Mukambausi 12

1Koyeeya Mulengi wako mumazuba aabukubusi bwako, notanasikilwa mazuba aamapenzi, myaka niitanasika, noyooti, “Nsicibotelwi mulinzizyo.” 2Zuba amumuni, mwezi anyenyezi nozitanasiya, makumbi naatanamwaika yamana mvula. 3Ciindi balinda ŋanda nobayookankama, baalumi basintanze nobayookotama, baziya nobayooleka akaambo kakuti mbace, aabo basondelela ampulungwido nobayoosiilwa. 4Ciindi manjililo aatuzila naayoojalwa, kuziya nokuyoomana ciindi bantu nobabuka lilila bamiteengwe, pele nyimbo zyabo ziyoobbuluka.

5Ciindi bantu nobayooyoowa majeleele, kweendeenda munzila nokuyoobija, masamu aalumondi naayoosyuuka, mpaso noziyoonyawita notaciyooziyandi limbi eezi pe. Eeci nciindi muntu nayooinka kumunzi wakwe uutamani, nayoofwa, balila nobayooide kwiima-ima mutuzila. 6Kamuyeeya, lutambo lwabuumi lwansiliva nolutanadunsuka, nokaba kabiya nokatanapwaika, citesyo nocitanapwaika, cisamu caamukalo nocitanatyoka. 7Bulongo bulapiluka kubulongonyina nkubwakazwida. Muuya ulapiluka kuli Leza wakuupa. 8“Nzyabuyo, nzyabuyo, mbwaamba Mukambausi, zintu zyoonse nzyabuyo!”

Mamanino aamakani

9Mukambausi taakali buyo musongo pe, pele wakaiisya luzibo lwakwe oolo kubantu. Wakapanga akuyandaula tusimpi tunji ooto ntwaakalemba. 10Mukambausi wakayandaula kuti ajane buyo majwi aaelede, eezyo nzyaakalemba nzizyakeelede nzizyakali zyakasimpe.

11Majwi aabasongo ali mbuli zidunsyo, twaambyo twabo tuyobwedwe tuli mbuli nembe zikankamidwe, tupedwe Mweembezi omwe. 12Mwanaangu cenjela akuzintu zimbi kunze azeezi.

Kulemba mabbuku manji takumani, kwiiya kunji kukatazya mubili, kulaminya.

13Lino mukuti zyoonse zyamvwigwa, mamanino aazintu zyoonse ngakuti, “Ulemeke Leza ubambe milawo yakwe, ooyu ngomulimo woonse uupedwe muntu. 14Leza uyoobeteka micito yoonse, kubikkilizya akali koonse kasisidwe, nikuba kuti kaili mibotu naa mibi.”

Currently Selected:

Mukambausi 12: Tonga96

Highlight

Copy