2 Makani 17
17
Jehosyafati mbwaakaba mwami
1Lino Jehosyafati nguwakalela mubusena bwa Asa wisi. Wakaliyumya kukulwana Baisilayeli. 2Nceeci ncaakacita, wakabikka basilumamba muminzi ya Juda yoonse yakakwabilidwe, akubikka bamwi mumabazu amwi aacisi ca Juda aminzi yaku Efulemu eeyo Asa wisi njaakatola. 3Mwami Leza wakali aa Jehosyafati nkaambo kakuti mumyaka yakwe yakusaanguna wakatobela nzila zyasikale wakwe Devedi. Taakakomba Baali. 4Pele wakakomba Leza wasikale wakwe akutobela milawo yakwe mubusena cazeezyo zyakali kucita Baisilayeli. 5Mwami Leza wakakkazikizya bwami bwa Jehosyafati cakuti bantu ba Juda boonse bakali kumuletela zipego, aboobo wakavuba akulemekwa. 6Wakalilipede kunzila zya Mwami Leza, kunze aakooko, wakamwaya malende amisumpuululu yaleza mukaintu Asyela kuzwa mucisi ca Juda.
7Mumwaka watatu wakulela kwakwe wakatuma balupati-pati bakwe aaba: Benihaili, Obadiya, Zekaliya, Netaneli a Mikaiya kuyooiisya muminzi ya Juda. 8Balevi bamwi bakainka ambabo mbaa: Syemaiya, Netaniya, Zebadiya, Asaheli, Syemilamoti, Jehonatani, Adonija, Tobiya, a Tobadonija antoomwe abapaizi ba Elisyama a Jeholamu. 9Bakaiisya bantu bamucisi ca Juda muminzi yabo bbuku lyamulawo wa Mwami Leza.
Kulemekwa kwa Jehosyafati
10Lino Mwami Leza wakacita kuti zisi amanyika oonse aakazingulukide Bajuda ayoowe kulwana amwami Jehosyafati. 11Bamwi Bafilisiti bakalikuletela Jehosyafati zipego ansiliva mbuli mutelo. Baalabu bakaleta zipego eezi: mbelele zili zyuulu zili ciloba amyaanda iili ciloba mpongo zili zyuulu zili ciloba amyaanda iili ciloba. 12Aboobo Jehosyafati wakali kuya buyuma. Wakayaka zikwabilizyo aminzi yaziyobwedo mu Juda. 13Muziyobwedo wakayobola zintu zinji. Alimwi wakabikka basilumamba bacibwene mu Jelusalemu. 14Mbubakalembwa kweendelana amikwasyi yabo mboobu, Adina nguwakali mulailili wabasilumamba baciinga ca Juda. Wakali kulanga basilumamba bali zyuulu zili myaanda yotatwe. 15Munsi aanguwe kwakali Jehohanani wakali aabasilumamba bali zyuulu zili myaanda yobilo amakumi aali lusele. 16Munsi aayooyu kwakali Amasiya mwanaa Zikili wakali kulanga basilumamba bali zyuulu zili myaanda yobilo. Amasiya ngonguwe wakalyaabide kubelekela Mwami Leza. 17Eliyada nguwakali mulailili wabasilumamba baciinga ca Benjamini, wakali silumamba uucibwene. Wakali kulanga basilumamba bali zyuulu zili myaanda yobilo bakali kubelesya ntobo amata. 18Munsi aayooyu kwakali Jehozabadi wakali kulanga basilumamba bali zyuulu zili mwaanda amakumi aali lusele, bakalizulizizye muzilwanyo. 19Aaba baalumi mbabakali kubelekela mwami mu Jelusalemu. Kunze aabaaba kwakali baabo bakabikkidwe muminzi iikwabililidwe mucisi ca Juda.
Currently Selected:
2 Makani 17: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
