3 Joni 1
1
1Kuzwa kuli ndime ndemunene kumweenzuma Gayosi ngwenjandisya kapati.
2Oyandwa, ndikumbila kuti zintu zyoonse zikweendele kabotu akuti kopona kabotu. Ndizi kuti muuya wako uli kabotu. 3Nkaambo ndakabotelwa kapati bamwi bakwesu nibakaboola kuno akundaambila kuti buumi bwako bulilondokede nkaambo utobela zyabwini. 4Taakwe cindibotelezya kwiinda kumvwa kuti bana bangu batobela zyabwini.
Gayosi mbwaakalumbaizigwa
5Oyandwa, ulacita cakusyomeka ciindi nogwasya basyominyoko, kapati beenzu. 6Aaba bakaamba kumbungano yakokuno zyaluyando lwako. Lino ulacita kabotu kuti wabagwasya mulweendo lwabo mukubotelezya Leza. 7Nkaambo nobakatalika lweendo lwabo lwakubelekela Kilisito, tiibakazumina kugwasigwa abakunze. 8Lino swebo tuleelede kubagwasya bantu bali boobo, kutegwa tubelekele antoomwe mukutola zyabwini.
Zya Diyotulefesi a Demetiliyosi
9Ndakalemba lugwalo kumbungano, pele Diyotulefesi walo uuyanda kuba mupati wabo tandiswiilili. 10Aboobo kuti ndaakuboola, nzoobukulusya zyoonse nzyaakacita. Ulaamba majwi mabi andime. Taciti buyo zeezi pe, pele alimwi ulakaka kutambula basyomi akukasya baabo bayanda kubatambula, alimwi ulasola kubatanda kuzwa mumbungano.
11Oyandwa, utatobeli zintu zibi, pele tobela zintu zibotu. Ooyo uucita ciluleme nguwa Leza, pele ooyo uucita cibi tanamubona Leza.
12Lino bantu boonse balaamba bubotu bwa Demetiliyosi, abwalo bwini bwaamba bubotu bwakwe. Aswebo twamubeda bakamboni alimwi ulizi kuti bumboni bwesu mbwabwini.
Majwi aamamanino
13Ndilijisi zintu zinji zyakukulembela, pele nsiyandi kuzilemba mulugwalo pe. 14Ndasyoma kuti ndilafwambaana kuzookubona, eelyo tuzooambaula amulomo mpande.
15Luumuno lube kuli nduwe. Boonse beenzinyoko balakujuzya. Ubajuzye boonse beenzuma omwe-omwe.
Currently Selected:
3 Joni 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.