Mukambausi 5

Kuyoowa Leza

1Libambile kabotu ciindi noinka kuŋanda ya Leza. Koya ukkale afwiifwi uswiilile kabotu kwiinda kupa cipaizyo cabafuba-fuba aabo batazi kuti balabisya. 2Utafwambaani kwaamba, utagubili mukwaamba cili coonse kumbele lya Leza. Nkaambo uli kujulu, yebo uli aansi, nkaako majwi aako aaceye.

3Mbuli kuyabwa-yabwa mbokuboola akaambo kakulibilika, muntu mufuba-fuba mbwaamba ciindi najisi majwi manji aakwaamba.

4Kuti wakonkezya kuli Leza utamuki kuzuzikizya cikonke cako. Tabotelelwi abafuba-fuba, weelede kuzuzikizya cikonke cako. 5Ncibotu kutakonkezya kwiinda kuti wakonkezya wamana tozuzikizyi cikonke cako. 6Utalilekeleli kwaamba zinga zyacita kuti ubisye. Utamukakili mutumwa wakuŋanda ya Leza akuti, “Ndakalubizya mukukonka.” Ino nkaambo nzi Leza nceelede kukunyemena akaambo kaceeci ncookaamba akuti anyonyoone milimo yako? 7Kulota-lota amajwi manji nzyabuyo, nkaambo weelede kuyoowa Leza.

Buvubi mbwabuyo

8Kuti naa wabona mucete kadyamininwa mucisi, kuti wabona kuti kuli lusalululo, tabaciti bweelede, utagambwi azintu zyamusyobo ooyo, nkaambo walupati-pati ooyo ulalangwa aumwi, boonse aaba bobilo balalangwa abamwi bapati babainda.

9Kwaba cewo awalo mwami ulajana mpindu kuzwa mumyuunda. 10Kufumbwa uuyandisya mali takwe naamuvulila. Uuyandisya lubono taakwe nakkuta aloolo ndwajana. Acalo eeci ncabuyo. 11Kuti lubono lwavula abalo balya balavula. Ino lujisi mpindu nzi kumuvubi ccita buyo kwiide kunoolulanga? 12Koona kwamubelesi nkunono nokuba kuti kulya kwakwe nkuce naa nkunji, pele lubono lwamuntu muvumbi talumoonyi ŋonzi.

13Ndakabona bubi bujazya nsoni ansi aano. Lubono lujiswi lutapinduli kuli yooyo uulujisi. 14Kuti lubono lwaloba nkubula coolwe, nkubula coolwe cakuti nikuba kuti waakuba aamwana mulombe ucinyina ancakona. 15Muntu ulazyalwa kali cintanda, mbubonya mbuli mbwaakaboola ulapilukila mbubonya. Taakwe nociba comwe ncatolelela camilimo yakwe, taakwe ncabweza. 16Alyalo eeli ndipenzi bbyaabi, muntu ulapilukila mbubonya mbwaakaza, ino ujana mpindu nzi mbokunga wali kubelekela luuwo buyo? 17Mazuba aakwe oonse nalya ngamumudima, ulityompedwe kapati, ulalipenzya mumoyo akunyema.

18Mpoonya ndakayeeya mumoyo kuti ani ncibotu kumuntu kuti alye akunywa kuti alibotezye kuzwa kumilimo yakwe iikatazya eeyo njacita ansi aano mumazuba mace aayo Leza ngamupede buumi. Nkaambo ncecaabilo cakwe. 19Aboobo ciindi Leza napa muntu buvubi alubono, namubotelezya anzizyo, kuti atambule caabilo cakwe, abotelelwe mumilimo yakwe, eeci ncipego cizwa kuli Leza. 20Ooyo muntu takonzyi kulipenzya akaambo kamazuba abuumi bwakwe, nkaambo Leza utangazya moyo wakwe lyoonse.

Currently Selected:

Mukambausi 5: Tonga96

Highlight

Copy