1 Samuyele 29

Devedi mbwaakakakwa a Bafilisiti

1Lino Bafilisiti bakabunganya bamwi basilumamba babo ku Afeki, Baisilayeli bakayakide zivuka zyabo kumbali akasensa kaku Jezuliili. 2Nkabela bami ba Bafilisiti nibakali kweenda mumyaanda amuzyuulu, Devedi abantu bakwe bakali kuza buza musule antoomwe a Akisyi. 3Basilutwe ba Bafilisiti bakati, “Ino bacita nzi aaba Bahibulu kuno?”

Akisyi wakati kuli basilutwe ba Bafilisiti, “Ooyu ngu Devedi mubelesi wa Saulu mwami wa Isilayeli. Wakkala andime kwamazuba amyaka yeelede, kuzwa naakasika taakwe nindakamujanina cibi mane kusikila sunu.”

4Pele basilutwe ba Bafilisiti bakamunyemena Akisyi bakati kulinguwe, “Mupilusye ooyu muntu, kubusena bwakwe mbookamupa. Atainki aswebo kunkondo pe, nkaambo antela inga wayanzana abantu bakwe waba sinkondoma. Ino uyeeya kuti inga muntu ooyu bayanzana buti amwami wakwe Saulu? Tee muukukosola mitwe yabantu besu? 5Sena ooyu teensi Devedi, ooyo ngubakali kwiimbila kumwi kabazyana akuti, ‘Saulu wakajaya bantu bali zyuulu, pele Devedi wakajaya bantu bali zyuulu zili makumi?’”

6Mpoonya Akisyi wakaita Devedi akumwaambila kuti, “Mbubonya mbuli Mwami Leza mbwali muumi, yebo ulasyomeka. Kulindime taakwe bubi mbwindakujanina kuzwa kubuzuba mbookasika kulindime kusikila sunu. Nikuba boobo bami bamwi tabakuyandi. 7Aboobo piluka buyo, uunke aluumuno, kuti utabisizyi bami ba Bafilisiti pe.”

8Devedi wakati kuli Akisyi, “Ino ndacita nzi, ncibi nzi ncimwajana mumubelesi wako kuzwa buzuba naakasika akutalika kukubelekela kusikila ono, kuti intainki akuyoolwana basinkondo basimalelo wangu mwami?”

9Akisyi naakamvwa Devedi wakati, “Ndilizi kuti tolubizizye uli mbuli mungelo. Nikuba boobo basilutwe ba Bafilisiti baamba kuti, ‘Takooinka aswebo kunkondo pe.’ 10Lino ufume cifumo-fumo ababelesi bamwami aabo bakaza anduwe, utalike kweenda kakucisiya-siya ansi, uunke.”

11Nibwakaca Devedi wakafuma abantu bakwe kubweeda kunyika ya Bafilisiti. Bafilisiti bakainka ku Jezuliili.

Currently Selected:

1 Samuyele 29: Tonga96

Highlight

Copy

Compare