Ciibalusyo 29

Zyacizuminano ca Mwami Leza a Baisilayeli mu Mowabu

1Ngaaya majwi aacizuminano Mwami Leza ncaakalailila Mozesi kuti babambe a Baisilayeli munyika ya Mowabu, kunze lyacizuminano ncaakapangana ambabo kucilundu ca Sinai.

2Mozesi wakaita Baisilayeli boonse akubaambila kuti, “Mwakalibonena nobeni eeco Mwami Leza ncaakacita kuli Falo mu Ijipiti, akuli balupati-pati bakwe akunyika yakwe yoonse. 3Mwakalibonena nobeni mapenzi aalya, zitondezyo azigambya zipati eezyo Mwami Leza nzyaakacita. 4Pele nikuba boobo sunu tanacita kuti muzibisye akumvwisya ziya nzimwakabona. 5Kwamyaka iili makumi one Mwami Leza njaakamusolweda zisani zyanu tiizyakazakala, niziba ndyasyo zyanu. 6Taakwe cinkwa ncimwakali kulya, nikuba kunywa waini niciba cikola cimwi pe. Mwami Leza wakamupa zyoonse nzimwakabulide mukuti muzibe kuti ngo Leza wanu.”

7Nitwakasika kuno Sihoni mwami waku Hesyiboni bali a Ogi mwami waku Basyani, bakaboola kuzootulwana. Pele twakabazunda. 8Twakatola nyika yabo akwiipa bamusyobo wa Lubeni, wa Gadi, acisela camusyobo wa Manase. 9Amukatobele majwi aacizuminano eeci cabunkutwe, kutegwa mukazwidilile muli zyoonse nzyomuyoocita.

10Nyoonse sunu muliimvwi kumbele lya Mwami Leza wanu, nywebo nobasololi, basilutwe, bapati babantu, balupati-pati, antoomwe ababuleya boonse, 11kubikkilizya bakaintu abana, antoomwe abazwamasi mbomukkala limwi, aabo bamutebbela nkuni akumutekela maanzi. 12Muliimvwi aano sunu kuti mupangane cizuminano a Mwami Leza wanu akuzumina zyoonse nzyocaamba, 13kuti Mwami Leza amwaambe kuti muli bakwe, mbubonya mbuli mbwaakamusyomezya naakakonkezya basikale banu ba Abulahamu, Izaka a Jakobo. 14Tamuli ndinywe nywebo nyolike nomuli waano Mwami Leza mbapangana aabo cizuminano cacikonke eeci pe. 15Pele cilajatikizya abaabo batali waano, nkokuti balunyungu lwesu batanazyalwa.

16Nywebo lwanu mulizi mbutwakakkede mu Ijipiti, ambutwakaandulula manyika aabeni. 17Mwakabona mituni yabo eeyi yakamusesemya yazisamu, yamabwe, yansiliva ayangolida. 18Amucenjele kuti taakwe naba omwe mwaalumi naa mukaintu, ciinga, nuuba musyobo wiimvwi waano sunu uutikasiye Mwami Leza wesu kuti akakombe baleza bamisyobo iimbi. Nkaambo eeci ciyooba mbuli katangalulu. 19Amucenjele kuti kutabi muntu naba omwe uumvwide majwi aacikonke eeci, kwamana alisumpule akwaamba kuti, “Taakwe cinga caba nikuba kuti ndacita nzyeyanda.” Eeci ciyoomunyonyoozya, baluzi abataluzi boonse buyo. 20Mwami Leza takooyoomulekelela muntu wacitya zeezi pe. Uyoomunyemena kapati, nkabela lusinganyo loonse lulembedwe mubbuku eeli luyoomusikila, azina lyakwe liyoozimaana ansi aano. 21Mwami Leza uyoomunomona kuzwa akati kamisyobo yoonse ya Baisilayeli. Uyoomusubula kweendelana alusinganyo loonse lulembedwe mubbuku lya Mulawo eeli.

22Balunyungu lwanu luboola abazwamasi bali kulaale bayoobona mapenzi aayo amalwazi aayo Mwami Leza ngayooumya nyika. 23Nyika yoonse iyooba cimpayuma inooli lukula, iitakonzya kusyangwa. Taakwe ciyoomena nibuba bwizu pe. Iyooba mbuli kunyonyoonwa kwa Sodomu a Gomola, Adimaa a Zeboimu, eeyo Mwami Leza njaakanyonyoona mubukali bwakwe buyoosya. 24Eelyo manyika oonse ayoobuzya kuti, “Ino nkaambo nzi Mwami Leza ncaakacita boobu kunyika eeyi? Ino ncinzi cakamunyemya boobu?”

25Lino bayooamba kuti, “Nkaambo kakuti bantu aabo bakasiya cizuminano ca Mwami Leza, Leza wabasikale babo, ciindi naakabagwisya mu Ijipiti. 26Bakaleya akutalika kukomba baleza bambi akubabelekela, baleza aabo mbobatakazi mbaakabakasizye. 27Nkaako Mwami Leza wakiinyemena nyika eeyi, mpaakaletela lusinganyo loonse lulembedwe mubbuku eeli. 28Mubukali bwakwe bupati Mwami Leza wakabagwisya munyika yabo akubasowela mumanyika aambi mbuli mbocibede sunu.”

29Kuli zintu Mwami Leza wesu zyaatakatuyubunwida, pele wayubununa milawo yakwe, nkaako swebo alunyungu lwesu tuleelede kwiitobela kukabe kutamani.

Currently Selected:

Ciibalusyo 29: Tonga96

Highlight

Copy

Compare