Esita 5
5
Esita mbwaakatamba muleli a Hamani kupobwe
1Mubuzuba bwatatu bwakuliimya kulya, Esita wakasama jansi lyakwe lyabwami, wainka akuyooima mubbuwa lyamukati lyakuŋanda yabwami, kulangana aŋanda iikkalila muleli. Awalo muleli wakalimo mukati kakkede acuuno cakwe kalangide kumanjililo. 2Naakabona Esita kaimvwi anze, wakakondwa, aboobo wakanyamuna musako wakwe wangolida wamutondeka. Mpoonya aawo Esita wakainka waakuguma mpela yawo. 3Mpawo muleli wakamubuzya kuti, “Ino ncinzi ncoyanda Esita? Ndaambila ndilakupa, nikuba kuti ukumbile cisela cabulelo bwangu inga ndakupa.”
4Esita wakaingula kuti, “Kuti kacikonzeka, omuleli uulemekwa, ndali kuti yebo a Hamani muboole sunu masiku kupobwe ndendamubambila.”
5Mpoonya muleli wakalailila kuti Hamani aboole cakufwambaana kuti bazooinke kupobwe lya Esita. Eelyo muleli a Hamani bakainka kupobwe lya Esita.
6Lino nibakali kunywa waini muleli wakabuzya Esita kuti, “Kondaambila ncoyanda ndilakupa, nikuba kuti ukumbile cisela cabulelo bwangu.”
7Esita wakaingula kuti, 8“Kuti omuleli uulemekwa koboteledwe andime alimwi koyanda kundipa ncindakumbila ndali kuyeeya kuti yebo a Hamani mukaboole kupobwe ndindamubambila juunza. Ndendilyo nenzookwaambila ncendiyanda.”
Hamani ukanza kujaya Modekayi
9Naakamana kulya pobwe, Hamani wakaliboteledwe. Pele naakabona Modekayi amulyango waŋanda yabwami akuti Modekayi taakaima nikuba kumulemeka munzila imwi, Hamani wakanyema kapati. 10Pele wakalijata, wainka kuŋanda yakwe. Ooko wakaakutamba beenzinyina, akwaambila mukaintu wakwe Zelesyi kuti abe aambabo. 11Wakatalika kulikankaizya azyabana banji mbaakajisi, ambuli muleli mbwaakamusumpula alimwi ambwaakali aampuwo kwiinda balupati-pati bamuleli bamwi. 12Hamani wakati, “Kunze aboobo mwami mukaintu Esita wabamba pobwe lyamuleli andime tolikke alimwi ajuunza tuyooinka kuli limbi. 13Pele zyoonse eezi taakwe ncozyaamba kulindime, nkaambo uulya Mujuda Modekayi nguucikkala kumanjililo aaŋanda yabwami.”
14Mukaintu wakwe Zelesyi abeenzinyina Hamani bakati, “Simpa zisamu zilampa tukokola tuli makumi osanwe ukamwaambile muleli cifumo-fumo kuti Modekayi aangililwe alinzizyo. Waakumana ukainke amuleli kupobwe koboteledwe.”
Kulailila ooku kwakabotela Hamani. Wakasimpa zisamu eezyo.
Currently Selected:
Esita 5: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
