2 Makani 21
21
1Lino Jehosyafati wakafwa akuzikkwa abasikale bakwe mumunzi wa Devedi. Jeholamu mwanaakwe nguwakalela mubusena bwakwe.
Mwami Jeholamu wacisi ca Juda
(2 Bami 8.17-24)
2Jeholamu mwanaa Jehosyafati mwami waku Juda wakajisi bana bokwabo bali cisambomwe mbaa: Azaliya, Jehiyeli, Zekaliya, Azaliahu, Mikayeli a Syefatiya. 3Wisi wakabapede lubono mbuli nsiliva, ngolida azibelesyo zimwi, kubikkilizya aminzi imwi yakakwabililidwe mucisi ca Juda. Pele mukuti Jeholamu nguwakali mupati, Jehosyafati wakamubikka kuti abe mwami mubusena bwakwe.
4Ciindi naakakkazikika mubwami bwakwe, wakajaya bana bokwabo boonse abalupati-pati ba Baisilayeli.
5Jeholamu wakali amyaka iili makumi otatwe aibili naakaba mwami nkabela wakalela mu Jelusalemu kwamyaka iili lusele. 6Awalo wakatobela nzila zya Baisilayeli mbubonya mbuli bwakacitide mukwasyi wa Ahabu, alimwi wakakwata mwana wa Ahabu. Wakabisizya Mwami Leza. 7Nikuba boobo akaambo kacizuminano eeco Mwami Leza ncaakapangana a Devedi, Mwami Leza taakayanda kunyonyoona balunyungu lwakwe, nkaambo wakamusyomezya kuti alunyungu lwako uyoolela lyoonse.
8Mumazuba aa Jeholamu, Baedomu bakazangila cisi ca Juda, akulibikkila mwami wabo beni. 9Mpoonya wakainka ooko ankalaki zyakwe zyoonse, ooko Baedomu nkubakamuzinguluka, pele wakabuka masiku, wabapola. 10Mbombuboobu Baedomu mbobacizangide asunu. Ciindi nciconya eeco awalo munzi wa Libuna wakazanga, nkaambo Jeholamu wakaleka nzila ya Mwami Leza wabasikale bakwe. 11Wakayaka malende muzilundu zyoonse zyamu Juda, aboobo wakacitya bantu bamu Juda a Jelusalemu kuti babisizye Mwami Leza.
12Kumane Jeholamu wakatambula lugwalo kuzwa kuli Elija musinsimi luti, “Mboobu mbwaamba Mwami Leza wasikale wako Devedi ulati, ‘Tootobela nzila yauso Jehosyafati niiba ya Asa mwami wacisi ca Juda. 13Pele watobela nzila zyabami bacisi ca Isilayeli, aboobo wakacitya kuti bantu bamu Juda abamu Jelusalemu babisizye Mwami Leza, mbubonya bwakacita bamukwasyi wa Ahabu. Kuzwa waawo wakajaya bana bokwanu, aabo bali mmukwasyi wauso, alimwi bakali kabotu kwiinda nduwe. 14Nkaako Mwami Leza uyanda kusubula bantu bako, bana bako, bamakaintu bako, akunyonyoona nzyojisi zyoonse. 15Kwaamba nduwe ulaciswa cibongozi cinookomena kusikila ukazwe bula.’”
16Mwami Leza wakacita kuti Bafilisiti, Baalabu bakali kukkala mucisi ca Bakusyi babukile Jeholamu. 17Bakavumpa cisi ca Juda akutola zintu zyoonse zyakali muŋanda yabwami, kubikkilizya bana alimwi bamakaintu bamwami. Bakamusiila buyo Ahaziya wakali keela kubana bakwe balombe.
18Lino kuzwa waawo Mwami Leza wakacita kuti Jeholamu aciswe cibongozi citasilikiki. 19Kwamyaka yobilo cakali kuya bukomena cakuti bula bwakazwida anze, aawo wakafa kali mumacise aataambiki. Bantu bakwe tiibakakunka mulilo wadilwe mbubwakali kucitilwa basikale bakwe.
20Jeholamu wakali aamyaka iili makumi otatwe aibili naakatalika kulela, wakalela mu Jelusalemu kwamyaka iili lusele. Naakafwa taakwe wakausa pe, wakazikkwa mumunzi wa Devedi pele kutali muzyuumbwe zyabwami.
Currently Selected:
2 Makani 21: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
