2 Bami 21

Mwami Manase waku Juda

(2 Makani 33.1-20)

1Manase wakajisi myaka iili kkumi aibili naakatalika kulela, nkabela wakalela kwamyaka iili makumi osanwe aisanu mu Jelusalemu. Banyina bakali Hefuziba. 2Walo ooyu wakabisizya Mwami Leza mukutobela zisesemyo zyamisyobo eeyo Mwami Leza njaakatandila Baisilayeli. 3Wakayakulula malende aayo wisi Hezekiya ngaakamwaide. Wakayaka zipaililo zya Baali akupanga mituni yaleza mukaintu Asyela, mbubonya mbwaakacitide Ahabu mwami waku Isilayeli. Wakakotamina akukomba zyakujulu. 4Alimwi wakayaka zipaililo muŋanda ya Mwami Leza, mumonya oomo Mwami Leza mwaakaamba kuti, “Mu Jelusalemu mwendiyoobikka zina lyangu.” 5Alimwi wakayaka zipaililo mumabbuwa obilo aaŋanda ya Mwami Leza. 6Wakapaizya mwanaakwe mulombe mumulilo, wakali kulowa akusonda alimwi wakali kubuzya-buzya akubaŋanga, basimakakata abaamba aabafu. Wakacita zinyonyoono zinji-zinji kumbele lya Mwami Leza, aboobo wakamunyemya. 7Lino mutuni mubeze wa Asyela wakuubikka muŋanda njiyonya eeyo Mwami Leza njaakaambide Devedi a Solomoni mwanaakwe kuti, “Muŋanda eeyi mu Jelusalemu ngwindakasala kuzwa kumisyobo yoonse ya Isilayeli mwendiyookombelwa lyoonse. 8Nkabela nsikooyootuntulisya limbi Baisilayeli kuzwa munyika eeyo njindakapa basikale babo, kufumbwa buyo kuti kabacita cili coonse ncindakabalailila, akubamba mulawo woonse ooyo mubelesi wangu Mozesi ngwaakabapa.” 9Pele taakwe nibakaswiilila pe, Manase wakabasowa akubasolweda mukubisya kwiinda misyobo eeyo Mwami Leza njaakabanyonyweeda Baisilayeli.

10Lino Mwami Leza wakabaambila kwiindila mubabelesi bakwe basinsimi kuti, 11“Nkaambo kakuti Manase mwami wa Juda wakacita zisesemyo eezi, wacita zibi ziinda Baamoli, aabo bakamusaangunina, alimwi wasolweda bantu ba Juda mukucita zinyonyoono amituni yakwe.” 12Nkaako mboobu mbwaamba Mwami Leza wa Isilayeli, “Amubone ncobeni ndilamuletela mapenzi aagambya mu Jelusalemu nkabela kufumbwa muntu uyoomvwa, uuyoozingwa kapati. 13Ndiyoosubula Jelusalemu mbubonya mbuli mbundakasubula Samaliya a Ahabu, njoosalazya Jelusalemu mbuli muntu mbwapukuta mutiba, akuuvuntamika. 14Eelyo njookaka bantu basyeede balukono lwangu akubaaba kuli sinkondonyina. Nkabela bayoosaalwa akunyonyoonwa abasinkondonyina boonse, 15nkaambo bakandibisizya akundinyemya kuzwa mubuzuba nindakagwisya basikale babo mu Ijipiti kusikila sunu.”

16Kutali boobo buyo Manase wakatila bulowa bunji bwabantu batakwe milandu, cakuti bwakazula mu Jelusalemu kuzwa kumatalikilo kusikila kumagolelo, kutaamba zibi nzyaakasolweda bantu ba Juda cakuti bakabisizya Mwami Leza. 17Lino eezyo zyoonse Manase nzyaakacita azimwi kubikkilizya acinyonyoono cakwe zililembedwe mubbuku lyamakani aabami ba Juda. 18Aboobo Manase wakafwa akuzikkwa abasikale bakwe, wakazikkilwa mumuunda wakwe, mumuunda wa Uza, eelyo Amoni mwanaakwe nguwakaba mwami mubusena bwakwe.

Mwami Amoni wacisi ca Juda

(2 Makani 33.21-25)

19Amoni wakajisi myaka iili makumi obilo aibili naakatalika kulela, nkabela wakalela kwamyaka yobilo mu Jelusalemu. Banyina bakali ba Mesyulemeti mwanaa Haluzi uuzwa ku Jotiba. 20Awalo ooyu wakabisizya Mwami Leza mbubonya mbuli Manase wisi. 21Wakatobela nzila zyawisi wakakomba mituni yakali kukomba wisi akwiikotamina. 22Wakasiya Mwami Leza wabasikale bakwe, alimwi taakatobela nzila zya Mwami Leza. 23Balupati-pati ba Amoni bakamubukila akumujaya muŋanda yakwe yabwami. 24Pele bantu bacisi bakajaya bantu aabo boonse bakabukila mwami Amoni, bamane bakabikka Josiya mwanaakwe kuba mwami mubusena bwakwe. 25Lino eezyo zyoonse Amoni nzyaakacita, azimwi zililembedwe mubbuku lyamakani aabami ba Juda. 26Mpawo wakazikkwa mucuumbwe cakwe mumuunda wa Uza, eelyo Josiya mwanaakwe nguwakaba mwami mubusena bwakwe.

Currently Selected:

2 Bami 21: Tonga96

Highlight

Copy

Compare