2 Makani 26
26
Mwami Uziya wacisi ca Juda
(2 Bami 14.21-22; 15.1-7)
1Mpoonya bantu boonse bacisi ca Juda bakasala Uziya wakali amyaka iili kkumi acisambomwe, wakaba ngomwami mubusena bwa Amaziya wisi. 2Ooyu nguwakayakulula munzi wa Elati naakuutola lyakafwa wisi.
3Uziya wakali amyaka iili kkumi acisambomwe naakaba mwami, nkabela wakalela mu Jelusalemu kwamyaka makumi osanwe aibili. Banyina bakali Jekoliya bamu Jelusalemu. 4Ooyu wakali kucita ziluleme ku Mwami Leza, mbuli Amaziya wisi. 5Wakali kubelekela Mwami Leza mubuumi bwa Zekaliya ooyo wakali mulailili wakwe muli zyabukombi. Leza wakapa kuti azwidilile kwaciindi coonse naakali kumubelekela.
6Uziya wakalwana Bafilisiti. Wakoola bwaanda bwa Gati, Jabune a Asyidodi, amane wakayaka minzi iikwabililidwe munsi aku Asyidodi, alimwi amumasena aamwi aamu Filisiti. 7Leza wakamugwasya kuzunda Bafilisiti aba Alabu bakali kukkala mu Gubaali a Bameuni. 8Baamoni bakali kutela kuli Uziya, nkabela mpuwo yakwe yakamvwigwa aku Ijipiti, nkaambo kakuti wakali aanguzu kapati.
9Lino Uziya wakakwabilila lukwakwa lwa Jelusalemu, mukuyaka maanda malamfu kumulyango wakucooko akumulyango wakkuti, alimwi akokuya kunyonena lukwakwa.
10Kuzwa waawo wakayaka aambi maanda malamfu munkanda akusya zitelekezyo zinji, nkaambo wakajisi zivubwa zinji kunselelo lyazilundu amucibanda. Nkaambo kakuti wakali mulimi, wakaambila bantu kulima myuunda yansaansa muzilundu alimwi amunyika yambolezi.
11Wakalijisi mpi mpati iicibwene kulwana. Mabbuku aabwaapauzi bwayo akali kubambwa abalembi bakwe aaba, Jeiyeli a Maaseiya bakali kulangwa a Hananiya umwi wabalupati-pati bamwami. 12Mpi eeyi yakali kulangwa abasololi bamikwasyi bali zyuulu zyobilo amyaanda iili cisambomwe. 13Bakali kulanga basilumamba bali zyuulu zili myaanda yotatwe aciloba amyaanda yosanwe aabo bakacibwene kulwana ncobeni alimwi bakali kukonzya kukwabilila mwami kuzwa kulibasinkondonyina. 14Uziya wakapa basilumamba aaba ntobo, masumo, zingundu, zisani zyakulwanya, mata, nkwibba amabwe aazyo.
15Mu Jelusalemu bantu bakwe basongo bakabamba zibelesyo zyakufusa mivwi amabwe mapati kuzwida kumaanda malamfu azyooko zyalukwakwa. Nkaako mpuwo yakamvwigwa koonse-koonse, alimwi wakali aanguzu kapati nkaambo Leza nguwakali kumugwasya.
Uziya mbwaakasubulwa akaambo kakulisumpula kwakwe
16Ciindi Uziya naakaba aanguzu, wakatalika kulisumpula, calo cakamupa kuti awe. Taakacili kusyomeka ku Mwami Leza wakwe cakuti wakaakuumpa tununkilizyo acipaililo catununkilizyo.
17Aawo Azaliya mupaizi antoomwe abapaizinyina basicamba bali lusele bakamutobela mukati, 18bakamwaambila cakaanzambwene kuti, “Taciluleme kuti yebo Uziya uumpe tununkilizyo ku Mwami Leza. Ooyo mulimo ngwabapaizi balunyungu lwa Aloni balo bakazandulwa kuti kabaumpa mbabo tununkilizyo kuzwa mubusena busalala oobu! Obisizya Mwami Leza tocijisi zileleko zyakwe pe.”
19Ciindi eeco wakaliimvwi muŋanda ya Leza kumbele lyacipaililo catununkilizyo kajisi acakuumpya tununkilizyo. Wakanyemena bapaizi, kacinyemede boobo wakaba aacinsenda ankumo.
20Ciindi Azaliya mupaizi mupati abapaizinyina baya bamwi nibakamulanga, bakabona kuti wabaacinsenda ankumo, aboobo bakamuzwisizya anze. Awalo lwakwe mwini wakalilibambilide kuzwa, nkaambo Mwami Leza wakamuuma.
21Mwami Uziya wakaba aacinsenda mane do kulufu lwakwe. Wakali kukkala muŋanda yakwe alikke, nkaambo taakali kusalala, aboobo taakali kukonzya kuya kuŋanda ya Mwami Leza. Eelyo Jonatani mwanaakwe nguwakali kulanga zyaŋanda yabwami, akweendelezya bantu bamucisi.
22Lino eezyo Uziya nzyaakacita kuzwa kumatalikilo kuyoosika kumamanino, zililembedwe mubbuku lya Izaya musinsimi.
23Uziya wakafwa, akuzikkwa munsi aabasikale bakwe ooko kwakali kuzikkilwa bami, nkaambo bantu bakati, “Wali sicinsenda.” Mpawo Jotamu mwanaakwe nguwakaba mwami mubusena bwakwe.
Currently Selected:
2 Makani 26: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
