Mukambausi 6

1Ndakabona abumbi bubi ansi oobo bukatazya bantu. 2Leza ulapa muntu buvubi, ulamupa lubono cakuti ulalemekwa, mukuti moyo wakwe ubule ancuutongooka. Pele tamuciti kuti asekelele anzizyo, muntu uumbi buyo nguyoolulya. Acalo eeci ncabuyo, ndipenzi bbyaabi.

3Muntu ulakonzya kuba aabana bali mwaanda akuba aamyaka minji kunyina makani nikuba kuti aongole buti, kuti na takonzyi kulya eeco ncaakabelekela, akutazikkwa kabotu, ndaamba kuti cisowe ncibotu kwiinda nguwe. 4Kayi calo cilafwa kacitazi, cilapilukila mumudima. Zina lyaco lilavumbwa mumudima. 5Nikuba kuti tiicakabona zuba nikuba kuziba cintu cili coonse, pele calo cilalyookezya kwiinda muntu ooyo. 6Nikuba kuti walo wakkala kwamyaka iili cuulu. Kobilo kwiinda ncico, pele taakonzyi kulya lubono lwakwe. Sena boonse tabayi kubusena bomwe buyo?

7Milimo iili yoonse njacita muntu njakuti ajane cakulya, nikuba boobo nkosya yakwe tiimani pe. 8Ino musongo ulaacoolwe buti kwiinda mufuba-fuba? Awalo mucete ujana mpindu nzi ciindi nalilemeka kumbele lyabamwi?

9Ncibotu kulamwa aceeco ncobwene kale kwiinda kunyomenena ncotabwene. Acalo ncabuyo, cili mbuli kutandaanya luuwo.

10Kufumbwa eeco ciliwo, cakabikkidwe kale, alimwi kulizizilwe kale mbuli mbwabede muntu. Taakwe uukonzya kulwana muntu uumwiinda nguzu.

11Majwi aanyina ncaaamba, ani inga muntu amugwasya buti?

12Nguni uuzi cintu cinga cabotela muntu mumazuba mace ngapona, mazuba aabuyo aamana mbuli cinziinzimwa? Nguni uukonzya kumwaambila ciyoocitika ansi aano aakufwa?

Currently Selected:

Mukambausi 6: Tonga96

Highlight

Copy