Ciibalusyo 11

Zyabupati bwa Mwami Leza

1“Amuyande Mwami Leza wanu akubamba milawo amalailile aakwe oonse. 2Sunu amuzibe kuti nywebo lwanu ndinywe mwakabona zintu eezyo Mwami Leza wanu nzyaakacita kutali bana banu. Mwakabona nguzu zyakwe, bupati bwakwe, amaleele. 3Mwakalibonena mbuli Mwami Leza mbwaakacita kuli Falo akunyika yakwe. 4Mwakalibonena mbuli Mwami Leza mbwaakanyonyoona mpi ya Baijipiti, antoomwe amabbiza ankamela zyabo. Wakabanyikizya mulwizi lusalala nibakali kutandila ndinywe. 5Tabali bana banu bakabona Mwami Leza ncaakamucitila munkanda kamutanasika kuno. 6Muliciyeeyele ncaakacita kuli Datani a Abilamu bana ba Eliyabu wamusyobo wa Lubeni. Nyoonse kamulangilila nyika yakaanduka akati kabo akubamena buumbulu antoomwe amikwasyi yabo, matente aabo, kubikkilizya babelesi azivubwa zyoonse nzibakajisi. 7Kasimpe nywebo mwakabona zintu zyoonse eezi Mwami Leza nzyaakacita.

Zyakuswiilila Mwami Leza

8“Lino amubambe milawo yoonse njindamulailila sunu. Ndendilyo nimuyookonzya kuzubuka mulonga wa Jolodani akutola nyika eeyo. 9Eelyo muyooongola munyika mbotu eeyo Mwami Leza njaakasyomezya kuli basikale banu alunyungu lwabo. Eeyi ninyika iikunka buci amukupa. 10Nyika njomutola tiili mbuli nyika ya Ijipiti ooko nkomwakali kukkala pe. Kuya mwalikunga mwamana kusyanga nkutilila. 11Pele nyika njomutola njazilundu amakkuti, alimwi njamvula. 12Ninyika Mwami Leza njabamba kabotu, uliibamba mwaka woonse. 13Nkaako Mwami Leza wanu amumubelekele amyoyo yanu yoonse alimwi amyuuya yanu yoonse. 14Naa mwacita oobo, uyoomupa mvula yakumwaka ciindi ceelede, kutegwa mukabe aacewo camaila, nsaansa amafuta aaoliva. 15Kunooli bwizu bwazivubwa zyanu. Anywebo muyoolya zilyo cakulilekela. 16Amucenjele kuti mutoongwi akukomba baleza bambi nikuba kubabelekela. 17Kuti naa mwacita oobo, Mwami Leza uyoomunyemena, eelyo uyoolesya mvula, ncecaamba kuti tamukabi azilyo pe. Eeci ciyoocita kuti mukalobe kufwambaana munyika eeyo Mwami Leza njayoomupa.

18“Amulondole majwi aangu aaya mumyoyo yanu amumiyeeyo yanu, kamwaaanga kumaboko aanu kuti cibe ciibalusyo akwaasama ankumo. 19Amukaaiisye bana banu cabunkutwe. Kamwaaibaluka kufumbwa nkomubede, nimuli mumaanda, nimuli mulweendo, nimulyookezya nikuba kubeleka. 20Mukaalembe azikotamino zyamaanda aanu aazitendele zyabwaanda. 21Ndendilyo nywebo abana banu nimuyooongola munyika eeyo Mwami Leza wanu njaakakonkezya kuyoopa kuli basikale banu. Muyookkala kwalyoonse alyoonse.

22“Nkaako kuti naa mwabamba milawo yoonse eeyi njindamupa akuyanda Mwami Leza akweenda munzila zyakwe cakukakatila, 23Mwami Leza uyootanda misyobo eeyo yoonse kumbele lyanu. Muyootola nyika yamisyobo mipati iili aanguzu kwiinda ndinywe. 24Kufumbwa aawo mpomuyoolyata ayooba aanu. Kuzwa kumulonga wa Yufuletisi kusikila kulwizi lwakumbo. 25Taakwe muntu naba omwe uyoomuyumina pe. Mbubonya mbuli Mwami Leza wanu mbwaakamusyomezya, uyoocita kuti kufumbwa mpomuyooinda bakayoowe akukankama.

26“Amubone sunu ndamupa zintu zyobilo kuti musale cileleko naa lusinganyo. 27Mulalelekwa naa mwabamba milawo ya Mwami Leza wanu eeyi njemupa sunu, 28pele mulasinganyizigwa naa mwakaka milawo ya Mwami Leza wanu, akusiya nzindamulailila mukuti mutobele baleza bambi mbomutazi. 29Lino Mwami Leza wanu aakumunjizya munyika eeyo njemuyootola, mukaambilizye zileleko acilundu ca Gelizimu, acilundu ca Ebali mukaambilizye lusinganyo. 30Zilundu zyobilo eezi zili mutala lya Jolodani kumbo kubbilila zuba, kumbali aamisamu mipati ya Mole, mucisi ca Bakenani bakkala mu Alaba kubambana a Giligali. 31Mulaafwi kuzubuka Jolodani kuti munjile akutola nyika eeyo Mwami Leza njamupa. Mwaakumana boobo, 32mukacenjele kuti mukabambe milawo amalailile aakwe oonse ngendimulailila sunu.

Currently Selected:

Ciibalusyo 11: Tonga96

Highlight

Copy

Compare