2 Bami 20
20
Mwami Hezekiya mbwaakaciswa akupona
(Izaya 38.1-8, 21-22; 2 Makani 32.24-26)
1Lino ciindi eeco mwami Hezekiya wakaciswa calufu. Eelyo Izaya musinsimi, mwana wa Amozi, wakasika kulinguwe wati, “Mboobu mbwaamba Mwami Leza, ‘Bamba kabotu zyoonse nkaambo ulafwa, totipone pe.’”
2Mpoonya Hezekiya wakafutatuka walanzya kubwaanda, wakomba ku Mwami Leza wati, 3“O Mwami Leza koibaluka lino mbuli mbundakakutobela cakusyomeka akulipa kulinduwe cakumaninina alimwi ambundakacita zikubotela.” Amane wakalila kapati.
4Lino majwi aa Mwami Leza akasika kuli Izaya aakuti, 5“Piluka alimwi, waambile Hezekiya musololi wabantu bangu kuti ‘Mboobu mbwaamba Mwami Leza wa Devedi sikale wako’ ulati, ‘Ndamvwa kukomba kwako alimwi ndabona misozi yabuumba bwako, lino ndilakuponya. Aboobo mubuzuba bwatatu kuzwa sunu uyoonjila muŋanda ya Mwami Leza. 6Ndilayungizizya buumi bwako myaka iili kkumi aisanu. Ndilakuvuna yebo amunzi ooyu kuzwa kumwami waku Asiliya, ndiluukwabilila munzi ooyu akaambo kangu akamubelesi wangu Devedi.’”
7Mpoonya Izaya wakati, “Amubambe cibunge cankuyu.” Bakacita oobo akucibikka aacuute, eelyo wakapona.
8Hezekiya wakabuzizye Izaya kuti, “Ino kuyooba citondezyo nzi cakuti ndiyooinka kuŋanda ya Mwami Leza mubuzuba bwatatu?”
9Eelyo Izaya wakati, “Nceeci citondezyo cakuti Mwami Leza uyoocita mbwaasyomezya. Sena cimvule cilaya kumbele ntaamo zili kkumi naa cilaya munsi ntaamo zili kkumi?” 10Hezekiya wakaingula kuti, “Ncuubauba kuti cimvule ciye kumbele ntaamo zili kkumi, tubone acipiluke musule ntaamo zili kkumi.” 11Mpawo Izaya musinsimi wakalilila Mwami Leza, nkabela wakapilusya cimvule ntaamo zili kkumi nzicakaindide kale kweendelana acipimyo ca Ahazi.
Batumwa bakazwa ku Babuloni
(Izaya 39.1-8)
12Ciindi eeco Melodakibaladani mwanaa Baladani mwami waku Babuloni wakatuma batumwa amagwalo, acipo kuli Hezekiya nkaambo wakamvwa kuti Hezekiya wakali kuciswa cakufwa. 13Nkabela Hezekiya wakatambula batumwa aabo cakukondwa, akubatondezya ziyobwedo zyansiliva, ngolida, tununkilizyo amafuta aakeengwa kabotu, aciyobwedo cazilwanyo azimwi zyoonse zyakali muziyobwedo. Taakwe nociba comwe camuŋanda yabwami naa bulelo Hezekiya ncaatakabatondezya pe. 14Mpoonya Izaya musinsimi wakasika kumwami Hezekiya akubuzya kuti, “Ino bantu aaba baamba nzi, alimwi bazwida kuli?”
Lino Hezekiya wakaingula kuti, “Bazwa ku Babuloni.”
15Walo wakabuzya kuti, “Ino ncinzi ncibabona muŋanda yako?”
Hezekiya wakati, “Bazibona zintu zyoonse zili muŋanda yangu, taakwe cintu neciba comwe ncindatabatondezya muziyobwedo.”
16Mpawo Izaya wakaambila Hezekiya kuti, “Swiilila, mboobu mbwaamba Mwami Leza ulati, 17‘Bona, mazuba ayoosika, zintu zyoonse basikale bako nzibakayobwede kusikila sunu niziyootolwa ku Babuloni. Taakwe ciyoosyaala mbwaamba Mwami Leza. 18Nkabela bamwi balunyungu lwako abamukowa wako bayootolwa, bayooba bazike muŋanda yamwami waku Babuloni.’” 19Mpoonya Hezekiya wakaambila Izaya kuti, “Majwi aa Mwami Leza aayo ngooamba mabotu.” Mukwaamba boobo Hezekiya wakali kuyeeya kuti, “Kunooli luumuno alukwabililo mubuumi bwakwe.”
Mamanino aakulela kwa Hezekiya
(2 Makani 32.32-33)
20Lino eezyo Hezekiya nzyaakacita amilimo yakwe yoonse, ambwaakasya ciziba kankolola kakuleta maanzi kumunzi, zililembedwe mubbuku lyamakani aabami ba Juda. 21Hezekiya wakafwa akuzikkwa abasikale bakwe, eelyo Manase mwanaakwe nguwakaba mwami mubusena bwakwe.
Currently Selected:
2 Bami 20: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
