2 Bami 12

Mwami Jowasyi wacisi ca Juda

(2 Makani 24.1-16)

1Mumwaka waciloba wakulela kwa Jehu, Jowasyi wakatalika kulela, nkabela wakalela kwamyaka iili makumi one mu Jelusalemu. Banyina bakali ba Zibiya bazwa ku Biiyasyeba. 2Jowasyi wakali kucita ziluleme ku Mwami Leza mumyaka yoonse Jehoiyada mupaizi naakali kumulailila. 3Nikuba boobo zipaililo zyamalende taakwe naakazimwaya pe, bantu bakacili kupaizya akutenta tununkilizyo ali nzizyo.

4Mpawo Jowasyi wakaambila bapaizi kuti, “Mali oonse aapedelwa cipaizyo kuŋanda ya Mwami Leza, amali aamutelo alimwi amali muntu omwe-omwe ngaleta mukuliyandila mwaatambule. 5Bapaizi baatambule mali aayo kuzwa kubantu mbobakutaukila kuti ŋanda ya Mwami Leza ibambululwe. 6Pele mumwaka wamakumi obilo aitatu wakulela kwa Jowasyi, bapaizi tiibakanabambulula ŋanda ya Mwami Leza pe. 7Nkaako mwami Jowasyi wakaita Jehoiyada mupaizi abapaizinyina, akubabuzya kuti, ‘Ino nkaambo nzi nomutanabambulula ŋanda ya Mwami Leza? Lino amuleke kutambula mali, mwaalete kutegwa abambuluzye ŋanda ya Mwami Leza.’” 8Aboobo bapaizi bakazumina kuti kabatacitambuli mali kuzwa kubantu alimwi kuti lwabo tabatibambulule ŋanda eeyo.

9Mpoonya Jehoiyada mupaizi wakabweza bbokesi, wadonkola cipulo acivunisyo akulibikka kumbali aacipaililo kubbazu lyakululyo, munsi aamulyango wa muŋanda ya Mwami Leza. Bapaizi bakali kulindila aamulyango bakabikka mulindilyo mali oonse aakaletwa muŋanda ya Mwami Leza. 10Lyoonse bali kunga babona kuti mali avula mubbokesi, mulembi wamwami amupaizi mupati bakali kusika akubala mali aayo akwaaanga mutusaka. 11Alimwi bali kunga baziba mweelwe wamali bakali kupa baabo bakasalidwe kweendelezya mulimo wakuŋanda ya Mwami Leza. Ngangawo ngibakabelesya kubbadela babelesi, babezi, bayaki, 12bayasya mabwe ababeza mabwe. Bakaula mapulanga, amabwe aabezedwe aakubambuluzya ŋanda. 13Mali aaya aakaletwa muŋanda ya Mwami Leza taakwe naakabelesegwa mukupanzya mitiba yansiliva, mano amitiba yakusansaizya, myeembo niciba cibelesyo cimwi cangolida niciba cansiliva cakuŋanda ya Mwami Leza. 14Mali aaya akabbadelwa buyo babelesi bakabeleka bakaabelesya mukubambulula ŋanda ya Mwami Leza. 15Pele tabeelede kupandulula mbubakabelesya mali aayo nkaambo balasyomeka. 16Pele mali aazipaizyo zyamilandu aazyacinyonyoono taakwe naakaletwa kuŋanda ya Mwami Leza pe, akali aabapaizi.

17Ciindi eeco Hazayeli mwami waku Alamu wakainka kuyoolwana munzi wa Gati, akuuzunda. Kumane Hazayeli wakaya kukulwana Jelusalemu, 18mpawo Jowasyi mwami wacisi ca Juda, wakabweza zipego zisalala zyakapede Jehosyafati, Jeholamu a Ahaziya bami bacisi ca Juda alimwi azipego nzyaakapede lwakwe mwini kubikkilizya angolida yoonse yakali muziyobwedo zyaŋanda ya Mwami Leza aŋanda yabwami. Wakatumya zintu eezi kuli Hazayeli mwami waku Alamu. Mpoonya Hazayeli wakaleka makanze aakulwana Jelusalemu.

19Lino zyoonse Jowasyi nzyaakacita azimwi zililembedwe mubbuku lyamakani aabami ba Juda. 20Balupati-pati bakwe bakamubukila akumujaya ku Betimilo, munzila iiya ku Sila. 21Balupati-pati bakamujaya bakali ba Jozakaa mwanaa Syimeyati alimwi a Jehozabadi mwanaa Syona. Wakafwa akuzikkilwa mu Jelusalemu. Mpawo Amaziya mwanaakwe nguwakalela mubusena bwakwe.

Currently Selected:

2 Bami 12: Tonga96

Highlight

Copy

Compare