Ciibalusyo 16

Pobwe Lyakwiindilila

(Kulonga 12.1-20)

1“Mwezi wa Alibu ngomwezi ngomweelede kunoosekelela Pobwe Lyakwiindilila ku Mwami Leza wanu, nkaambo mumwezi wa Abibu naakamugwisya mu Ijipiti masiku. 2Mukapaizye ku Mwami Leza wanu ŋombe naa mbelele, ibe ya Pobwe Lyakwiindilila kubusena bwakukombela oobo Mwami Leza mbwayoosala. 3Mwaakulya Pobwe eeli mukalye cinkwa citakwe mimena. Kwamazuba aali ciloba kamuyoolya cinkwa citakwe mimena mbubonya mbuli mbumwakacita ciindi ciya nimwakazwa mu Ijipiti cakubindaana. Cinkwa eeci ciyootegwa cinkwa camapenzi kutegwa mubuumi bwanu boonse kamuyeeya mbumwakagwisigwa mu Ijipiti. 4Kwamazuba aali ciloba aayo muleelede kwiigwisya mimena yoonse mumaanda aanu. Nyama njomupaizya mangolezya buzuba bwakusaanguna italali, mwiilye.

5“Tamweelede kujaila munyama wa Pobwe Lyakwiindilila kufumbwa mucisi eeco Mwami Leza wanu ncayoomupa, 6pele mweelede kuyoomujaila kubusena bwakukombela oobo mbwayoosala. Kwalooko nkomweelede kupaizya munyama wa Pobwe Lyakwiindilila, nkaambo kumangolezya nceciindi ncomwakazwa mu Ijipiti. 7Mweelede kuyooyoka nyama eeyo akwiilya kubusena bwakukombela oobo Mwami Leza wanu mbwayoosala. Bwaakuca mukapiluke kuzivuka zyanu. 8Kwamazuba aali cisambomwe mweelede kunoolya cinkwa citakwe mimena, eelyo mubuzuba bwaciloba muleelede kuswaangana mukombe Mwami Leza wanu alimwi taakwe mulimo ngomweelede kucita mubuzuba oobo pe.

Pobwe lyakutebula

(Kulonga 34.22; Bapaizi 23.15-21)

9“Kuzwa mubuzuba nimwakatalika kucesa maila, mukabale mvwiki zili ciloba. 10Mpawo mukacite pobwe lyabutebuzi kwiindila mukupa Mwami Leza wanu zituuzyo zyakuliyandila mbubuli Mwami Leza wanu mbwaakamuleleka. 11Amutangale kumbele lya Mwami Leza wanu kubusena bwakukombela oobo mbwayoosala. Mweelede kuyoosekelela nywebo abana banu balombe abasimbi, babelesi banu baalumi abakaintu, antoomwe a Balevi, bazwamasi, bamusyaala abamukabafu mbomukkala limwi. 12Amuyeeye kuti anywebo mwakali bazike mu Ijipiti, amubambe malailile aaya cabunkutwe.

Pobwe lyazivuka

(Bapaizi 23.33-43)

13“Amukacite pobwe lyazivuka kwamazuba aali ciloba mwamana kutebula maila akukanda nsaansa. 14Amukasekelele pobwe eeli nywebo abana banu balombe abasimbi, babelesi banu baalumi abakaintu, antoomwe a Balevi, bazwamasi, bamusyaala abamukabafu mbomukkalalimwi. 15Kwamazuba aali ciloba amukatangale kumbele lya Mwami Leza wanu kubusena bwakukombela oobo Mwami Leza mbwayoosala. Mwami Leza wanu uyoomuleleka mubutebuzi bwanu, amumilimo yanu yoonse, aboobo muyootangala kapati.

16“Kwaziindi zyotatwe mumwaka baalumi boonse baleelede kulibonya kumbele lya Mwami Leza wanu kubusena bwakukombela oobo mbwayoosala. Eezi nzeziindi zyapobwe lyacinkwa citakwe mimena, pobwe lyabutebuzi, a pobwe lyazivuka. Taakwe mwaalumi uyoolibonya ku Mwami Leza acinkwamaanza. 17Omwe-omwe uleelede kuleta cipego mbubuli Mwami Leza mbwaakamuleleka.

Milimo yababetesi

18“Amukasale babetesi abamwi balupati-pati kuzwa kumusyobo omwe-omwe muminzi eeyo Mwami Leza wanu njayoomupa. Bantu aaba baleelede kubeteka bweelede. 19Tabeelede kuvundikizya makani nikuba kusalulula pe. Tabeelede kutambula masinkamulomo, nkaambo masinkamulomo ngaafubaazya basongo akunyonganya baluleme. 20Amukacite ziluleme ndendilyo nimuyookkala kabotu munyika eeyo Mwami Leza wanu njayoomupa.

21“Mwaakuyaka cipaililo ca Mwami Leza wanu, mutakabikki cikozyanyo ca Asyela pe. 22Alimwi mutakayaki musumpuululu nuuba omwe, nkaambo eezi nzezintu Mwami Leza wanu nzyasulide.

Currently Selected:

Ciibalusyo 16: Tonga96

Highlight

Copy

Compare