1 Samuyele 7
7
1Lino bantu bamumunzi wa Kiliyatijeyalimu bakalibweza bbokesi lya Mwami Leza akulitola kuŋanda ya Abinadabu yakayakidwe atala akalundu. Bakasala mwanaakwe mulombe Eliyazaa kuti alindilile bbokesi eelyo.
Samuyele mbwaakaendelezya mu Isilayeli
2Lino bbokesi lya Mwami Leza lyakakkala mumunzi wa Kiliyatijeyalimu kwaciindi cilamfu, kwamyaka iili makumi obilo. Ciindi eeci Baisilayeli boonse bakali kulilila Mwami Leza kuti abagwasye
3Lino Samuyele wakaambila Baisilayeli boonse kuti, “Kuti naa kamuyanda kupiluka ku Mwami Leza amyoyo yanu yoonse, muleelede kugwisya baleza bapange azikozyano zya Asyitaloti. Amulipe lwanu nobeni cakumaninina ku Mwami Leza akukomba nguwe buyo alikke, natikamuvune kuzwa ku Bafilisiti.” 4Mpawo Baisilayeli bakagwisya zikozyano zyabo zya ba Baali a Baasyitaloti akukakatila kukomba Mwami Leza alikke.
5Mpoonya Samuyele wakati, “Amubunganye Baisilayeli boonse ku Mizipa, kuti nkabakombelezezye ku Mwami Leza.” 6Nkabela boonse bakaakubungana ku Mizipa. Bakateka maanzi akwaatila kumbele lya Mwami Leza, alimwi bakaliimya kulya buzuba oobo boonse. Bakati, “Twakabisizya Mwami Leza.” Lino Samuyele wakali kukkala ku Mizipa kabeteka makani mu Isilayeli.
7Bafilisiti nibakamvwa kuti Baisilayeli balibungene ku Mizipa, bami ba Bafilisiti bakanyamuka kuti bakalwane Baisilayeli. Baisilayeli nibakamvwa kuti kwaza basikubalwana bakayoowa, 8bakaambila Samuyele bati, “Yebo utaleki kukomba ku Mwami Leza wesu kutegwa atuvune ku Bafilisiti.” 9Mpawo Samuyele wakabweza kabelele kacinyonka akukapa kuti kabe cipaizyo cakutenta ku Mwami Leza. Wakakomba ku Mwami Leza kuti agwasye Baisilayeli, pele ncobeni Mwami Leza wakamvwa kukomba kwakwe. 10Ciindi naakacili kupaizya, Bafilisiti bakaswena kuti babalwane, nkabela Mwami Leza wakayoosya Bafilisiti amuzumo wajwi pati. Eelyo Bafilisiti bakanyongana batija. 11Lino Baisilayeli nibakabona boobo bakazwa ku Mizipa akutandaanya Bafilisiti aabo, kabaya bubajaya munzila yoonse mane kunselelo lya Betikala.
12Samuyele wakabweza bbwe akulibikka akati ka Mizipa a Syeni, wakalyuulika kuti Ebeneza, nkokuti, “Kusikila sunu nguutugwasya.” 13Nkabela Bafilisiti bakazundwa, alimwi taakwe nibakazoosaala limbi cisi ca Isilayeli. Mwami Leza lwakwe nguwakali kulwana Bafilisiti muciindi coonse cabuumi bwa Samuyele. 14Lino minzi yoonse kuzwa ku Ekiloni kusikila ku Gati, eeyo Bafilisiti njibakatolede, yakabweedezegwa ku Baisilayeli. Mbombuboobu Baisilayeli mbubakajokezya nyika yakatoledwe a Bafilisiti. Kwakaba luumuno akati ka Baisilayeli a Baamoli.
15Samuyele wakali musololi mu Isilayeli mumazuba aabuumi bwakwe boonse. 16Mwaka amwaka wakali kuya buzingulukika akubeteka kuzwida ku Beteli ku Giligali aku Mizipa. 17Wanoonga amana, wapilukila kumunzi wakwe ku Lama, ooko akwalo nkwaakali kubeteka. Ku Lama wakayaka cipaililo ca Mwami Leza.
Currently Selected:
1 Samuyele 7: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
