1 Samuyele 30

Devedi mbwaakalwana Baameleki

1Lino ciindi Devedi abantu bakwe nibakasika ku Zikilagi mubuzuba bwatatu, bakajana kuti Baameleki bakaisaala minzi yakumusanza lya Juda amunzi wa Zikilagi. Bakazunda munzi wa Zikilagi akuutenta, 2alimwi bakatola bakaintu boonse bakali mumunzi mubuzike, baniini abapati. Taakwe ngobakajaya pe, pele bakabatola mubuzike bakabatola buyo akuunka aabo. 3Devedi abantu bakwe nibakasika kumunzi, bakajana kuti ulitentedwe, abalo bakaintu babo abana bakatolwa mubuzike. 4Mpoonya Devedi abantu mbaakali aabo bakoongolola akulila mane kusikila nibakabula nguzu zyakulila. 5Bakaintu bobilo ba Devedi abalo bakalitoledwe mubuzike, Ahinowamu waku Jezuliili a Abigelo mukamufu Nabali waku Kaameli.

6Devedi wakapenzegwa mumoyo, nkaambo bantu bakali kuyanda kumuuma mabwe, kayi boonse bakalilutide mumyoyo, umwi kanyemede akaambo kabana bakwe. Pele wakayumizigwa mu Mwami Leza wakwe. 7Devedi wakati kuli Abiyata mupaizi mwana wa Ahimeleki, “Ndeetela kabaki kabupaizi.” Mpawo Abiyata wakakaleta kuli Devedi. 8Eelyo Devedi wakabuzya ku Mwami Leza kuti, “Sena eeyi impi ndiitobele? Sena njoobeenzya?” Mwami Leza wakati, “Iiyi, batobele, uyoobeenzya, alimwi uyoovuna bantu bako.”

9Aboobo Devedi abantu bakwe bali myaanda iili cisambomwe mbaakali aabo, bakasika kukalonga ka Beso, ooko bamwi bakasyeede nkobakakkede. 10Pele Devedi wakaindilila kaya kubatobela, walo abasilumamba bali myaanda yone. Bamwi bali myaanda yobilo bakasyaala musule, nkaambo bakali katede, tiibakacili aanguzu zyakuzubuka kalonga ka Beso pe. 11Aabo bakali a Devedi bakajana umwi muntu Muijipiti musokwe, bakamuleta kuli Devedi. Bakamupa cinkwa walya, alimwi bakamupa maanzi aakunywa, akumupa cibunge cankuyu azisankama zyansaansa zyobilo. 12Naakamana kulya, wakapononoka, nkaambo taakwe naakalide cinkwa naa kunywa maanzi kwamazuba otatwe amasiku otatwe. 13Mpawo Devedi wakati kulinguwe, “Ino yebo uli muntu wani? Ino wazwida kuli?”

Wakati, “Ndi Muijipiti, ndimubelesi wa Muameleki, simalelaangu wakandisiya, nkaambo ndakalicisidwe kwamazuba otatwe aakamana. 14Twakasaala kubbazu lyakumusanza lya Bakeliti, acisi ca Bajuda, kubikkilizya acisi cakumusanza ca Kalebi, ndiswe twaakatenta Zikilagi.”

15Devedi wakati kulinguwe, “Sena ulakonzya kunditola nkwiibede eeyi mpi njimwakali aayo?”

Wakati, “Ndikonkezya muzina lya Mwami Leza kuti tokooyoondijaya naa kundaaba kuli simalelaangu, nenga ndakutola nkoibede mpi eeyi.”

16Aboobo wakatola Devedi ooko Baameleki nkubakatanteene koonse-koonse, kabalya akunywa akuzyana, nkaambo kalubono lunji ndubakasaala kuzwa kunyika ya Bafilisiti akuzwa kunyika yacisi ca Juda. 17Devedi wakatalika kubajaya kuzwa kumabbililo aazuba akusikila mangolezya buzuba bwabili. Nkabela taakwe naba omwe wakatija ccita buyo baalumi bali myaanda yone bakatanta nkamela akutija. 18Lino Devedi wakavuna zyoonse eezyo Baameleki nzibakatolede, alimwi wakavuna abakaintu bakwe bobilo. 19Taakwe niciba comwe cakasweeka pe, cikomene naa kuceya, nibaba bana, niluba lubono oolo lwakatoledwe. Devedi wakaziboozya zyoonse. 20Alimwi Devedi wakatola mbelele aŋombe. Eelyo bantu bakazibinga eezyo ŋombe kumbele lyakwe akwaamba kuti, Eezi nzizya Devedi.

21Mpawo Devedi wakasika kubaalumi bali myaanda yobilo, bakakatede bakasyeede kukalonga ka Beso. Baalumi aabo bakainka kuti bakacinge Devedi akuyoocinga bantu aabo mbaakali aabo. 22Aabo babi myoyo abasilunya akati kabantu aabo bakainkide a Devedi bakati, “Mukuti taakwe nibakainka andiswe, tatukoobapa cintu niciba comwe pe kulubono ndutwaakupilusya. Citaumwi aumwi atole buyo mukaintu wakwe abana bakwe kwamana mpoonya ainke.”

23Pele Devedi wakati, “Tamweelede kucita boobo, nobakwesu, aceeco Mwami Leza ncaatupa, watubamba kabotu akwaaba mpi eeyo yakazide kuzootulwana. 24Ino nguni uukonzya kumuswiilila mumakani aaya aali boobu? Nkaambo caabilo cayooyo uuya kunkondo cileelede kuba mbubonya mbuli caabilo cayooyo uulindila zintu, baleelede kuti baabane mbubonya buyo.” 25Kuzwa mubuzuba oobo kusikila sunu Devedi wakacibikka mbuli mulawo aciyanza mu Isilayeli kuti zintu kazyaabanwa bweelede.

26Ciindi Devedi naakasika ku Zikilagi wakatumya mbono zimwi kubeenzinyina bapati bacisi ca Juda wakati, “Nceeci cipo cizwa kumbono zyabasinkondonyina Mwami Leza. 27Wakatumina baabo bamu Beteli, abamu Lamoti wakumusanza, abamu Jatili, 28alimwi bamu Aloyele, abamu Sifumoti, abamu Esyitemowa, 29abamu Lakalo, amuminzi ya Bajela miili aya Bakeni, 30abamu Holona, abamu Bolasyani, abamu Ataki, 31abamu Hebuloni, akumasena oonse aayo Devedi abantu bakwe ngibakali kweendeenda.”

Currently Selected:

1 Samuyele 30: Tonga96

Highlight

Copy

Compare