuba kunywa kwamazuba otatwe amasiku aawo. Ambebo ababelesi bangu basimbi tulaliimya kulya mbubonya buyo. Kuzwa waawo ndiyooinka kumuleli, nikuba kuti cilatondwa. Kuti naa ndiyoofwa akaambo kakucita oobo, andikafwe buyo.”
17Mpoonya Modekayi wakainka akuyoocita zyoonse eezyo nzyaakamulailila Esita.
Currently Selected:
Esita 4: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
