Ciibalusyo 1

1Ngaaya majwi aa Mozesi ngaakaambila Baisilayeli boonse nibakali munkanda kujwe lyamulonga wa Jolodani mukkuti lili munsi aa Sufu aawa mpaakati aanga munzi wa Palani waba kulubazu lumwi minzi ya Tofeli, Labani, Hazeloti, a Dizahabu yaba kulubazu lumwi. 2Kuli musinzo wamazuba aali kkumi abumwi kuzwida kucilundu ca Sinai kuyoosika ku Kadesyibaaneya kwiinda nzila yacilundu ca Siiya. 3Lino mumwaka wamakumi one kuzwa ciindi Baisilayeli nibakalonga kuzwa kunyika ya Ijipiti, mubuzuba bwakusaanguna bwamwezi wakkumi aumwi Mozesi wakaambila bantu makani oonse aayo Mwami Leza ngaakamulaililide kuti abaambile. 4Majwi aaya akaambwa a Mwami Leza kazundide kale Sihoni mwami wa Baamoli ooyo wakali kulela mumunzi wa Hesyiboni, alimwi wakalizundide kale a Ogi mwami wa Basyani wakali kulela muminzi ya Asiyitaloti a Edileyi. 5Kabacikkede kujwe lya Jolodani, mucisi ca Mowabu, Mozesi wakapandulwida bantu milawo anjiisyo zya Leza.

6Wakati, “Katuli ku Sinai, Mwami Leza wesu wakatwaambila kuti, ‘Mwakkala cabonwa kuno, 7lino amulonge muunke kunyika ya Baamoli amuzisi zyoonse nzyobabambene limwi, ku Alaba kunyika yatulundu-lundu, amuzibanda zyakumusanza, mane kuyoosika kumakoba aalwizi lupati kunyika ya Bakenani, aku Lebanoni, mane do kumulonga mupati wa Yufuletisi. 8Masimpe, njoomupa nyika eeyo, mebo nde Mwami Leza njendakasyomezya kuyoopa kuli basikale banu, ba Abulahamu, Izaka a Jakobo, akulunyungu lwabo. Kamuya mukiitole.’”

Mozesi mbwaakasala babetesi

(Kulonga 18.13-27)

9Mozesi wakati kubantu, “Alimwi katucili ku Sinai ambebo ndakamwaambila kuti, ‘Mukuli wakumweendelezya nsyuukonzyi endikke. 10Mwami Leza wanu wamuvuzya kapati cakuti mwaba mbuli nyenyezi. 11Mwami Leza wabasikale banu amuvuzye ziindi zili cuulu kwiinda mbomubede lino. Amuleleke mbubonya mbuli mbwaakasyomezya. 12Pele lino inga mebo endikke ndakonzya buti kuyumuna mukuli wakumweendelezya nywebo alimwi akumubetekela manyongwe aanu? 13Nkaako amusale baalumi basongo kuzwa kumusyobo omwe-omwe, bali mbaasiluzibo balemekwa, babe basololi banu!’ 14Eelyo anywebo lwanu mwakazumina kuti cintu cili boobo cileelede kucitwa. 15Aboobo aabo bantu mbimwakasala kuzwa mumusyobo omwe-omwe, bakajisi busongo aluzibo, ndakababikka kuba basololi banu. Bamwi bakali kulela bantu bali cuulu, abamwi bakali kulela bali mwaanda, abamwi bakali kulela bali makumi osanwe, alimwi bamwi bakali kulela bali kkumi. Alimwi ndakasalilizya bakuti babagwasye.

16“Kuciindi eeco ndakabalailila babetesi banu kuti, ‘Muleelede kubeteka cabululami twaambo toonse bantu ntobayooleta kulindinywe, twaambo twa Baisilayeli nikuba twa Muisilayeli amuzwakule. 17Mukubeteka kwanu mutanoosalululi pe, kamubeteka buyo bweelede kubantu balemenede akubantu buyo. Mutakayoowi muntu nabani, nkaambo kubeteka kwanu kuzwa kuli Leza. Kuti naa mulandu ukamuyumine, mukuulete kulindime kuti ndizooubeteke.’ 18Kuciindi eeco nciconya ndakamwaambila zintu zyoonse nzimweelede kucita.”

Basikutwela mbubakatumwa

(Myeelwe 13.1-33)

19“Lino twakacita mbubonya mbwaakatulailila Mwami Leza wesu. Twakasiya cilundu ca Sinai, twakeenda kwaandulula nkanda iilya mpati iiyoosya njimwakalibonena, munzila iiya kunyika yatulundu-lundu ya Baamoli. Nitwakasika ku Kadesyibaaneya, 20ndakamwaambila kuti, ‘Ono mwasika kunyika yatulundu-lundu ya Baamoli, njenjiyo eeyi nyika njaatupa Mwami Leza wesu. 21Masimpe, Mwami Leza wamupa nyika eeyi. Kamuya mwiisaale nkaambo njiyanu, mbubonya mbwaakamwaambila Mwami Leza wabasikale banu. Mutayoowi pe nikuba kutyompwa.’

