Ciibalusyo 33
33
Mozesi mbwaakaleleka misyobo ya Isilayeli
1Nzeezi zileleko Mozesi muntu wa leza nzyaakapa Baisilayeli katanafwa. 2Wakati,
“Mwami Leza wakaza ku Sinai.
Wakalibonya mbuli zuba ku Edomu,
akumunikila bantu bakwe kuzwa kucilundu ca Palani.
Wakaboola azyuulu zyabasalala,
kubbazu lyalulyo lwakwe kwakali kuvwilima mulilo.
3Mwami Leza ulayanda bantu bakwe,
akubakwabilila, nkaambo mbibakwe.
Toonse tulakkala ansi aamaulu aakwe,
akutambula malailile aakwe,
4nkokuti Mulawo ooyo Mozesi ngwaakatupa,
kuti ube lukono lwa Baisilayeli.
5Ciindi Baisilayeli abasololi babo nibakabungene,
Leza wakaba ngomwami muli Jesyuluni.”
6Kuli bamusyobo wa Lubeni, Mozesi wakati,
“Musyobo wa Lubeni uupone utafwi pe,
nikuba kuti muce buti.”
7Kuli bamusyobo wa Juda wakati,
“Swiilila, O Mwami Leza,
Kulila kwamusyobo wa Juda,
baboozye akati kabana bokwabo.
Ubape nguzu zyakulivuna beni,
ubagwasye kuzwa kuli basinkondonyina.”
8Kuli bamusyobo wa Levi wakati,
“O Mwami Leza, waambe nzyoyanda mukubelesya Ulimu a Tumimu.
Kwiindila mu Balevi, babelesi bako basyomeka. Wakabasunka ku Masa,
wakabona mbuli kuti balasyomeka kumaanzi aaku Meliba.
9Bakakatila nduwe kwiinda bazyali, bana bokwabo, bana babo.
Bakaswiilila milawo yako akubamba cizuminano cako.
10Bayooiisya bantu bako kuti kababamba Mulawo wako,
bayoopa tununkilizyo azipaizyo zyakutenta acipaililo cako.
11O Mwami Leza, leleka nzyobacita.
Ubotelwe amilimo yabo njobabeleka.
Nyonyoona basinkondonyina,”
ubanyonyweede limwi, mane bamaninine.
12Kuli bamusyobo wa Benjamini wakati,
“Ooyu ngomusyobo uuyandika Mwami Leza ngwakwabilila,
buzuba boonse uluucingilila, akuba akati kawo.”
13Kuli bamusyobo wa Josefa wakati,
“Mwami Leza aleleke nyika yawo,
mukumupa mvula mbotu abuntolo.
14Nyika yawo wiileleke amicelo iibizwa kabotu, mbuuli mwaka oonse.
15Zilundu zyawo zyansiku zibe amicelo azilimwa zinji.
16Nyika yawo aipe zyoonse zibotu ziyandika,
Mwami Leza aleleke zilimumo,
ooyo wakaambaula kuzwa muciteyo civwilima mulilo.
Musyobo wa Josefa upegwe zileleko eezi,
kayi nguwakali musololi akati kababunyina.
17Josefa ulijisi nguzu
zili mbuli zyamupoho wameja aali mbuli aamunyati.
Meja aakwe ndunyungu lwa Manase luli zyuulu-zyuulu,
alwa Efulemu luli zyuulu zili kkumi.
Ameja aaya ulayasa bamasi aambi,
mane kuyoosikila kumagolelo aanyika,”
18Kuli bamusyobo wa Zebuluni awa Isakaa wakati,
“Musyobo wa Zebuluni uzwidilile mumakwebo aawo aamato.
Lubono lwamusyoobo wa Isakaa luvule.
19Uyootamba bazwamasi kuti bakaboole kucilundu
akupaizya zipaizyo zitambulika ooko.
Lubono lwabo balujana mukusambala amato,
akuzwida mumusenga mumbali aankomwe.”
20Kuli bamusyobo wa Gadi wakati,
“Aalumbwe Leza, uukwakwabula munyinza wawo,
Gadi ulayubilila mbuli syuumbwa,
ulakwamauna kuboko amutwe.
21Wakasala nyika mbotu,
wakapegwa caabilo cabusololi.
Bapati ba Baisilayeli nibakabungene antoomwe,
wakabamba milawo amalailile aa Mwami Leza.”
22Kuli bamusyobo wa Dani wakati,
“Musyobo wa Dani mwanaa syuumbwa,
ulasotooka kuzwa mu Basyani.”
23Kuli bamusyobo wa Nafutali wakati,
“Musyobo wa Nafutali ulilelekedwe mukuyanda kwa Mwami Leza.
Nyika yawo iyoosika kumusanza kuzwa kulwizi lwa Galilii.”
24Kuli bamusyobo wa Asya wakati,
“Musyobo wa Asya ulilelekedwe kwiinda misyobo yoonse,
ube aacoolwe akati kababunyina. Nyika ibe amisamu minji yamaoliva.
25Minzi yawo iyookwabililwa milyango yalubulo amukuba.
Lyoonse musyobo ooyu ukakkale muluumuno.
26Nobajesyuuni taakwe uuli mbuli Leza wanu.
Uleendeenda mumakumbi mubulemu bwakwe,
uleendeenda mujulu kuti azoomugwasye.
27Leza Uuliwo lyoonse ngomatijilo aanu,
maanza aakwe ngaamukwabilila akutamani.
Uyootanda basinkondonyoko kumbele lyanu,
akumwaambila kuti mubanyonyoone.
28Aboobo lunyungu lwa Jakobo luliliibide,
lulikkede munyika iizwide maila awaini munji,
mume kuuloka kuzwa kujulu.
29Mulilelekedwe nywebo no Baisilayeli!
Taakwe bantu bali mbuli ndinywe,
bakavunwa a Mwami Leza.
Mwami Leza lwakwe mwini nintobo yanu,
ngomugwasyi wanu, alimwi ndepanga lyakuzundya.
Basinkondonyoko bayoolibombya kulindinywe,
eelyo muyoobalyatauka.”
Currently Selected:
Ciibalusyo 33: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
