Ciibalusyo 30

Baisilayeli mbobayooboozegwa akulelekwa

1Lino ndamwaambila kuti musale akati kacileleko alusinganyo. Zintu eezi zyoonse zyaakumucitikila mumanyika aayo Mwami Leza wanu mwayoomumwaila, muyooyeeya eeci ncindamwaambila kuti musale. 2Eelyo nywebo alunyungu lwanu mukapilukile ku Mwami Leza wanu akumuswiilila amyoyo yanu yoonse alimwi amyuuya yanu yoonse, mbubonya mbuli mbwendimulailila sunu. 3Aawo Mwami Leza wanu uyoomweengelela. Uyoomuyobolola kuzwa mumanyika oomo mwaakamumwaila, uyoocita kuti mukasumpuke alimwi. 4Nikuba kuti munooyoomwaikide mane kumagolelo aanyika, Mwami Leza wanu uyoomuyobolola. 5Uyoomuboozya kunyika eeyo basikale banu njibakali kukkala. Nkabela uyoomusumpula akumuvuzya kwiinda bwakabede basikale banu. 6Mwami Leza wanu uyoocita kuti nywebo alunyungu lwanu kamumumvwisya akumuyanda amyoyo yanu yoonse, amyuuya yanu yoonse mukuti mukakkale munyika eeyo. 7Mwami Leza wanu uyoosinganya basinkondonyoko aabo bamusulaika akumupenzya. 8Muyooswiilila Mwami Leza alimwi akubamba milawo yakwe eeyi njendimupa sunu. 9Aboobo Mwami Leza wanu uyoomusumpula mumilimo yanu yoonse njomuyoocita, akumupa bana banji, ŋombe, azimwi zivubwa zinji, alimwi azilyo zinji. Mwami Leza uyoobotelwa alimwi andinywe akuyoomusumpula kapati, mbubonya mbuli mbwaakaboteledwe abasikale banu. 10Eeci ciyoocitika kuti naa mwaswiilila Mwami Leza wanu akubamba milawo amalailile aakwe aalembedwe mubbuku lya mulawo eeli. Mweelede kupiluka ku Mwami Leza wanu amyoyo yanu yoonse alimwi amyuuya yanu yoonse.

11Lino mulawo ngwendimulailila sunu tuuli muyumu, alimwi tuuli kule pe. 12Tuuli kujulu kutegwa mwaambe kuti, “Nguni uukonzya kuya kujulu kuyoouleta kuti tuuswiilile akuubamba?” 13Alimwi tuuli mutala lyalwizi kutegwa mwaambe kuti, “Nguni uukonzya kuzubuka lwizi kuyoouleta kuti tuuswiilile akucita?” 14Peepe, majwi ali aafwiifwi, ali mulindinywe, mumyoyo yanu, nkaako amwaabambe.

15Amubone, sunu ndamupa ciindi cakuti musale akati kabuumi alusumpuko naa lufu amapenzi. 16Mwali kuyanda Mwami Leza wanu, akweenda munzila zyakwe, akubamba milawo, mbeta amalailile aakwe, ndendilyo nimuyoosumpuka akuvula. Mwami Leza wanu uyoomuleleka munyika eeyo njemuyootola. 17Pele kuti mutakaswiilili, mukagame kukomba baleza bambi akubamanina milimo, 18ndamwaambilila limwi sunu kuti ncobeni muyoonyonyoonwa. Tamukooyooongola munyika eeyo njemuyootola mwazubuka mulonga wa Jolodani. 19Sunu ndaita julu anyika kuti zibe bakamboni bangu. Ndamupa ciindi kuti musale akati kabuumi alufu, zileleko alusinganyo. Lino amusale buumi kutegwa nywebo abalunyungu lwanu mupone. 20Amuyande Mwami Leza wanu, amumuswiilile kamusyomeka kulinguwe lyoonse. Ndendilyo Mwami Leza nayoomupa myaka minji munyika eeyo njaakakonkezya kuli basikale banu ba Abulahamu, Izaka a Jakobo.

Currently Selected:

Ciibalusyo 30: Tonga96

Highlight

Copy

Compare