1 Samuyele 20
20
Jonatani mbwaakagwasya Devedi
1Mpoonya Devedi wakatija kuzwa ku Naiyoti ku Lama, wakasika akuzooamba kuli Jonatani kuti, “Ino ndacitanzi? Ino ndaamulandu nzi? Ino uso wandijanina cibi nzi ncayanda kundijaila?”
2Jonatani wakati kulinguwe, “Peepe, Tokoofwa. Bona, Taata takonzyi kucita cintu niciba buti katana ndaambila pe, ino inga taata wandisisa buti eeci? Takuli boobo pe.”
3Pele Devedi wakakonka akuti, “Uso ulizi kabotu-kabotu kuti yebo ulandiyandisisya, lino walo uyeeya kuti Jonatani teelede kwaaziba aaya makani inga wausa. Pele ncobeni mbubuli Mwami Leza mbwali muumi, yebo Jonatani ooli waawa lufu lwangu taluli kule pe.”
4Mpoonya Jonatani wakati kuli Devedi, “Kufumbwa cintu ncotaambe ndakucitila.”
5Mpawo wakati kuli Jonatani, “Langa. Junza kuli pobwe lya mwezi mupya, aboobo njelede kuti nkalye amwami, lino leka nkayube musokwe mane do zona mangolezya. 6Kuti naa uso andizule, inga omwaambila kuti, ‘Devedi wakandikumbila kuti ainke ku Betelehemu kumunzi wakwe nkaambo kuli pobwe lyakupaila licitwa mwaka amwaka lyabantu baciinga cakwe.’ 7Kuti naa waamba kuti, ‘Ncibotu.’ ‘Ciyooba cibotu kulindime ndemubelesi wako, pele kuti naa wanyema, ukazibe kuti ucindikanzide. 8Lino uleelede kundifwida luse, ndemubelesi wako, nkaambo ulipangene cizuminano ambebo kumbele lya Mwami Leza. Pele kuti naa ndijisi mulandu, undijaye yebo lwako. Nkaambo nzi ncoyanda kundaaba kuli uso?’”
9Mpawo Jonatani wakati, “Peepe musa, embo mbokubede oobo pe. Kuti naa nendalizi kuti taata ulakukanza kuti akujaye, sena nindatakwaambila?”
10Mpoonya Devedi wakati kuli Jonatani, “Ino nguni uuti ndaambile kuti naa uso wavuwa cabukali?” 11Jonatani wakati kuli Devedi, “Koza, tweende musokwe.” Nkabela boonse bobilo bakainka. 12Eelyo Jonatani wakati kuli Devedi, “Mwami Leza wa Isilayeli abe ngokamboni. Njakwaambaula ataata juunza aciindi nciconya cino, alimwi kuti naa nkajane kuti makani mabotu, nzookutumina mulomo. 13Pele kuti naa taata uyanda kukujaya, Mwami Leza andisubule akwiindilila kuti intazookwaambili akukucijisya kuti uvunwe. Mwami Leza abe anduwe mbubonya mbuli mbwaakali ataata. 14Kuti naa necipona, uleelede kundibeda aaluzyalo mbubuli lwa Mwami Leza kuti intajaigwi, 15pele kuti ndafwa kocinootondezya luzyalo oolu kumukwasyi wangu kwalyoonse alyoonse. Nikuba ciindi Mwami Leza aakunyonyoona basinkondonyina Devedi kuzwa ansi aano, 16mukwasyi wangu nde Jonatani utakazimaanizigwi ambabo. Masimpe Mwami Leza akasubule basinkondonyina Devedi.”
17Alimwi Jonatani wakakonkya Devedi kuti ataleki kumuyanda, nkaambo wakali kumuyanda mbuli mbwaaliyanda mwini. 18Mpoonya Jonatani wakati kuli Devedi, “Juunza ndipobwe lya mwezi mupya uyoozulwa, nkaambo taakwe uuyookkala acuuno cako. 19Zona kumangolezya ukainke kubusena mbookayubide lyakatalika penzi eeli, ukandilindilile kumwaala wa Ezeli. 20Nkabela mebo nzoofusa mivwi yotatwe kumbali aandilyo, nzoobaanga kuli nceyasa. 21Eelyo nzootuma mulombe kuti, ‘Koya, ukalete mivwi.’ Kuti naa ndaamba kumulombe kuti, ‘Langa. Mivwi ili kuno kubbazu lyako, ibweze,’ uleelede kuyooboola. Nkaambo mbubonya mbuli Mwami Leza mbwali muumi, nkokuti kuli kabotu, taakwe mapenzi. 22Pele kuti naa ndaamba kumulombe kuti, ‘Langa. Mivwi icili kumbele lyako,’ mpoonya uzwe, nkaambo Mwami Leza wakucijisya. 23Lino kucizuminano ncitwapanga Mwami Leza ngokamboni akati kesu tobilo mane kukabe kutamani.”
