Ciibalusyo 2
2
Baisilayeli mbubakakkede munkanda
1Musule akooku twakanyona twaandulula nkanda kutozya ku lwizi lusalala, mbuli mbwaakandaambila Mwami Leza. Twakali munyika ya Edomu kwaciindi cilamfu.
2Mpoonya Mwami Leza wakandaambila kuti, 3“Mwakkala ciindi cilamfu munyika iino yatulundu-lundu, amunyone mutozye kulubazu lwakunyika. 4Ubazibye bantu kuti balaafwiifwi kunjila munyika yabakwanu, balunyungu lwa Isau, aabo bali mu Edomu. Bayoomuyoowa, pele amucenjele 5kuti mutabalwani, nkaambo nsikooyoomupa kapaanzi kanyika yabo nikaceya buti. Kayi ndakapa nyika eeyi yatulundu-lundu kuli Isau kuti ibe yakwe iimugeme. 6Naa bamupa cakulya naaba maanzi, muule.”
7Lino nywebo amuyeeye mbuli Mwami Leza wanu mbwaakamuleleka mulizyoonse nzimwakacita. Wakamubamba ciindi coonse ncimwakali munkanda eeyi mpati. Kwamyaka yoonse eeyi iili makumi one Mwami Leza wanu wakali aandinywe, taakwe acomwe cintu ncimwakabula pe!
8“Nkaano twakabaindilila bakwesu, balunyungu lwa Isau, bakali munyika ya Edomu. Twakasiya mugwagwa uuzwa kuminzi ya Elati a Aziyobigebee uuya kulwizi lwamunyo, twatola mugwagwa wamunkanda kuya ku Mowabu. 9Aawo Mwami Leza wakandaambila kuti, ‘Mutasoki Bamowabu nikuba kubusya nkondo. Nsikooyoomupa kabeela kanyika yabo nikaceya buti nkaambo nyika ya Aa ndakaipa kulunyungu lwa Loti.’”
( 10Munyika eeyi ciindi kwakali kukkala Baemi, aaba bakali bantu banji basinguzu, alimwi akali mantu mbubonya mbuli bwakali Baanaki. 11Bakazaalikizigwa kuti Balefa mbubonya mbuli Baanaki, balo Bamowabu bakali kubaita kuti Mbaemi. 12Ciindi-ciindi Baholi mbibakali kukkala munyika ya Edomu, pele balunyungu lwa Isau bakabatanda kuzwa munyika eeyo. Bakanyonyoona ciinga ca Baholi, mpoonya biikkala mbabo. Bakacita mbubonya mbuli Baisilayeli mbobakacita kubantu aabo bakali kukkala munyika eeyo njaakabapa Mwami Leza.)
13Mwami Leza wakatwaambila kuti, “Amuunke muzubuke mulonga wa Zeledi.” Mpoonya aawo twakazubuka. 14Lino kwakaindide myaka iili makumi otatwe alusele kuzwida ciindi nitwakalonga ku Kadesyibaaneya kusikila nitwakazubuka mulonga wa Zeledi. Ciindi eeco boonse bamusela uulya wakali kukonzya kuya kunkondo bakamanide kale kufwa, mbubonya mbuli Mwami Leza mbwaakakonkezya. 15Nkaambo ncobeni Mwami Leza wakabanyonyoona boonse mane limwi bamaninina do.
16Nicakamana eeci, 17Mwami Leza wakati kulindime, 18“Sunu mulaandulula nyika ya Mowabu munzila iiya kumunzi wa Aa. 19Mwaakusika kumunyinza wa Baamoni, mutakabasoki nikuba kubusya nkondo nkaambo nsikooyoomupa kabeela kanyika yabo nikaceya buti. Eeyo nyika ndakiipa kuli balunyungu lwa Loti kuti ibe yabo.”
20Munyika eeyi ayalo Balefa bakali kukkala mumo, pele Baamoni bakabaita kuti Mbazamuzumu. 21Aaba bakali bantu banji basinguzu alimwi akali mantu mbubonya mbuli bwakali Baanaki. Pele Mwami Leza wakanyonyoona ciinga cabo, eelyo Baamoni bakabatanda akukkala munyika yabo, 22mbuli Mwami Leza mbwaakacitila balunyungu lwa Isau bakali kukkala mu Edomu ciindi naakabatandila Baholi. Bakabatandila limwi akukkalilila munyika yabo kusikila sunu. 23Kwaamba zya Baavi bakali munyika eeyo mane ku Gaza bakanyonyoonwa a Bakafitoli bakakkala munyika yabo.
24Lino Mwami Leza wakaamba kuti, “Amutalike lweendo lwanu alimwi, muzubuke mulonga wa Anoni. Amulange, ndaaba mwami Sihoni, Muamoli, mwami wa Hesyiboni, anyika yakwe yoonse. Amumusaale, mwiitole nyika yakwe. 25Kuzwa sunu ndacita kuti misyobo imuyoowe. Baakumvwa zyandinywe, liyoobaleka, mumafuwa tontolo.”
Baisilayeli mbobakazunda mwami Sihoni
(Myeelwe 21.21-30)
26“Nitwakali kunkanda ya Kedemoti ndakatumya majwi aaluumuno kumwami Sihoni aakuti, 27‘Amutuzumizye twiinde munyika yanu, tunoogeme buyo mugwagwa mupati tatunooyabuleya-leya.’ 28Twaakuyanda cakulya amaanzi aakunywa mukatuuzizye amuulo wawo. Kapati tulomba kuti twiinde munyika yanu. 29Mutuzumizye buyo kwiinda munyika yanu mbuli bwakacita balunyungu lwa Isau bakkala munyika ya Edomu, alimwi a Bamowabu bakkala mu Aa, twiinde buyo mane limwi tukazubuke mulonga akuyoonjila munyika eeyo njayootupa Mwami Leza wesu.
30“Nikuba boobo mwami Sihoni taakwe naakatuzumizya kuti twiinde mucisi cakwe, nkaambo Mwami Leza wanu wakamucitya kuti abe sicinguni mukuti amwaabile mpawo, mbuli mbokubede sunu.
31“Mpoonya Mwami Leza wakandaambila kuti, ‘Bona, ndatalika kwaaba Sihoni antoomwe anyika yakwe kulindinywe. Amwiisaale ibe yanu.’ 32Mbombuboobu Sihoni mbwaakaletelela bantu bakwe boonse kuti bazootulwane nitwakali munsi aamunzi wa Jahazi. 33Pele Mwami Leza wakamwaaba kulindiswe, twakamuzunda walo, abana bakwe, alimwi abantu bakwe boonse. 34Ciindi eeco twakasaala minzi yakwe yoonse akwiinyonyoona, twakajaya boonse baalumi, abakaintu abana. Taakwe naba omwe ngutwakasiya kali muumi pe, 35ccita buyo ŋombe nzitwakatola antoomwe alubono lwaminzi eeyo njotwakasaala. 36Kuzwida kumunzi wa Aloyele uuli kumbali aamulonga wa Anoni, kubikkilizya amunzi uuli munsi lyawo mane kuyoosika ku Giliyadi, kwakanyina munzi nuuba aalukwakwa lulamfu buti wakatukakila kunyonyoona pe, nkaambo Mwami Leza wakiiaba kulindiswe. 37Pele kunyika ya Baamoni tiitwakainda pe, nikuba kunyika iili kumbali aamulonga wa Jabboki, kubikkilizya akuminzi iili kunyika yatulundu-lundu, alimwi akumasena amwi ooko nkwaatakatulailila Mwami Leza kuti tukasike.”
Currently Selected:
Ciibalusyo 2: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
