Lwiimbo lwa Solomoni 1
1
Lwiimbo lwakusaanguna
Mukaintu
1Noondimyonta caluyando,
2nkaambo luyando lwako lulasangalazya kwiinda waini.
3Bweema bwatufuta twako bulabotelezya,
zina lyako ndibotu mbuli muunde watufuta twaungulwa.
Ani ncenciceeco basimbi ncobakuyanda!
4Atutizyanye, katuya ube simalelo wangu ukandinjizye muŋanda yako.
Tulasekelela akukondwa mulinduwe,
tulalulumbaizya luyando lwako kwiinda waini. Baliluleme kukuyanda.
5Ndasiya nikuba boobo ndeebeka,
nobakaintu bamu Jelusalemu,
ndasiya mbuli matente aaku Keda,
mbuli zisitilizyo zyaŋanda ya Solomoni.
6Mutandinongi akaambo kakuti ndasiya, ndizuba lyakanditenta.
Bana bokwesu balombe bakandinyemena akundibelesya mumyuunda yamisaansa,
cakuti ndakabula ciindi cakulibamba.
7Ndaambila, O muyandwi wangu,
nkoo nkuli nkoembelela butanga bwako ankozibutya sikati?
Sena ncibotu kuti nkenjabuzenta akati kamatanga abeenzinyoko?
Mwaalumi
8Naa tozi, omukaintu ookeebelwa nzoka mubwina,
utobele mikondo yambelele ukacezye tupongo twako kumbali aazilawo zyabeembezi.
9O muyandwi wangu uli muyumu akubota mbuli bbiza mpwizi lyankalaki ya Falo.
10Masaya aako mabotu nkaambo katunkwinta-nkwinta tulengelela,
nsingo yako nimbotu nkaambo katutenta twabulungu.
11Tulakupangila tuwenge twangolida tucekawidwe nsiliva.
Mukaintu
12Mwami naakeengede atebule lyakwe wakamvwa muunde watufuta twangu.
13Muyandwi wangu undibedelede mbuli kakoto kansende kali akati kankolo zyangu.
14Muyandwi wangu undibedelede mbuli nsende zyamaluba aahena,
aazwa mumyuunda yamisaansa yaku Engedi.
Mwaalumi
15Kaka uleebeka, o muyandwi wangu, ncoebelwa nzoka mubwina,
ocitubya meso mbuli ciziba camukupa.
Mukaintu
16Ino ulimubotu, omuyandwi wangu,
ncobeni utumpusya moyo, mweemvwe mbobulo bwesu.
17Zicinda zyaŋanda yesu nzyamukamba, masomo ngamipulanga.
Currently Selected:
Lwiimbo lwa Solomoni 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