24Mbubonya mbuli mbubaapangana Devedi wakayuba musokwe. Eelyo ciindi capobwe lyamwezi mupya mwami Saulu wakakkala abusena bwakwe kuti alye. 25Wakakkala acuuno cakwe, mbubonya mbuli kuziindi zimwi wakakkede cuuno cakubwaanda. Jonatani wakakkede munsi lyakwe kulubazu lumwi, Abina wakakkede kubbazu limwi lya Saulu, pele acuuno ca Devedi kwakanyina muntu. 26Mubuzuba oobo Saulu taakwe ncaakaamba pe, nkaambo wakali kuyeeya kuti ambweni walomona tasalali. 27Nibwakaca buzuba bwabili, kalimanide pobwe eelyo cuuno ca Devedi cakacikkede buyo. Mpawo Saulu wakabuzya Jonatani mwanaakwe kuti, “Ino nkaambo nzi mwana wa Jese naatasiki kukulya kwamazuba aaya obilo jilo asunu?”
28Mpawo Jonatani wakaingula Saulu kuti, “Devedi wakandikumbila kuti aye ku Betelehemu. 29Wakati, ‘Njinke, nkaambo bamukwasyi wangu balijisi pobwe lyakupaizya mumunzi, mupati wangu wandikumbila canguzu kuti ndeelede kuyooba nkuko. Aboobo kuti koli mweenzuma ncobeni, ndileke nkabone bapati bangu.’ Ncenciceeco ncaatasikila kuzoolya amwami pe.”
30Mpoonya Saulu wakakalalila Jonatani wakati, “Yebo omwana wamukaintu sicinguni sigama, sena nsizi kuti ulamvwana amwanaa Jese walo uutikuletele bweeme, abanyoko bakakuzyala? 31Kwaciindi ncacipona mwanaa Jese, yebo tokabuboni bwami. Nkaako lino tuma bakamuyandaule akumuleta kulindime, nkaambo uleelede kufwa.”
32Mpoonya Jonatani wakaingula Saulu wisi kuti, “Ino ufwida nzi? Ncinzi ncaakacita?”
33Eelyo Saulu wakafusa sumo lyakwe kuli Jonatani kuti amujaye, aboobo Jonatani wakaziba kuti wisi ucikanzide kujaya Devedi. 34Mpawo Jonatani wakanyamuka cabukali kuzwa atebule, wakatakata taakwe naakalya mubuzuba oobo, wakausa, nkaambo wisi wakalikutundulula Devedi. 35Lino nibwakaca cifumo-fumo Jonatani wakainka musokwe ooko nkubakapangene a Devedi, nkabela wakainka amulombe. 36Wakati kumulombe ooyo, “Zuzaana, ukalete mivwi njindafusa eelyo kacizuzaana wakafusa muvwi kumbele lyakwe.” 37Lino mulombe naakaakusika ooko kwakali muvwi Jonatani wakati, “Ucili kumbele?” 38Alimwi Jonatani wakapozomokela mulombe wati, “Fwambaana, koya, utaimiimi.” Nkaako mulombe wa Jonatani wakabweza mivwi yoonse, wiileta. 39Pele mulombe ooyo taakwe ancaakazi, Jonatani buyo a Devedi mbibakezi makani. 40Mpoonya Jonatani wakapa mulombe zilwanyo zyakwe, wakati, “Koya, uzibweedezye kumunzi.”
41Mulombe mbwaakapilukila buyo, Devedi alakwe wakayubunuka kuzwa munsi abbwe mpaakayubide, Devedi wakavuntama ziindi zyotatwe, bakamyontana akulila mane Devedi walilisya. 42Mpoonya Jonatani wakati kuli Devedi, “Koya muluumuno, mbubonya mbuli mbutwakakonkezyanya swebo toonse tobilo muzina lya Mwami Leza kuti, ‘Mwami Leza uyooba kamboni akati kangu ayebo alimwi aakati kalunyungu lwangu alunyungu lwako mane kukabe kutamani.’” Mpoonya Devedi wakainka, alakwe Jonatani wakapiluka kumunzi.
Currently Selected:
1 Samuyele 20: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
