2 Makani 25
25
Mwami Amaziya waku Juda
(2 Bami 14.2-6)
1Amaziya wakajisi myaka iili makumi obilo aisanu naakaba mwami nkabela wakalela kwamyaka iili makumi obilo afuka mu Jelusalemu. Banyina bakali ba Jehoyadini baku Jelusalemu. 2Wakacita ziluleme ku Mwami Leza, pele kutali aamoyo woonse. 3Lino bwami bwakwe nibwakakkazikika, wakajaya balupati-pati aabo bakajaya wisi naakali mwami. 4Pele taakwe naakajaya bana babo, pele wakacita mbubonya mbuli mbokulembedwe mubbuku lyamulawo wa Mozesi oomo Mwami Leza mwalailila kuti, “Bamawisi tabeelede kujaigwa akaambo kabana babo nikuba bana kujaigwa akaambo kabamawisi pe. Umwi aumwi uleelede kufwida cinyonyoono cakwe mwini.”
Nkondo a Baedomu
(2 Bami 14.7)
5Amaziya wakabunganya bantu bacisi ca Juda antoomwe akubaapaula kweendelana amikwasyi yabo kuli basilutwe babali zyuulu abamyaanda muzisi zya Juda a Benjamini. Eeci cakali kwaamba kufumbwa ulaamyaka iisika kumakumi obilo akwiindilila, eelyo kwakajanika kuti kwakali baalumi bakonzya kulwana bali zyuulu zili myaanda yotatwe. Aaba bakali kukonzya kulwanya masumo antobo. 6Kuzwa waawo wakabbadela basilumamba kuzwa ku Baisilayeli bali zyuulu zili mwaanda. Wababbadela matalenta aansiliva aali mwaanda. 7Pele umwi muntu wa Leza wakaza kulinguwe akuti, “Omwami, basilumamba Baisilayeli batainki anduwe kukulwana, nkaambo Leza talaambabo, nibaba bantu bamusyobo wa Efulemu. 8Nikuba kuti mukalwane cabusicamba buti, Leza uyoomulekelezya kuli basinkondonyoko, nkaambo ngulaa nguzu zyakugwasya nikuba kulekelezya.”
9Amaziya wakabuzya muntu wa Leza kuti, “Ino ndacita buti amatalenta aali mwaanda ngindakabbadelela basilumamba ba Baisilayeli aaba?”
Muntu wa Leza wakaingula kuti, “Mwami Leza ulakonzya kukupa manji kwiinda yaayo.”
10Aboobo Amaziya wakaambila basilumamba bakazwidide kumusyobo wa Efulemu kuti bapilukile. Eeci cakapa kuti basilumamba aaba banyemene ba Juda, bakainka kabakalede kapati.
11Lino Amaziya wakaliyumya-yumya akusolweda mpi yakwe kukkuti lyamunyo, ooko nkwaakaakujaya basilumamba ba Seiya bali zyuulu zili kkumi. 12Impi ya Bajuda yakajata abamwi basilumamba bali zyuulu zili kkumi, babatola ajeleele akubasukumina ansi cakuti bakali kufunzauka.
13Kwaciindi eeci basilumamba baya ba Baisilayeli Amaziya mbaakapilusya, aabo mbaatakazumizya kuyoolwana anguwe bakaakusaala minzi yacisi ca Juda iili akati ka Samaliya a Betiholoni. Bakajaya bantu bali zyuulu zyotatwe akusaala zintu zimwi zinji. 14Ciindi Amaziya naakapiluka kukujaya Baedomu, wakaletelezya atuleza twabantu baku Seiya. Twakaba tuleza twakwe, wakatalika kukomba akupaizya kuli ntuto. 15Nkaako bukali bwa Mwami Leza bwakamusikila Amaziya. Leza wakatumina musinsimi wakaakuti kulinguwe, “Nkaambo nzi ncokomba tuleza twabantu aaba, kayi teetwakakonzya kuvuna bantu bato kulinduwe?”
16Kacaambaula musinsimi, “Mwami wakaingula kuti, Sena twakakusala kuti ube mulailili kumwami? Leka ncoamba eeco! Ccita koyanda kujaigwa?” Aboobo musinsimi wakaleka naakaamba kuti, “Lino ndaziba kuti Mwami ukanzide kukujaya, nkaambo wacita cili boobu alimwi tooswiilila majwi aangu.”
Nkondo a Baisilayeli
(2 Bami 14.8-20)
17Amaziya mwami wacisi ca Juda naakamana kubuzya-buzya balailili bakwe wakatumya majwi aaya kuli Jehowasyi mwanaa Jehoyahazi, mwanaa Jehu, mwami wacisi ca Isilayeli kuti, “Uboole tuzoobone mulombwana.” 18Pele Jehowasyi mwami wa Isilayeli wakaingula Amaziya mwami wacisi ca Juda wati, “Kwakali ciyasa bamvimi ku Lebanoni, cakatumina mukamba waku Lebanoni, caakuti, ukwasye mwanaako kumwanaangu, kumane cilumbu-lumbu wakaboola akulyatauka ciyasa bavwimi!
19“Waamba kuti ndazunda Baedomu, eeci cakupa ntunda. Kotangala mukuzunda kwako ooko wamana kokkede kuŋanda, ino nkaambo nzi noyandaula mapenzi aati kuwisye yebo abantu bacisi ca Juda.”
20Pele Amaziya taakwe naakaswiilila, nkaambo Leza nguwakacitya boobu kuti amwaabe kuli Jehowasyi, mukuti bakali kukomba tuleza twa Baedomu. 21Nkaako Jehowasyi mwami waku Isilayeli wakalwana. Nkabela walo amwami wacisi ca Juda bakalwana ku Betisyemesyi mucisi ca Juda.
22Eelyo cisi ca Juda cakazundwa a Baisilayeli cakuti basilumamba bakatijila kumaanda aabo. 23Jehowasyi mwami wa Isilayeli wakajata Amaziya mwami wacisi ca Juda. Aawo Jehowasyi wakamuleta ku Jelusalemu waakumwaya lukwakwa lwamunzi ooyo, kutalikila kumulyango wa Efulemu kuyoosika kumulyango wacooko. Busena oobo mbwaakamwaya bwakali kulampa ntaamo zili myaanda yobilo. 24Amane wakatola ngolida, nsiliva azibelesyo zyamuŋanda ya Leza zyakali kulangwa a Obediedomu, kubikkilizya azyakali muziyobwedo zyaŋanda yabwami, wakatolelezya abaange ku Samaliya.
25Amaziya mwanaa Jowasyi mwami wacisi ca Juda wakapona kwamyaka iili kkumi aisanu kuzwa lyakafwa Jehowasyi mwanaa Jehowahazi mwami wacisi ca Isilayeli. 26Lino eezyo Amaziya nzyaakacita kuzwa kumatalikilo aakulela kwakwe kuyoosika kumamanino zililembedwe mubbuku lyamakani aabami ba Juda a Isilayeli. 27Kuzwa ciindi Amaziya naakazangila Mwami Leza, abalo bantu bamu Jelusalemu bakamubukila cakuti wakatijila ku Lakisyi, pele basinkondonyina bakamutobela akuyoomujaila nkuko. 28Mutumba wakwe wakaletwa amabbiza akuzoomuzikkila mu Juda abasikale bakwe.
Currently Selected:
2 Makani 25: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
