Ciibalusyo 9

Kutasyomeka kwabantu

1“Lino amuswiilile, nywebo Nobaisilayeli. Mulaafwi kuzubuka mulonga wa Jolodani kuti mukatole nyika yamisyobo mipati iilaanguzu kwiinda ndinywe. Minzi yabo mmipati alimwi ilikwabilidwe abwaanda bulamfu busika kujulu. 2Bantu mbalamfu alimwi mbaasinguzu, mbalunyungu lwa Baanaki. Mwakalimvwida zyambabo kuti, ‘Ino nguni uukonzya kuzunda Baanaki?’ 3Sunu amuzibe kuti Mwami Leza wanu uumusolweda uli mbuli mulilo uusyukutya. Uyoobazunda kumbele lyanu. Ndendilyo nomuyoobatanda akubanyonyweeda limwi cakufwambaana, mbubonya mbuli mbwaakasyomezya Mwami Leza.

4“Lino Mwami Leza aakumana kumutandila bantu aaba, kutakabi muntu uyooti, ‘Mwami Leza wakandipa nyika iino akaambo kakuti ndimululami.’ Peepe, Mwami Leza nguwabatanda bantu aaba akaambo kakuti mbaasizibi. 5Takuli kululama naa kulondoka kwanu kuyoomutozya nyika pe. Pele nkaambo kabubi bwamisyobo eeyi Mwami Leza ncabatanda acimwi ncaabatandila ncakuti abambe cisyomezyo ncaakakonkezya kuli basikale banu ba Abulahamu, Izaka a Jakobo. 6Aboobo amuzibe kuti Mwami Leza taamupa nyika mbotu eeyi akaambo kabululami bwanu, nywebo lwanu kumugama muli basicinguni.

7“Kamuyeeya, mutalubi mbuli mbumwakanyemya Mwami Leza wanu munkanda. Mbumwakazwida buyo mu Ijipiti kusikila sunu, mwali kuzangila Mwami Leza. 8Kucilundu ca Sinai mwakanyemya Mwami Leza cakuti wakatimunyonyoone. 9Nindakatanta atala aacilundu kuti ndikatambule zilembelo zyamabwe, zilembelo zyacizuminano eeco Mwami Leza ncaakapangana andinywe, ndakakkala acilundu kwamazuba aali makumi one amasiku aawo kakunyina kulya nikuba kunywa maanzi pe. 10Mwami Leza wakandipa zilembelo zyamabwe zyobilo zyakalembedwe amunwe wakwe mwini. Ali nzizyo mpaakalembedwe milawo yoonse Mwami Leza njaakapa ciindi naakali kukanana kulindinywe kuzwa mumulilo kamubungene. 11Naakamana mazuba aayo, Mwami Leza wakandipa zilembelo zyobilo zyacizuminano.

12“Mpawo Mwami Leza wakandaambila kuti, ‘Fwambaana seluka, nkaambo bantu bako mbookagwisya mu Ijipiti babisya. Basiya nzindakabalailila, babumba mutuni.’ 13Mwami Leza wakaindilizya akuti, ‘Ndilizi kuti bantu aaba mbaasicinguni ncobeni. 14Nkoo leka ndibanyonyoonene limwi boonse mbobabede. Lino njoocita kuti yebo ube musyobo mupati uulaanguzu kwiinda mbabo.’

15“Aawo ndakapiluka ndaseluka kuzwa acilundu cakali kuyaka mulilo. Ndakalijisi azilembelo zyobilo zyamabwe. 16Nindakalanga ndakabona kuti ncobeni mwabisizya Mwami Leza wanu, mwakabumba moombe alimwi akusiya eezyo Mwami Leza nzyaakamulailila. 17Aboobo kamulangilide ndakapwaya zilembelo eezyo. 18Mpoonya ndakavuntama kumbele lya Mwami Leza kwamazuba aali makumi one amasiku aawo. Tiindakali kulya nikuba kunywa maanzi akaambo kazibi nzimwakacita zyakamunyemya. 19Ndakayoowa kapati akaambo kabukali bwa Mwami Leza. Wakalinyemede cakuti wakali kuyanda kumunyonyoona. Pele Mwami Leza wakandiswiilila ciindi eeco calo. 20Awalo Aloni wakanyemya Mwami Leza kapati cakuti Mwami Leza wakali kuyanda kumujaya, ciindi eeco ndakamukombela. 21Ndakabweza cintu ciya, coombe ncimwakabumbide ndacitenta. Mmane ndakacipwaya ndaciziya, busu bwaco ndakabusowela mukalonga kakali kukunka kuzwa mucilundu.

22“Ciindi nimwakali ku Tabela, Masaa, aku Kibulonihataava, mwakanyemya Mwami Leza mbubonya buyo. 23Mwami Leza naakamutuma ku Kadesyibaaneya wakati, ‘Kamuya mukatole nyika eeyo njindakamupa.’ Pele nywebo mwakakaka, taakwe nimwakamusyoma nikuba kumuswiilila pe. 24Kuzwa ciindi nindakamuziba lyoonse muzangila Mwami Leza.

25“Kwamazuba aayo aali makumi one amasiku aawo ndakavuntama kumbele lya Mwami Leza nkaambo wakakanzide kumunyonyoona. 26Ndakakomba ku Mwami Leza ndakati, ‘O Mwami Leza Simalelo wangu, utanyonyooni bantu bako, balo aaba mbookavuna akubagwisya mu Ijipiti anguzu zyako mpati. 27Yeeya babelesi bako ba Abulahamu, Izaka a Jakobo. Akaambo kabo lekelela basicinguni aaba bubi bwabo, alimwi acinyonyoono cabo, 28kuti ambweni Baijipiti bayooti wakacilwa kubatola munyika eeyo njaakabasyomezya. Alimwi inga bayooti wakabagwisya kuti akabajaile munkanda nkaambo ulibasulide. 29Aaba mbantu bako mbookagwisya mu Ijipiti anguzu zyako kuti babe bako.’

Currently Selected:

Ciibalusyo 9: Tonga96

Highlight

Copy

Compare