2 Makani 15
15
1Lino muuya wa Leza wakasikila Azaliya, mwana wa Obedi. 2Mpawo wakanyamuka kuyooswaanganya Asa. Wakati, “Ndiswiilila, yebo Asa, kubikkilizya a Bajuda alimwi a Babenjamini. Mwami Leza unooli aanduwe kwaciindi coonse nconooli aanguwe, olikumulangaula unoomujana, pele kuti wamukaka awalo ulakukaka.” 3Kwaciindi cilamfu Baisilayeli tiibakajisi Leza wini-wini, mupaizi wakubaiisya, alimwi amulawo. 4Pele nibakanjila mumapenzi, bakapilukila ku Mwami Leza wa Isilayeli, bamulangaula akumujana. 5Kwamazuba aayo kwakanyina wakali kukonzya kweenda cakuliiba, nkaambo kwakali mapenzi amanyongwe mumanyika. 6Musyobo umwi wakali kumwaya musyobo uumwi, munzi umwi wakali kumwaya uumwi. Leza nguwakali kubaletela mapenzi amapyopyongano aaya. 7Lino kwaamba nduwe, koyuma utalilekeleli milimo yako iyoolumbulwa.
8Ciindi Asa naakamvwa businsimi bwa Azaliya mwana wa Obedi wakaba aacamba. Wakagwisya mituni iisesemya kuzwa muzisi zyoonse zya Juda a Benjamini kubikkilizya aminzi njaakazunda munyika yatulundu-lundu ya Efulemu. Wakayakulula cipaililo ca Mwami Leza eeco cakali mubbuwa lya ŋanda ya Leza.
9Bantu banji-banji kuzwida ku Efulemu, Manase a Simiyoni bakaba kulubazu lwa Manase. Bakakkala mubwami bwakwe nkaambo bakabona kuti Mwami Leza wakalaanguwe. Asa wakabunganya Bajuda a Babenjamini boonse. 10Bakazoobungana ku Jelusalemu mumwezi watatu mumwaka wakkumi aisanu wakulela kwakwe. 11Ciindi eeco bakapaizya ku Mwami Leza butanga bwaŋombe zili myaanda iili ciloba, ambelele ampongo zili zyuulu zili ciloba kuzwida kuli zeezyo nzibakasaala. 12Bakapanga cizuminano cakuti banookomba Mwami Leza wabasikale babo amoyo amuuya wabo woonse. 13Boonse batakooyookomba Mwami Leza wa Isilayeli baleelede kuyoojaigwa nobakomena, nibaba basyoonto, baalumi nibaba bakaintu. 14Cakupozomoka bakakonkezya muzina lya Mwami Leza kuti bayoobamba cizuminano eeci. Kuzwa waawo bakayobeka akusiba myeembo ampeta. 15Bajuda boonse bakatangala nkaambo bakakonkezya, kulumbila amoyo woonse. Bakalangaula Mwami Leza cabunkutwe akumujana. Nkaako Mwami Leza wakabapa luumuno kumabazu oonse.
Zyamwami Asa wa Juda
(1 Bami 15.9-24)
16Mwami Asa wakatanda banyinakulu ba Maaka acuuno camwami mukaintu, nkaambo bakapangide musumpuululu uusesemya waleza mukaintu Asyela. Asa wakuugonka wuukosoola, waakuuumpa mukkuti lya Kidiloni. 17Nikuba kuti taakamwaya malende aamu Isilayeli, moyo wa Asa wakali ku Mwami Leza mubuumi bwakwe boonse. 18Wakaleta muŋanda ya Leza, nsiliva, ngolida azibelesyo eezyo awisi nzibakapede ku Mwami Leza. 19Kwakanyina nkondo aimbi kusikila mumwaka wamakumi otatwe aasanu wakulela kwa Asa.
Currently Selected:
2 Makani 15: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