22“Pele nywebo mwakaboola kulindime mwakati, ‘Atusaangune kutuma bamwi bantu kuti bakiitwele nyika kutegwa baboola bazootwaambile nzila njotweelede kutola alimwi aminzi njotuyoosaala.’

23“Muzeezo ooyo wakandibotela aboobo ndakasala baalumi bali kkumi ababili, omwe-omwe kuzwa kumusyobo omwe. 24Eelyo baalumi aabo bakainka baandulula kkuti lya Esyikoli baakutwela nyika. 25Nibakaboola bakaletelezya amicelo iizwa munyika eeyo kuti bazootondezye bubotu bwayo, alimwi bakazootwaambila amulomo mpande kuti eeyo nyika njaatupa Mwami Leza wesu nimbotu kapati.

26“Nikuba boobo nywebo mwakakaka kuunka kunyika eeyo, mwakazangila Mwami Leza. Mwakakaka kuswiilila malailile aakwe. 27Alimwi mwakatalika kutongooka muzivuka zyanu, mwakati, ‘Nkaambo kakuti Mwami Leza ulitusulaikide ncaakatugwisya mu Ijipiti kuti azootwaabe ku Baamoli kuti batumane kutujaya.’ 28Ani tulagamayi? Kayi mbaaba batutyompya. Baamba kuti, ‘Bantu bamumo mbalamfu alimwi mbaasinguzu kwiinda ndiswe. Minzi yabo mmipati, iliyakilidwe ankwakwa zisika kujulu. Alimwi twakabona ammantu kuya.’

29“Pele mebo ndakamwaambila kuti, ‘Mutayoowi bantu aabo pe. 30Mwami Leza wanu nguuyoomusolweda akumulwanina lwakwe mwini mbubonya mbuli mbwaakacita mu Ijipiti 31amunkanda. Mwakalibonena nobeni Mwami Leza wanu mbwaakamulela mbuli muntu mbwalela mwanaakwe mulweendo lwanu loonse mane do kuno.’ 32Pele nywebo nikuba kuti ndakamwaambila boobu, tiimwakasyoma Mwami Leza wanu, 33ooyo wakamusolweda akumutondezya mwakuyakila. Masiku wakali kumusolweda amusumpuululu wamulilo, isikati akkumbi.”

Mwami Leza mbwaakasubula Baisilayeli

(Myeelwe 14.20-45)

34“Lino Mwami Leza naakamvwa matongoosi aanu, wakanyema. Wakakonka akuti, 35‘Masimpe, taakwe naba omwe wabantu aaba bamusela ooyu mubi uuyoonjila munyika mbotu eeyo njindakasyomezya kupa kuli basikale babo. 36Ccita buyo Kalebi mwanaa Jefune walo alikke nguuyoobona nyika eeyo njaakatwela. Njoomupa alunyungu lwakwe, nkaambo walo wakandisyoma amoyo woonse.’ 37Mwami Leza wakandinyemena ambebo akaambo kanu akuti, ‘Ayebo Mozesi tokooyoonjila munyika eeyo pe, 38pele buyo mugwasyi wako Josyuwa mwanaa Nuni nguuyoonjila mulinjiyo. Muyumye-yumye nkaambo nguuyoosolweda Baisilayeli kuyootola nyika eeyo!’

39“Mpampawo aalya Mwami Leza wesu mpaakatwaambilila kuti, ‘Bana banu aaba baniini batazi cibi acibotu mbabayoonjila munyika eeyo, aabo mbomuti bayoojatwa abasinkondonyoko. Njooipa kulimbabo kuti bakakkale mumo. 40Pele nywebo amupiluke kunkanda kuya ku lwizi lusalala.’

41“Lino nywebo mwakandiingula kuti, ‘Twakabisizya Mwami Leza. Pele ono tulainka tukalwane abantu aaba, mbuli bwalailila Mwami Leza wesu.’ Eelyo umwi aumwi wanu wakabweza zilwanyo zyakwe, walibambila kuya kunkondo. Mwakali kuyeeya kuti ncibotu alimwi ncuuba-uba kulwana bantu bamunyika yatulundu-lundu.

42“Pele Mwami Leza wakandaambila kuti, ‘Baambile bantu aaba kuti batasoli kuyoolwana, nkaambo mebo nsikooyooba ambabo, nkaako bayoozundwa abasinkondonyina.’ 43Eelyo nindakamwaambila mbuli mbwaakandaambila Mwami Leza, taakwe nimwakandiswiilila pe. Pele mwakazangila malailile aa Mwami Leza. Mukulikankaizya kwanu mwakainka kuyoolwana bantu aabo. 44Eelyo Baamoli bakamutandaanya mbuli makata aanzuki zitandaanya muntu. Bakamukoma akumutandaanya mucisi catulundu-lundu ca Edomu, mane baakumusisya ku Homa. 45Kumane mwakalilila Mwami Leza kuti amugwasye, pele taakwe naakacita oobo. 46Mpawo mwakakkala buyo mu Kadesyi kwaciindi cilamfu.”

Currently Selected:

Ciibalusyo 1: Tonga96

Highlight

Copy