2 Samuyele 8

Devedi mbwaakazunda

(1 Makani 18.1-17)

1Kusule azeezi Devedi wakalwana Bafilisiti akubazunda, wakatola munzi wa Metegama kuzwa ku Bafilisiti aabo. 2Alimwi wakazunda Bamowabu. Wakabalazika ansi akubeeleka antambo. Eelyo wakeeleka milongo yobilo kuti ijayigwe, alimwi mulongo omwe wakazwide wakuuleka kuti kuucipona. Aboobo Bamowabu wakabacita kuti kabatela kulinguwe.

3Alimwi Devedi wakazunda Hadadeza, mwanaa Lehobu mwami wacisi ca Zoba, ciindi Hadadeza naakali kukwakwabula cisi cakwe kusikila kumulonga wa Yufuletisi. 4Mpoonya Devedi wakatola kuzwa kulinguwe basimabbiza bali cuulu amyaanda iili ciloba, abasilumamba balizyuulu zili makumi obilo, eelyo wakakosoola misisa yamabbiza oonse, wakaleka buyo aankalaki zili mwaanda. 5Nkabela ciindi Baalamu baku Damasikasi nibakasika kuzoogwasya Hadadeza, Devedi wakajaya baalumi baku Siliya bali zyuulu zili makumi obilo azibili. 6Mpoonya wakabikka basilumamba mu Siliya yamu Damasikasi, nkabela Baalamu bakaba bazike ba Devedi akutalika kutela. Eelyo Leza wakagwasya Devedi kuti azunde kufumbwa ooko nkwaaya. 7Aboobo Devedi wakatola ntobo zyangolida eezyo zyakabwezedwe abazike ba Hadadeza wazileta ku Jelusalemu. 8Nkabela kuzwa ku Beta a Belotayi, minzi ya Hadadeza, mwami Devedi wakabweza mukuba munji kapati.

9Lino ciindi Toyi mwami waku Hamati naakamvwa kuti Devedi wakazunda basilumamba boonse ba Hadadeza, 10Toyi wakatuma mwanaakwe Jolamu kuti akajuzye Devedi akumulumbaizya, mukuti wakalwana Hadadeza akumuzunda, Hadadeza ooyu lyoonse wakajisi nkondo a Toyi. Nkabela Jolamu wakatolelezya azintu zyansiliva angolida azyamukuba. 11Lino Devedi wakapa ku Mwami Leza zintu zyoonse eezi kubikkilizya amali aansiliva, aangolida. Zyoonse eezi wakazipa kuzwa kumisyobo yoonse njaakazunda, 12kuzwa ku Edomu aku Mowabu aku Baamoni aku Bafilisiti aku Baameleki akusaala zya Hadadeza mwanaa Lehobu, mwami waku Zoba.

13Nkaako Devedi lwakwe wakaba aampuwo mpati. Ciindi naakapiluka, wakajaya Baedomu bali zyuulu zili kkumi alusele mukkuti lya Munyo. 14Wakabikka basilumamba mu Edomu, nkabela boonse Baedomu bakaba bazike bakwe. Mwami Leza wakagwasya Devedi kuti azunde koonse nkwaaya.

15Mbombuboobu Devedi mbwaakeendelezya mu Isilayeli yoonse, Devedi wakali kubeteka bantu bakwe boonse cabululami. 16Jowabu mwanaa Zeluiya ngowakali silutwe wabasilumamba, Jehosyafati mwana wa Ahiludi ngowakali mulembi wamakani. 17Zadoki mwana wa Ahitubi a Ahimeleki mwana wa Abiyata mbebakali bapaizi, Selayiya ngowakali mulembi, 18Benaiya mwanaa Jehoiyada wakali ngosilutwe wa Bakeleti a Bapeleti, eelyo bana balombe ba Devedi bakali balailili.

Currently Selected:

2 Samuyele 8: Tonga96

Highlight

Copy

Compare