Ciibalusyo 17

1“Mutapaizyi ŋombe niiba mbelele ku Mwami Leza wanu iijisi kampenda, nkaambo eeci Mwami Leza wanu ulicisulaikide.

2“Atwaambe kuti mwamvwa mamvwambukila aakuti kuli mwaalumi naa mukaintu umwi waminzi eeyo Mwami Leza wanu njayoomupa wakabisizya Mwami Leza akutyola cizuminano 3kwiindila mukukomba baleza bambi akubabelekela, nikuba kukomba zuba, mwezi naa nyenyezi, kuteendelana amilawo ya Mwami Leza. 4Kuti naa mwamvwa mamvwambukila aali boobu, muleelede kuvuntauzya kabotu-kabotu. Kuti naa ajanika kuti ngakasimpe, akuti bubi buli boobu bwakacitika ncobeni mu Isilayeli, 5muleelede kutola mwaalumi naa mukaintu ooyo kumanjililo amunzi, kwamana mumuume mabwe afwe. 6Muntu uupedwe mulandu walufu ukonzya buyo kujaigwa kuti kakuli bakamboni bobilo naa botatwe, pele kuti kakuli kamboni omwe buyo, teelede kujaigwa pe. 7Bakamboni aabo mbobeelede kusaanguna kumuuma, bamana ndendilyo bantu boonse nobakonzya kuuma. Mbombuboobu mbomuyoogwisya bubi akati kanu.

8“Kuti naa kwaba milandu miyumu njomutakonzyi kubeteka, mbuli yakujaya muntu, yakulwanina lubono naa kuuma muntu, mukiitole kubusena bwakukombela oobo Mwami Leza wanu mbwayoosala. 9Mubaambile, Balevi, bapaizi amubetesi unoobeteka ciindi eeco, aabo mbayookosola bweelede mulandu ooyo. 10Mweelede kuyoocita mbubonya mbuli mbobatikaambe aabo bali kubusena bwakukombela oobo Mwami Leza wanu mbwayoosala. Amukacenjele kuti mukacite zintu zyoonse nzibamwaambila. 11Amukacite mbubonya bwaamba mulawo wabo ooyo ngobamupa, amalailile aayo ngobamulailila. Mutakasiyi nzibamwaambila, mukaziccilile. 12Kufumbwa muntu ooyo uutaswiilili caamba mubetesi naa mupaizi uukutaukila Mwami Leza wanu, weelede kujaigwa. Mbombuboobu mbomuyoogwisya bubi mu Isilayeli. 13Boonse baakumvwa bayooyoowa, nkabela taakwe naba omwe uyoosola kucicita alimwi.

Zya Mwami

14“Mwaakumana kutola nyika eeyo Mwami Leza wanu njamupa akukkala mulinjiyo, kwamana mukayeeye kuba aamwami mbubuli misyobo iizingulukide, 15mukabikke yooyo mwami wanu ngwayoosala. Weelede kuba umwi wanu. Tamweelede kubikka muzwamasi uutali Muisilayelinyoko pe. 16Mwami teelede kuba aamabbiza manji aampi yakwe, nikuba kutuma bantu bakwe ku Ijipiti kuti bakaule aambi, nkaambo Mwami Leza wakaamba kuti bantu bakwe tabeelede kupilukila ooko pe. 17Teelede kukwata bakaintu banji, nkaambo eeci inga cacita kuti asiye Mwami Leza. Teelede kulilundikila nsiliva angolida pe. 18Anjizigwa mubwami, uleelede kuyoolilembela mwini bbuku lyamilawo kuzwa kubbuku lyamilawo lili aabapaizi, Balevi. 19Weelede kuti kajisi bbuku eeli kalibala lyoonse kutegwa azibe kulemeka Mwami Leza wakwe alimwi akubamba milawo amalailile aaya. 20Eeci ciyoomucitya kuti walo uli kabotu kwiinda Baisilayeli akuti atasiyi milawo eeyi. Mbombuboobu walo abalunyungu lwakwe nibayoolela kwaciindi cilamfu mu Isilayeli.

Currently Selected:

Ciibalusyo 17: Tonga96

Highlight

Copy

Compare