2 Makani 14
14
Mwami Asa mbwaakazunda Bakusyi
1Lino Abija wakafwa akuzikkwa mumunzi wa Devedi, eelyo Asa Mwanaakwe nguwakalela mubusena bwakwe. Mukulela kwa Asa kwakanyina nkondo kwamyaka iili kkumi.
2Asa wakacita zibotu alimwi ziluleme ku Mwami Leza wakwe. 3Wakamwaya zipaililo zyabukombi bwakunze, masena aakukombela mabwe aamalende, amituni yaleza mukaintu Asyela. 4Wakaambila bantu baku Juda kucita ziyanda Mwami Leza wabasikale babo mbuli kutobela milawo amalailile aakwe. 5Wakamwaya malende azipaililo zyawo zyakuumpila tununkilizyo muminzi yoonse yacisi ca Juda. Mukulela kwakwe kwakali luumuno mucisi. 6Nkaambo kakuti kwakali luumuno, wakakonzya kuyaka minzi iikwabilidwe. Kwakanyina wakacita nkondo anguwe ciindi eeco, nkaambo Mwami Leza nguwakamupede luumuno.
7Wakaambila bantu ba Juda kuti, “Atuyakulule minzi eeyi akwiizingulusya bwaanda mumbali, tuyakilizye amaanda malamfu, milyango azipingizyo. Tamubwene nyika njiyesu nkaambo tucita ziyanda Mwami Leza wesu, nkaako watukwabilila kuzwa kuli basinkondoma kuzwa kumabazu oonse.” Aboobo bakayaka akuzwidilila.
8Impi ya Asa yakajisi baalumi bali zyuulu zili myaanda yotatwe kuzwa kumusyobo wa Juda aaba bakajisi ntobo mpati amasumo. Kuzwa ku Babenjamini kwakali baalumi bali zyuulu zili myaanda yobilo amakumi aali lusele bakajisi ntobo zyeelede amata. Boonse aaba bakali basinkondo basicamba, bakaiisidwe kabotu.
9Lino Zela Mukusyi wakaza kuzoobalwana ampi yakwe mpati alimwi ankalaki zili myaanda yotatwe wakazoosika ku Malesya. 10Asa wakainka kuyoomulwana, wakandandamika basilumamba bakwe kukkuti lya Zefata lyakabambene a Malesya. 11Asa wakakomba ku Mwami Leza wakwe wati, “O Mwami Leza, taakwe uumbi uuli mbuli nduwe uukonzya kugwasya bateteete kuzwa kuli basinguzu. Tugwasye O Mwami Leza wesu, nkaambo nduwe ngotusyoma, muzina lyako twaboola kuzoolwana mpi eeyi mpati. O Mwami Leza nduwe Leza wesu, taakwe uukonzya kukuzunda.”
12Lino Mwami Leza wakazunda Bakusyi kuzundila Asa abantu ba Juda. Nkabela Bakusyi bakatija. 13Aboobo Asa ampi yakwe bakabatandaanya mane do ku Gela. Bunji bwa Bakusyi bakajaigwa cakuti tiibakakonzya kwiima akulwana alimwi. Mwami Leza wakabazunda ampi yakwe. Bantu ba Juda bakasaala zintu zinji-zinji. 14Bakakonzya kumwaya minzi yakazingulukide Gela, nkaambo bantu bamoomo bakayoowede Mwami Leza. Bakasaala minzi yoonse akutola zintu zinji-zinji zyakali mumo. 15Bakavumpa ntanga zyabeembezi batola mbelele, mpongo ankamela zinji kuzwa waawo bakapilukila ku Jelusalemu.
Currently Selected:
2 Makani 14: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
