2 Joni 1
1
1Mebo ndemunene ndembela mukaintu wakasalwa a Leza antoomwe abana bakwe aabo mbeyandisisya kapati. Kutali buyo ndime endikke, pele abaabo bazi zyabwini. 2Tulamuyanda nkaambo kakasimpe kali muli ndiswe alimwi kanooli muli ndiswe kwalyoonse alyoonse.
3Leza Taata a Jesu Kilisito Mwanaakwe atubede aaluse, lweengelelo, aluumuno, zikkale andiswe mukasimpe amuluyando.
Zyakasimpe aluyando
4Ndakakondwa kapati kujana kuti bana bako bamwi baccilila zyabwini, mbubonya mbuli bwakatulailila Taata. 5Lino ndakukumbila omukaintu uuyandwa kuti twiindilizye kuyandana toonse. Takuli kuti ndakulembela mulawo mupya pe, pele ngoonya ngutwakajisi kuzwa kumatalikilo. 6Luyando ndweamba ndwakuti tubambe milawo ya Leza. Ooyu mulawo ngwemwaambila, mbuli mbumwakamvwa kusaanguna ngwakuti amuyandane.
7Nkaambo kuli babeji banji-banji bamwaikide kale munyika, aabo batazumini kuti Jesu Kilisito wakaba muntu ncobeni. Ooyo muntu uukaka zeezi mmucengi alimwi ngosinkondonyina a Kilisito. 8Amucenjele kuti mutasweekelwi cintu ncomwakabelekela, kutegwa mukatambule bulumbu bwanu buzwide.
9Muntu uuli woonse uutabambi njiisyo ya Kilisito, pele kayungizya zimbi tajisi Leza pe. Pele ooyo uubamba njiisyo eeyo ulijisi boonse Taata a Mwana. 10Kuti umwi waboola kuli ndinywe kataiisyi eezi, mutamutambuli muŋanda yanu. Mutamujuzyi akumujuzya. 11Ooyo uumujuzya ulazumina micito yakwe mibi.
Majwi aamamanino
12Zyakumwaambila nzinji, pele nsikoomulembela mulugwalo. Njeeya buyo kuzoomuswaya nkamwaambile buya amulomo mpande kutegwa tukakondwe buzwide. 13Bana bamucizi wako uusalidwe bakujuzya.
Currently Selected:
2 Joni 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
