2 Bami 11
11
Mwami mukaintu Ataliya wacisi ca Juda
(2 Makani 22.10—23.15)
1Lino ciindi mwami mukaintu Ataliya banyina Ahaziya naakamvwa kuti mwanaakwe wajaigwa, wakalailila kuti bamukwasyi wabwami boonse bajaigwe. 2Pele Jehosyeba, mwana musimbi wamwami Jeholamu, mucizi wa Ahaziya wakabweza Jowasyi mwana wa Ahaziya, wamulobosya kuzwa kumukwasyi wabwami, wabaabo bakeelede kujaigwa, wakamusisa asikumulela kuzyuli lyaŋanda ya Leza kuti Ataliya atamuboni, nkaako taakwe naakajaigwa pe. 3Wakakkala anguwe kwamyaka iili cisambomwe kamusiside muŋanda ya Leza ciindi Ataliya naakali kulela.
4Pele mumwaka waciloba Jehoiyada wakatumina basilutwe babasilumamba bali mwaanda basikulinda mwami abalindizi baŋanda yabwami, wabanjizya muŋanda ya Mwami Leza. Wakapangana cizuminano ambabo akubakonkya kuŋanda ya Mwami Leza kuti bacite ceeco ncaakali kuyanda. Mpoonya wakabatondezya mwanaa mwami. 5Eelyo wakabalailila kuti, “Mboobu mbomweelede kucita, akati kankamu zyanu zyotatwe zibeleka mubuzuba bwa Sabata, imwi ibelekele kuŋanda yamwami, 6nkamu yabili kiili kumulyango wa Suu, yatatu kiili kusule aamulyango wabalindizi babalizyanya kulanga ŋanda ya Mwami Leza. 7Lino kwaamba ndinywe nonkamu zyobilo nomutabeleki mubuzuba bwa Sabata mukalindile ŋanda ya Mwami Leza kukwabilila mwami. 8Muleelede kuyookwabilila mwami Jowasyi kamumuzingulukide, umwi aumwi kajisi azilwanyo zyakwe mujanza, nkabela kufumbwa ooyo uuyooswena munsi-munsi mukamujaye. Kamuli munsi-munsi amwami kufumbwa nkwaaya.”
9Basilutwe aabo bakacita mbuli Jehoiyada mupaizi mbwaakalailila, umwi aumwi wakaleta bantu bankamu yakwe aabo bakeelede abatakeelede kubeleka mu Sabata, eelyo bakaza kuli Jehoiyada mupaizi. 10Mpawo mupaizi wakapa basilutwe masumo antobo zyakali zyamwami Devedi, zyakabikkidwe muŋanda ya Mwami Leza. 11Eelyo balindizi bakandandama umwi aumwi kajisi azilwanyo zyakwe, kuzwa kubbazu lyakumusanza kusikila kubbazu lyakunyika, kuzinguluka mwami, kumbali aacipaililo aŋanda ya Mwami Leza. 12Mpoonya Johoiyanda abana bakwe balombe bakagwisya mwanaa mwami anze bamubikka musini akumupa buku lyamilawo yabwami akumwaamba kuti ngo mwami, aboobo bakamunanika kabakamba kabati, “Aongole mwami!”
13Ataliya naakamvwa kuyobeka kwabalindizi abantu, wakainka wakaakunjila muŋanda ya Mwami Leza mwakali bantu, 14naakalanga wakabona mwami uliimvwi munsi aamusemu, mbubonya mbuli cilengwa. Basilutwe abasimyeembo bakaliimvwi kumbali aamwami. Bantu boonse bacisi bakali kusekelela akusiba myeembo. Mpawo Ataliya wakazapaula zyakusama zyakwe mukunyema, wapozomoka wati, “Mbuzangi! Mbuzangi!” 15Mpoonya Jehoiyada mupaizi wakalailila basilutwe bankamu zyamyaanda kuti, “Amumukwelele kuli basilumamba, kufumbwa muntu uuti mutobele ajaigwe. Kwaamba zyanguwe mwami mukaintu ooyu mupaizi wakaambide kuti, atajailwi muŋanda ya Mwami Leza pe.” 16Aboobo mbwaakasikila buyo kuŋanda yabwami kumanjililo aamulyango wa mabbiza, bakamujaya mpoonya aawo.
Jehoiyada mbwaakabukulusya bukombi bwini-bwini
(2 Makani 23.16-21)
17Lino Jehoiyada mupaizi wakapanga cizuminano akati ka Mwami Leza amwami antoomwe abantu bakwe, kuti balaba ba Mwami Leza. Amane wakapanga cizuminano akati kamwami abantu bakwe. 18Bantu boonse bamunyika eeyi bakainka kuŋanda ya Baali akuyooimwaya. Bakapwayaula zipaililo amituni yakwe alimwi bakajaya Matani mupaizi wa Baali mpoonya aawo kumbele lya zipaililo. Alimwi Jehoiyada mupaizi wakabikka balindizi kuŋanda ya Mwami Leza. 19Basilutwe bamyaanda, abasikulinda mwami, abalindizi kuŋanda ya Mwami Leza abantu boonse bamunyika antoomwe bakaleta mwami kuzwa kuŋanda ya Mwami Leza, bamuleta kuŋanda yabwami. Bakanjila kumulyango wabalindizi. Aboobo wakakkala acuuno cabwami. 20Bantu bacisi boonse bakatangala, munzi woonse wakaliliibide nkaambo Ataliya wakajaigwa apanga kuŋanda yabwami.
21Jowasyi wakali aamyaka iili ciloba naakaba mwami.
Currently Selected:
2 Bami 11: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
