1 Samuyele 6
6
Kubweedezegwa kwabbokesi lyacizuminano ca Mwami Leza
1Lino bbokesi lya Mwami Leza lyakali mucisi ca Filisitiya kwamyezi iili ciloba. 2Bafilisiti bakaita bapaizi abasondi akubabuzya kuti, “Tulicite buti bbokesi lya Mwami Leza? Amutwaambile, ino inga tulalitumizya buti nkulyakazwa kubusena bwalyo?”
3Bakabaambila kuti, “Kuti naa mwalipilusya bbokesi lya Leza wa Baisilayeli, mutalitumizyi buyo pele mweelede kutumizya azituuzyo zyakumanya milandu yesu kulinguwe. Mwacita oobo muyooponyesegwa, alimwi mulaziba ncaali kumusubwida.”
4Eelyo bakabuzya kuti, “Ino zituuzyo nzi nzyotunga twamutumizya?” Bakaingula kuti, “Zikoto zyosanwe zyangolida zikozya cuute ambeba zyosanwe zyangolida, mbubonya mbuli kumweelwe wabaleli ba Bafilisiti. Nkaambo zyuumo zyakamupenzya antoomwe abaleli banu. 5Muleelede kucita zikoto zikozya cuute ambeba zinyonyoona cisi canu mulemeke Leza wa Baisilayeli. Nkaambo ambweni inga ulaleka kumusubula nywebo, baleza banu acisi canu. 6Ino mwaba buti basicinguni mbuli Baijipiti a Falo? Ciindi naakamana kubasubula, sena tiibakaleka Baisilayeli kuti bainke? 7Lino amubweze, mulibambile nkalaki mpya ampwizi zyobilo zinyonsya zitanabopedwe pe, muzibope kunkalaki, pele bana bazyo mubaboozye kucimpati. 8Mpawo mutole bbokesi lya Mwami Leza, mulibikke munkalaki akuzilongela eezyo zintu zyangolida nzyomuyanda kutuuzya kulinguwe mbuli zituuzyo zyakumanya milandu yanu. Kwamana mulitumye, lyuunke. 9Ono kamulilangilide lyatolwa kucisi calyo mane kuyoosika ku Betisyemesyi. Kuti lyeende boobo muzibe kuti ngu Leza wa Baisilayeli wakatumide mapenzi aaya kulindiswe. Pele kuti naa talilulami nkuko, inga twaziba kuti talinguwe watusubula, nkokuti mapenzi aaya alisikila eeni.”
10Bakacita oobo, bakabweza mpwizi zyobilo zinyonsya, bakazibopa kunkalaki, bana bazyo bakabajalila mucaanda. 11Lino bakalilongela bbokesi lya Mwami Leza munkalaki antoomwe abbokesi lyakabikidwe mbeba zyangolida azikoto zyangolida zili mbuli zyuute. 12Mpwizi eezyo zyakatozya kunzila yakali kuya ku Betisyemesyi, kazitaleyi-leyi kuzwa mumugwagwa. Zyakali kuya bulila munzila yoonse. Abalo baleli ba Bafilisiti bakali kuya buziccilila kusikila kumunyinza waku Betisyemesyi.
13Ciindi eeco bantu baku Betisyemesyi bakali kutebula maila mukkuti, nibakati bazoonuunuke bakabona bbokesi lya Mwami Leza, mpawo bakakondwa kapati. 14Nkalaki yakiijisi yakasika kumuunda wa Josyuwa waku Betisyemesyi akwiima ooko munsi amundomba wabbwe. Bantu bamunzi ooyo bakapapaula mapulanga aankalaki akujaya pwizi eezyo bazitenta kuti cibe cipaizyo ku Mwami Leza. 15Lino Balevi bakagwisya bbokesi lya Mwami Leza abbokesi lyakayumwide zikoto zyangolida, bakazibikka atala andomba eelyo. Mpoonya bantu baku Betisyemesyi bakapa cipaizyo cakutenta azimwi zituuzyo ku Mwami Leza mubuzuba oobo mbubonya. 16Ciindi eeci baleli baya bosanwe ba Bafilisiti bakali kulangilizya Baisilayeli nibacita eeci bamane bakajokela ku Ekiloni mubuzuba mbubonya oobo.
17Mbombuboobu Bafilisiti mbubakatuma zikoto zyangolida zikozya cuute zyosanwe ku Mwami Leza mbuli cituuzyo cakumanya milandu yabo, comwe ncica Asyidodi, cimwi cakali ca Gaza, cimwi ca Syikeloni, cimwi ca Gati, cimwi ca Ekiloni. 18Azyalo mbeba zyangolida zyakali mbuli mweelwe waminzi yabaleli aaba bosanwe ba Bafilisiti yakayakilidwe kubikkilizya atunzi twayo. Ndomba eelyo nkolicili asunu mumuunda wa Josyuwa waku Betisyemesyi, aawo aakabikkidwe bbokesi lya Mwami Leza, kuti libe ciibalusyo caceeco cakacitika.
19Lino Mwami Leza wakajaya bamwi babaalumi baku Betisyemesyi nkaambo bakasondela mubbokesi lyacizuminano, nkabela aabo bakafwa bakasika kumakumi aali ciloba. Eelyo bantu bakalila, nkaambo Mwami Leza wakabauma kapati.
Bbokesi lyacizuminano ca Mwami Leza kumunzi wa Kiliyatijeyalimu
20Baalumi baku Betisyemesyi bakati, “Nguni uukonzya kwiima kumbele lya Mwami Leza, Leza uusalala uuloobuya? Ino ono tulalitumizya kuli bbokesi lyakwe?” 21Nkabela bakatuma nkombe kubantu bakumunzi wa Kiliyatijeyalimu, bakati, “Bafilisiti balipilusya bbokesi lya Mwami Leza. Amuze kuno, muzoolitole kulindinywe.”
Currently Selected:
1 Samuyele 6: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
