Ciibalusyo 10

Mozesi mbwaakatambula Milawo alimwi

(Kulonga 34.1-10)

1“Lino Mwami Leza wakandaambila kuti, ‘Beza mabwe obilo aali mbubonya mbuli aakusaanguna, wamana uboole kulindime acilundu, alimwi upange bbokesi lyamapulanga. 2Ndizoolemba alingawo majwi ngoonya aakalembedwe amabwe mataanzi ngookapwaya. Ukazibikke mubbokesi eelyo.’

3“Mpawo ndakapanga bbokesi lyamapulanga aamulombe akubeza zilembelo zyamabwe zyobilo zili mbuli zyakusaanguna, ndimane ndakatanta anzyizyo acilundu. 4Eelyo Mwami Leza wakalemba alinzizyo aayo majwi ngoonya ngaakalembede kusaanguna nkokuti milawo iili kkumi njaakamupa acilundu kuzwa mumulilo buzuba nimwakabungene. Mwami Leza wakandipa mabwe aaya, 5kumane ndakaseluka kuzwa acilundu. Mbubonya mbuli bwakandilailila Mwami Leza, ndakabikka mabwe aayo mubbokesi, oomo mwaabede. 6Baisilayeli bakalonga kuzwa kumikalo ya Bajaakani bakaya ku Mosela. Ooku nkonkuko Aloni nkwaakafwida akuzikkilwa, eelyo Eliyazaa mwanaakwe wakaba ngomupaizi mubusena bwakwe. 7Kuzwa kooko bakaya ku Gudigoda mane baakusika ku Jotibataa, cisi catulonga-longa. 8Ciindi eeco Mwami Leza wakazandula baalumi bamusyobo wa Levi kuti kababweza mbabo bbokesi lyacizuminano kuti kabamubelekela akuleleka bantu muzina lyakwe, mbobacita asunu. 9Ncenciceeco Balevi ncobatajisi caabilo noluba lukono akati ka Baisilayelinyina. Mwami Leza ndolukono lwabo, mbubonya Mwami Leza wanu mbwaakasyomezya.

10“Lino ndakalikkede acilundu kwamazuba aali makumi one amasiku aawo mbuli mbondakacitide kusaanguna. Ciindi eeci acalo Mwami Leza wakandiswiilila, aboobo taakwe naakamunyonyoona pe. 11Mpawo Mwami Leza wakandaambila kuti, ‘Nyamuka, usolwede bantu kunyika eeyi njindakonkezya kuli basikale banu.’

Leza ncayanda

12“Lino nywebo Nobaisilayeli, amuswiilile Mwami Leza wanu ncayanda. Uyanda kuti mumukombe akucita zyoonse nzyamulailila. Mweelede kumuyanda akumubelekela amyoyo yanu yoonse alimwi amyuuya yanu yoonse, 13akubamba milawo amalailile aakwe ngemupa sunu kuti zintu zimweendele kabotu.

14“Julu a julu lini, nyika azyoonse zili mumo nzya Mwami Leza wanu. 15Pele Mwami Leza wakayandisya basikale banu, ncenciceeco ncaakasala ndinywe nywebo nolunyungu lwabo kuti mube bantu bakwe mubusena bwamisyobo imwi, mbokubede asunu. 16Nkaako kuzwa sunu mube bantu basyomeka ku Mwami Leza, batali basicinguni. 17Nkaambo Leza wanu ngu Leza wiinda boonse baambwa kuti mbaaleza, Mwami wabami ngu Leza mupati, Singuzu uuyoosya, tasalululi alimwi tatambuli masinkamulomo. 18Ulakwabilila bamucaala antoomwe abamukabafu. Ulayanda bazwakule bakkala andinywe alimwi ulabapa zyakulya azisani. 19Nkaako anywebo muleelede kulela kabotu bazwa kule aabo mbuli mbomuzi kuti anywebo mwakali bazwakule mu Ijipiti. 20Amulemeke Mwami Leza wanu, mumumanine milimo. Amusyomeke akukonkezya muzina lyakwe alikke. 21Amumutembaule nkaambo ngu Leza wanu, alimwi mwakalibonena zigambya eezyo nzyaakacita. 22Basikale banu nibakainka ku Ijipiti bakali buyo makumi aali ciloba. Pele ono Mwami Leza wamuvuzya, mwaba mbuli nyenyezi.

Currently Selected:

Ciibalusyo 10: Tonga96

Highlight

Copy

Compare