2 Makani 16
16
Manyongwe a Isilayeli
(1 Bami 15.17-22)
1Mumwaka wamakumi otatwe acisambomwe wakulela kwa Asa, mwami wacisi ca Juda, mwami Baasya wakainka kuyoolwana cisi ca Juda, wakayakilizya munzi wa Lama kuti kubule uunjila nikuba kuzwa mucisi ca Juda. 2Pele mwami Asa naakabona boobo wakabweza nsiliva angolida eezyo zyakasyeede muŋanda ya Mwami Leza ayakwe mwini, wakazipa balupati-pati bakwe kuti bazitole kumwami Benihadadi waku Alamu wakali kulela mu Damasikasi. Wakati, 3“Atupangane bulongwe mbuli bwakacitide bamatata. Nsiliva angolida eezi ncipego cako. Ino mbuti kuti bulongwe bwanu a Baasya bwamana, kutegwa, agwisye basilumamba bakwe mucisi cangu.”
4Lino mwami Benihadadi wakuuzumina muzeezo wa Asa ooyu. Mpawo wakatuma bapati babasilumamba bakwe antoomwe abasilumamba babo kuyoolwana minzi ya Isilayeli. Bakaakuzunda minzi ya Ijoni, Dani, Ahelamaimu, kujatikizya aminzi yoonse yacisi ca Nafutali yakali ziyobwedo. 5Mwami Baasya naakamvwa cakacitika, wakaleka kuyakilila Lama, wausiya. 6Mpawo mwami Asa wakayobolola baalumi boonse baku Juda kuti bazoogwasye kubweza mabwe amapulanga kuzwa ku Lama aayo Baasya ngaakali kubelesya. Asa wakabelesya zintu eezi mukukwabilizya minzi ya Geba a Mizipa.
Zya Hamani musinsimi
7Ciindi eeco Hamani musinsimi wakaboola kuli Asa mwami wa Juda akuzooti kulinguwe, “Akaambo kakuti wasyomede mwami waku Alamu kutaamba Mwami Leza wako, basilumamba ba Baalamu tokabazundi. 8Tee Bakusyi a Balibya bakajisi nkalaki abasimabbiza banji nimpi njumu? Nikuba boobo nookasyoma Mwami Leza, Mwami Leza wakabaaba kulindinywe.
9“Mwami Leza nguulangilila nyika yoonse, kuti ayumye-yumye baabo bamusyoma amoyo woonse. Eeci ncookacita ncabufuba-fuba aboobo kuzwa lino unooli munkondo lyoonse.” 10Asa naakamvwa boobo wakanyema kapati wakaanzya musinsimi ooyo. Kutalikila ciindi eeco Asa wakatalika kucitila bamwi bantu lunya.
Mamanino aa bulelo bwa Asa
(1 Bami 15.23-24)
11Lino zyoonse eezyo Asa nzyaakacita kuzwa naakatalika kulela kusikila kumamanino, zililembedwe mubbuku lyabami ba Juda a Isilayeli. 12Mumwaka wamakumi otatwe afuka wakalela kwakwe, Asa wakaciswa myeendo. Nikuba kuti bulwazi oobu bwakali bupati, Asa taakwe naakalomba lugwasyo kuzwa ku Mwami Leza, wakali kuya buyo kubasilisi. 13Nikwakainda myaka yobilo wakafwa. 14Wakazikkwa mucuumbwe cakwe ncaakakolwede mwini mumunzi wa Devedi. Bakabelesya tununkilizyo amafuta kubamba mubili wakwe kuti buuzikke kabotu. Bakakunka bbibi lyamulilo kudilwe lyakwe.
Currently Selected:
2 Makani 16: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
