2 Samuyele 7
7
Cisyomezyo ca Leza kuli Devedi
(1 Makani 17.1-15)
1Lino mwami Devedi wakakkalikila muŋanda yakwe, alimwi Mwami Leza wakapa kuti alyookezye katalwani abasinkondonyina bakamuzingulukide. 2Mpawo Devedi wakati kuli Natani musinsimi, “Langa, mebo ndikkala muŋanda iiyakidwe amukamba, kakuli bbokesi lyacizuminano ca Leza likkala mutente.”
3Eelyo Natani wakati kumwami, “Koya, ukacite coonse ncoyeeya mumoyo, nkaambo Mwami Leza uli aanduwe.” 4Pele masiku aayo ngoonya Mwami Leza wakaambila Natani kuti, 5“Koya ukaambile mubelesi wangu Devedi kuti, ‘tolinduwe ootindiyakile ŋanda yakukkala.’ 6Mebo nsinakkede muŋanda kuzwa buzuba mbundakagwisya Baisilayeli kuzwa mu Ijipiti kusikila sunu, pele ndali kweendeenda buyo mutente mwendikkala. 7Mumasena oonse ngindakali kweendeenda abantu boonse ba Isilayeli, sena ndakaambaula nikuba kuli omwe wababetesi Baisilayeli, ooyo ngondakalailila kweembela bantu bangu Baisilayeli mbuli mbelele, sena ndakamwaambila kuti, ‘Nkaambo nzi tona ndiyakila ŋanda yaziyako zyamukamba?’
8“Lino mboobu mboelede kuyooamba kumubelesi wangu Devedi. Ukati, ‘Mboobu mbwaamba Mwami Leza Singuzuzyoonse. Ndakakugwisya kuzwa kumacelelo, kuzwa kukweembela mbelele, kuti ukabe muleli wabantu bangu Baisilayeli. 9Alimwi ndakali aayebo kufumbwa nkookabede, ndakanyonyoona basinkondonyoko boonse, nkabela njookupa mpuwo iili mbuli yabapati baansi. 10Eelyo njoosala busena bwabantu bangu Baisilayeli, alimwi njoobayumya-yumya kutegwa bakakkale mubusena bwabo beni, kabatatuntuliki limbi pe. Abalo bantu babi tabakooyoobakatazya limbi mbuli mbubakali kucita kusaanguna, 11nindakabikka babetesi babantu bangu Baisilayeli. Alimwi njookupa kulyookezya kuzwa kuli basinkondonyoko.’ Alimwi Mwami Leza ulaamba kuti, ‘Njookkazikizya mukwasyi wako. 12Ciindi waakufwa akuzikkwa, mbuli basikale bako, njooimika mwana wamukwasyi wako, ooyo uyoozwa kulinduwe, alimwi njoobuyumya-yumya bulelo bwakwe. 13Ngonguwe uyoondiyakila ŋanda, abwalo bulelo bwakwe njoobwiimikizya kukabe kutamani. 14Njooba wisi, walo uyooba mwanaangu. Kufumbwa aakucita cibi, njoomuuma mbuli wisi mbwalaya mwanaakwe. 15Pele luyando lwangu lupati nsikoyoolugwisya kulinguwe, mbuli mbwindakacita kuli Saulu, walo ngundakakaka kolibwenene ayebo. 16Mukwasyi abulelo bwako ziyooima nji kulindime kukabe kutamani, acalo cuuno cako ciyooimikwa mane kukabe kutamani.’”
17Natani wakaambila Devedi zyoonse Mwami Leza nzyaakamuyubunwida.
Devedi mbwaakakomba
(1 Makani 17.16-27)
18Mpoonya aawo Devedi wakanjila mucikombelo ca Mwami Leza akupaila wati, “Ino mebo ndimeni, O Mwami Leza Singuzuzyoonse, alimwi mukwasyi wangu ulibuti kuti yebo undeendelezye kusika sunu?” 19Pele lino ucita ziindilila eezi, alimwi waamba makani aalunyungu lwamubelesi wako kuciindi ciboola. Sena oobu mbocitila muntu buyo O Mwami Leza Singuzuzyoonse. 20Ino inga mebo ndaamba nzi kulinduwe? Nduwe oondizi mbwebede ndemubelesi wako, O Mwami Leza Singuzuzyoonse. 21Wacita zyoonse eezi nkaambo kacisyomezyo akuyanda kwamoyo wako nkookandicitila, kuti mebo ndemubelesi wako ndizibe.
22Nkaako ulalemekwa kwiindilila yebo, O Mwami Leza Singuzuzyoonse, taakwe uuli mbuli nduwe, kwiindila muli ceeci ncitwakalimvwida lwesu tobeni taakwe Leza uumbi kunze lyako. 23Ino musyobo nzi uuli mbuli bantu bako Baisilayeli, aabo Leza mbaakavuna kuti babe bantu bakwe, kuti abe aampuwo akubacitila zintu zipati zigambya? Waitanda misyobo iimbi amituni yayo kuzwa kubantu bako mbookanununa kuzwa ku Ijipiti. 24Alimwi wakaliimizya bantu bako, bantu Baisilayeli kuti babe bantu bako kukabe kutamani, kuti ayebo O Mwami Leza, ube Leza wabo.
25“Lino, O Mwami Leza sinizya kukabe kutamani majwi aayo ngooamba kumubelesi wako akumukwasyi wakwe, ucite mbubonya mbuli mbooamba. 26Ndendilyo zina lyako lyoonse nolinoolemekezegwa mane kukabe kutamani bantu kabati, ‘Mwami Leza Singuzuzyoonse ngo Leza wa Isilayeli,’ awalo mukwasyi wamubelesi wako Devedi uyookkalilila kulinduwe. 27Nkaambo nduwe, O Mwami Leza Singuzuzyoonse, Leza wa Baisilayeli, ooyubununa eezi kumubelesi wako koti, ‘Njookkazikizya mukwasyi wako.’ Nkankakaako ncindakaba aacamba kukukomba boobu Mwami Leza Singuzuzyoonse.
28“Lino, O Mwami Leza, nduwe Leza, alimwi majwi aako ngabwini, alimwi wasyomezya eeci cintu kumubelesi wako. 29Aboobo lino cakubotelwa, leleka mukwasyi wamubelesi wako, kuti lyoonse ukkalilile kulinduwe mane kukabe kutamani. Nkaambo nduwe, O Mwami Leza, ooamba alimwi acileleko cako mukwasyi wamubelesi wako uyoolelekwa mane kukabe kutamani.”
Currently Selected:
2 Samuyele 7: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
