Ciibalusyo 8

Nyika mbotu njobayootola

1“Lino amucenjele mubone kuti mwatobela malailile oonse ngendimupa sunu, kutegwa mupone, muvule, akutola nyika eeyo Mwami Leza njaakakonkezya kuli basikale banu. 2Amuyeeye Mwami Leza wanu mbuli mbwaakamusolweda munkanda kwamyaka iili makumi one, kuti amubombye akumusunka kuti abone naa mwaali kukonzya kubamba milawo yakwe naa pe. 3Wakamulekelela anzala, mane wakamupa mana, cilyo nywebo nibaba basikale banu ncibatakalide pe. Wakacita eeci kuti amuzibye kuti muntu taponi acinkwa cilikke pe, pele ulapona amajwi oonse aazwa ku Mwami Leza. 4Kwamyaka eeyi iili makumi one zisani zyanu tiizyakamana alimwi tiimwakali kuzimba maulu pe. 5Amuyeeye kuti mbubonya mbuli mwaalumi mbwalaya mwanaakwe, mbubonya oobo awalo Mwami Leza ulamulaya. 6Nkaako amutobele milawo ya Mwami Leza wanu, mweende, munzila zyakwe akulemeka. 7Nkaambo Mwami Leza wanu uyoomunjizya munyika mbotu, nyika iijisi milonga atusensa, iijisi bapoompo basoomoka mumakkuti amutulundu. 8Ninyika yabulotwe amaila, nsaansa ankuyu, mapomegileneti, mafuta aaoliva abuci. 9Ninyika nkomukonzya kulya cakulilekela, kutabulwa cintu. Mabwe aamumo ndubulo, nkaako mulakonzya kusya mukuba mutulundu twayo. 10Mwaakulya cakulilekela, mukatembaule Mwami Leza wanu akaambo kanyika mbotu njaamupa.

Mbwaakabacenjezya kuti batalubi Mwami Leza

11“Lino amucenjele kuti mutalubi Mwami Leza wanu. Mutaleki kubamba milawo yakwe, amalailile aakwe alimwi ambeta zyakwe nzemupa sunu. 12Ambweni mwaakulya cakulilekela akuyaka maanda mabotu akulikkalila, 13ŋombe ambelele zyanu zyaakuvula, ngolida ansiliva alubono lwanu luli loonse lwaakuvula, 14inga mwaakulisumpula akuluba Mwami Leza wanu wakamugwisya mu Ijipiti mumwakali bazike. 15Wakamusolweda munkanda mpati iiyoosya, muciyuma-yuma mutakwe maanzi, muli buyo nzoka nkali atubanze. Nikuba boobo wakamupa maanzi kuzwa mumwaala 16amana, cilyo basikale banu ncibatakalide, kuti amubombye akumusunka kutegwa zintu zyoonse zimweendele kabotu. 17Amucenjele kuti kutabi uuti, ‘Nguzu zyangu amaanza aangu nzizyandiletela lubono loonse oolu.’ 18Pele amuzibe kuti Mwami Leza wanu nguumupa nguzu zyakujana lubono oolu, mbubwaamba cizuminano cakwe eeco ncaakakonkezya kuli basikale banu, mbokubede asunu. 19Mutakalubi Mwami Leza wanu nikuba kukomba baleza bambi naa kubamanina milimo. Kuti naa mukacite oobo, sunu ndamwaambilila limwi kuti muyoonyonyoonwa masimpe. 20Kuti naa tamuswiilili Mwami Leza wanu, anywebo muyoonyonyoonwa mbubonya mbuli misyobo iilya njaakanyonyoona kamulibwenene.

Currently Selected:

Ciibalusyo 8: Tonga96

Highlight

Copy