2 Makani 22
22
Mwami Ahaziya wacisi ca Juda
(2 Bami 8.25-29; 9.21-28)
1Bantu bamu Jelusalemu bakabikka Ahaziya mwanaa Jeholamu wakali ngomusyoonto mubwami. Nkaambo bana balombe bapati bakajaigwa ciindi lyakasikide basikusaala antoomwe a Baalabu kuzivuka. Ahaziya mwanaa Jeholamu mwami wacisi ca Juda wakatalika kulela. 2Ahaziya wakali aamyaka iili makumi obilo aibili ciindi naakatalika kulela, nkabela wakalela kwamwaka omwe mu Jelusalemu. Banyina bakali ba Ataliya muzyukulu wa Omuli mwami wacisi ca Isilayeli. 3Ahaziya wakatobela nzila zyamukwasyi wa Ahabu nkaambo banyina mbibakali kumuyunga mukucita zibi. 4Wakabisizya Mwami Leza mbubonya mbuli bwakali kucita mukwasyi wa Ahabu, nkaambo lyakafwa wisi, bamukwasyi wa Ahabu mbibakali kumulailila, mbibakacita kuti akacilwe. 5Mbabonya aaba mbibakapa kuti ainke a Jolamu mwana wa Ahabu kuyoolwana a Hazayeli mwami waku Alamu ku Lamotigiliyadi. Ooko bakayasa mwami Jolamu. 6Mpoonya wakapiluka kuti akalimvwe kabotu kuzwa kuzilonda nzyaakayaswa a Baalamu ciindi nibakali kulwana a Hazayeli mwami wa Baalamu ku Lamoti. Mpawo Ahaziya mwanaa Jeholamu mwami wacisi ca Juda wakainka kuyoobona Jolamu mwana wa Ahabu ku Jezuliili nkaambo wakaliliciside.
7Leza wakacita kuti kuswaya kwa Ahaziya kuli Jolamu kuwisye Ahaziya. Ciindi Ahaziya naakasika wakainka a Jolamu kuyooswaangana a Jehu mwanaa Nimusyi, ooyo Mwami Leza ngwaakananika kuti akanyonyoone mukwasyi wa Ahabu. 8Ciindi Jehu naakali kusubula mukwasyi wa Ahabu wakaswaanganya basololi bakucisi ca Juda abana babasazinyina Ahaziya aabo bakasindikilide Ahaziya mukuswaya ooku. Jehu wakabajaya. 9Kuzwa waawo wakainka kuyoolangaula Ahaziya, baalumi bakwe bakaakumubbutumuna ku Samaliya nkwaakayubide. Bakamuleta kuli Jehu akuzoomujaya. Bakamuzikka nkaambo bakati, “Muzyukulu wa Jehosyafati, wakali kukomba Mwami Leza amoyo wakwe woonse.” Aboobo kwakacinyina uumbi singuzu wamukwasyi wa Ahaziya wakali kukonzya kulela.
Mwami mukaintu Ataliya wa cisi ca Juda
(2 Bami 11.1-3)
10Lino ciindi Ataliya banyina Ahaziya naakamvwa kuti mwanaakwe wafwa, wakalailila kuti bamukwasyi wabwami bwamusyobo wa Juda boonse bajaigwe. 11Pele Jehosyeba mwana musimbi wamwami Jolamu, wakabweza Jowasyi mwana wa Ahaziya, wamulobosya kuzwa kumukwasyi wabwami wabaabo bakeelede kujaigwa, wakamusisa akumulela kuzyuli lyaŋanda ya Mwami Leza. Jehosyeba mwanaa wamwami Jolamu wakali muka Jehoiyada mupaizi wakali mucizi wa Ahaziya. Wakasisa mwana kuzwa kuli Ataliya kuti atamujayi. 12Wakakkala anguwe kwamyaka iili cisambomwe kamusiside muŋanda ya Leza Ataliya kacilela.
Currently Selected:
2 Makani 22: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
